Elsevər Ağayevlə deputatın şərikli biznesinə təhlükə;
Vahid qiymət sisteminin tətbiqi "AvroMED"
şirkətinin sıradan çıxarılmasına hesablanıb

Dünyanın əksər ölkələri ilə müqayisədə Azərbaycanın dərman bazarında görünməmiş bahalıq müşahidə olunmaqdadır. Qardaş Türkiyədə 3 manata satılan dərman preparatı bizdə 6 manata satışa çıxarılır. Dərman bazarına nəzarət edən klanlar bir-biri ilə rəqabət apardığı üçün qiymətlər necə gəldi müəyyən edilir. Bu isə sonda əhalinin narazılığına gətirib çıxarır. Ölkənin səhiyyə sisteminin istənilən səviyyədə olmaması üzündən vətəndaşların bir çoxu müalicə almaq üçün xarici dövlətlərə gedirlər. Bu da belə görüntü yaradır ki, Azərbaycanın səhiyyə sistemi ümumiyyətlə, işlək vəziyyətdə deyil. Dərmanların qiymətindəki bahalaşmanın qarşısını almaq məqsədilə bu günlərdə yeni təklif irəli sürüldü.
"Apteklərdə dərmanların qiymət məsələsi uzun müddət səhiyyənin qarşısında duran əsas məsələlərdəndir. Dünya ölkələrinin bir çoxunda, Avropa dövlətlərində dərmanlar üçün vahid qiymət tətbiq edilir". Bu sözləri açıqlamasında səhiyyə nazirinin birinci müavini Elsevər Ağayev deyib. Onun sözlərinə görə, ancaq Azərbaycanın qonşu ölkələrində bu tətbiq edilmədiyi üçün bizim müəyyən qədər çətinliyimiz var idi. Nazir müavini vurğulayıb ki, bu sistem tətbiq edildikdən sonra artıq dərmanların üzərində qiymət yazılacaq: "Burada topdansatış müəssisəsinin, aptek müəssisəsinin konkret, bəlli bir faizi olacaq. Dərman preparatlarının üzərində Avropa ölkələrində olduğu kimi vahid qiymət olacaq. Respublikanın regionundan asılı olmayaraq, hər yerdə dərmanlar vahid qiymətlə satılacaq. Ola bilsin, ilk mərhələdə bu, həyati vacib preparatlara tətbiq olunsun. Sonradan isə yerdə qalan dərman preparatlarına tətbiq edilsin. Bunun Tarif Şurası tərəfindən tənzimlənməsi nəzərdə tutulur".
Dərmanlara vahid qiymətin tətbiqi əslində, nazir müavininə qarşı yönəlmiş bir addımdır. Bir çoxlarına bəllidir ki, hazırda ölkənin dərman bazarı tamamilə bu şəxsin əlindədir. Onun dəstəyi ilə respublikanın dərman bazarının böyük bir hissəsini ələ keçirən deputat Cavanşir Feyziyevin təsisçisi olduğu "AvroMED" şirkəti bu vaxta qədər müstəqil qiymət siyasəti həyata keçirirdi. Apardığımız qısa araşdırmalar zamanı öyrəndik ki, nazir müavini ilə deputatın bizneslərini daha da genişləndirmək istəyi və dərman qiymətlərinə görə vətəndaşların etirazlarının artması rəsmi strukturlarda həyəcan təbilinin çalınması ilə nəticələnib.
Aparılan ciddi müzakirələrdən sonra qərara alınıb ki, dərmanlara vahid qiymət qoyulsun və bu vasitə ilə adıçəkilən şəxslərin ortaq biznesi çökdürülsün. Məlumata görə, hazırda böyük gəlirlə işləyən "AvroMED" şirkəti vahid qiymət sisteminə keçəndən sonra ziyana gedə bilər. Belə ki, dərman preparatlarına şişirdilmiş qiymətlər qoyan firma yeni sistemdə bunu edə bilməyəcək və gəlirləri birdən-birə xeyli aşağı düşəcək. Mənbəmiz deyir ki, vahid qiymət məsələsini deputat və nazir müavini ilə yola getməyən, son vaxtlar dərman bazarından sıxışdırılan firmalardan birinin sahibi ortaya çıxarıb: "Həmin şəxs ölkənin ən nüfuzlu adamlarından birinin qohumudur. Onun təsis etdiyi dərman firması müxtəlif amillərlə bazardan çıxarıldı.
Hazırda onların işi yaxşı getmir. Bu səbəbdən də qohumundan xahiş edib ki, işinə mane olan şəxsləri cəzalandırsın. Dərmanlara vahid qiymət qoymaqla aylıq gəliri milyonlarla ölçülən böyük şirkətlərə təzyiq olunacaq". Əldə etdiyimiz digər məlumata görə isə, nazir müavininə məxsus "Zəfəran" aptekləri vahid qiymətin tətbiqindən sonra bağlanacaq.

Elçin