“Şaiq MTK”nın fəhlələrə qul gözündə
baxması neçə-neçə ailəni başsız qoyub

Bu gün respublikada nadir tikinti şirkətləri tapılar ki, öz işçilərini Əmək Məcəlləsinin tələblərinə uyğun şəkildə işlətsin. Tikinti sahəsində çalışan usta və fəhlələrlə çox vaxt əmək müqaviləsi bağlanmır və təhlükəsizlik qaydalarına riayət edilmir. Tikinti şirkətləri Əmək Məcəlləsinin müvafiq maddələrini pozaraq işçilərin təhlükəsiz iş şəraitini təmin etmirlər. Məcəlləyə görə, bütün müəssisələrdə, idarələrdə, təşkilatlarda sağlam və təhlükəsiz əmək şəraiti yaradılmalıdır.
Təəssüf ki, tikinti şirkətlərinin böyük bir qismi bunların heç birinə əhəmiyyət belə vermir. Bu baxımdan “Şaiq MTK” şirkətini də misal göstərə bilərik. Dünən şirkətin Teymurov küçəsi 23 47/28 də yerləşən yaşayış binasında ölüm hadisəsi qeydə alınıb. Həmin binada fəhlə işləyən 1977-ci il təvəllüdlü Nizami Balayav 21 mərtəbəli binanın 8-ci mərtəbəsindən yıxılaraq dünyasını dəyişib. Hadisə yerində olan digər fəhlələrin sözlərinə görə, yoldaşlarının ölümü şirkətin məsuliyyətsizliyi üzündən baş verib. Təhlükəsizlik kəməri və kaska verilməyən fəhləyə elə bir yerdə iş gördürüblər ki, ora ən professional şəxs çıxsaydı belə yıxılacaqdı.
Fəhlənin çalışdığı “Şaiq MTK” şirkətinin adı bundan qabaq da qalmaqallı məsələlərdə, daha doğrusu, mənzil fırıldaqlarında çəkilib. “Şərurlu İsfəndiyar” kimi tanınan İsfəndiyar Axundova məxsus olan MTK bir müddət əvvəl yüzlərlə vətəndaşa yalançı vədlər verərək onları dolandırıb. “Kamran B.Ə.” MMC bir müddət əvvəl vətəndaşlara külli miqdarda pul atıb. 96 mənzilin ümumilikdə təxminən, 300 vətəndaşa təkrar satılması, mənzil satışından əldə olunmuş 4.623.331 manat məbləğində pulun isə dələduzluq yolu ilə ələ keçirilməsi müəyyən olunub. Binanın tikintisini davam etdirmək sonradan “Şaiq” MTK-ya tapşırılıb. Şirkət aldadılan insanlara kömək olmaq əvəzinə, onlara yenidən kələk gəlib. Buna görə MTK-nın satış üzrə meneceri Bağırov Elçin Kərəm oğlu təqsirləndirilən şəxs qismində CM-in 178.3.2 və 308.2-ci maddələri ilə ittiham elan olunaraq barəsində məhkəmənin qərarı ilə həbs-qətimkan tədbiri seçilib. Mənzil fırıldağı ilə üzləşən vətəndaşlar hələ də “Şaiq” MTK-dan ev ala bilmirlər. Fəhlə ölümlərinin adiləşdiyi “Şaiq MTK”da 2007-ci ildə baş verən cinayətin üstü indiyə qədər açılmayıb. Şirkət tərəfindən Binəqədi rayonu, Cavadxan küçəsində inşa olunan binada fəhlə işləyən Tərtər rayon sakini Azər Fərəcov başına balta düşməsi nəticəsində dünyasını dəyişib. Əslində isə, A.Fərəcov təhlükəsiz şəraitdə işlədildiyindən binadan yıxılaraq həyatını itirib.
Malik