Dünyanın qanunsuz milyarderlərinin ofşor zonalarda
gizlədilmiş 32 trilyon dollara yaxın pulu aşkara çıxarılıb

Deyəsən, “Vircin əməliyyatı” hələ uzun müddət gündəmin aparıcı mövzusu olacaq. Qalmaqal hələ tam sürət yığmayıb. Qarşıda bizi daha maraqlı təfərrüatlar gözləyir. Hakimiyyətin qara əməlləri barədə çox şeyləri bilsək də, “Vircin materialları”nın arasında bizi heyrətləndirməyə gücü çatan faktların yer alacağına əminəm.
Bildiyiniz kimi, dünyanın qanunsuz milyarderlərinin ofşor zonalarda gizlədilmiş 32 trilyon dollara yaxın pulu aşkara çıxarılıb. Tədqiqatçı Jurnalistlərin Beynəlxalq Konsorsiumunun (İSİJ) əlinə keçmiş materiallarda bir çox korrupsioner və mafioz hökumətərin “vergi sığınacaqları”nda gizlətdikləri çirkli pulların mənbəyi də göstərilir.
Əslində Azərbaycan hakimiyyətinin ofşor zonalarda milyardlarının gizlədildiyi hamımıza bəlli idi. Amma indi söhbət təfərrüatlardan gedir. İlk dəfədir ki, Azərbaycan hakimiyyəti ofşor zonalarda biznes qurduğunu etiraf edir. “BBC”nin Azərbaycan bölməsinə açıqlamasında Prezident Administrasiyasının mətbuat katibi Azər Qasımov deyib: “Ofşor sənayesindən sızdırılan məlumatlarda Azərbaycan prezidenti İlham Əliyevin ailə üzvlərinin adının çəkilməsində qeyri-adi heç nə yoxdur. Onlar da hər bir Azərbaycan vətəndaşı kimi bizneslə məşğul ola bilərlər. Onların yaşı da, hər bir digər kriteriyalar da buna qanunla imkan verir. Yəni burda belə bir qeyri-adi heç bir şey görmürəm".
Prinsip etibarilə, indiyə qədər açıqlanmış faktları da təkzib etmək olardı. Amma görünür, hakimiyyət İSİJ-in əlində daha hansı materialların olduğunu yaxşı bilir və bu faktları sonadək təkzib etməyin mümkün olmayacağını başa düşür. Azər Qasımovun bəyanatı da gələcəkdə açıqlanması gözlənilən materiallara hazırlıq xarakteri daşıyır.
Digər tərəfdən, bütün bunların “qeyri-adi olmadığını” iddia edərək normal hal kimi təqdim etmək cəhdi də uğursuzdur. Hamımız yaxşı bilirik ki, belə biznes növü təpədən-dırnağa qeyri-adidir. Azərbaycan məmurlarının biznesmen olmasına normal baxmaq olardı, bir şərtlə ki, Corc Soros və ya Uorren Bafit kimi onların da keçdikləri biznes yolu şəffaf olardı. Bu milyarderlərin hansı əməliyyatdan nə qədər pul qazandığını, hansı səhmləri hansı qiymətə aldıqlarını və ya onları hansı qiymətə satdıqlarını bütün dünya bilir. Ümumiyyətlə, dünyanın bütün qanuni milyarderlərinin keçdikləri biznes yolunun təfərrüatları hamıya bəllidir. Bəs nədən bizim “Vircin biznesmen”lərimizin fəaliyyəti illər uzunu gizli saxlanıb və əvvəllər dəfələrlə təkzib edilib? Məgər bu, qeyri-adi deyilmi?..
Ortada dayanan başqa bir sual isə bu qalmaqalın arxasında kimlərin və hansı məqsədlə dayanmasıdır. Ötən sayımızda yazdığımız kimi, çirkli biznes sahibləri üçün ofşor zonaların başlıca olaraq, iki cəlbedici cəhəti var: Birincisi, ofşor şirkətlərin fəaliyyətinin məxfiliyinə zəmanət verilir və ikincisi, bu şirkətlər üzərində dövlət valyuta nəzarəti yoxdur. İSİJ isə adi bir jurnalist təşkilatıdır və bu məxfilik pərdəsini qaldırmaq gücündə deyil. Deməli, bu materialları qüdrətli kəşfiyyat orqanları ələ keçirərək mətbuata ötürüb. Yəqin ki, “qüdrətli” sözü ilə Qərbi nəzərdə tutduğumuzu başa düşdünüz.
Bəs məqsəd nədir? Bu sualın cavabını dəqiqliklə vermək asan deyil. Amma dəqiq olan budur ki, baş verənlər hansısa planın tərkib hissəsidir. Artıq çoxları bunu diktatorlara və avtoritar rejimlərə qarşı Qərbin həlledici hücumunun başlanğıcı kimi təqdim edirlər.
Hazırda Qərb dairələrində çoxları etiraf edir ki, terrorçuluğa qarşı mübarizə qapalı cəmiyyətlərə qarşı mübarizədən başlamalıdır. İndi 21-ci əsrdir - sürətli texnoloji inkişaf əsrində yaşayırıq. Bu inkişafın nailiyyətlərindən terrorçular da bəhrələnirlər. Bu əsrin terrorçuları təyyarə idarə edə bilir, kompüter proqramlaşdırmasını bacarır, dünya iqtisadiyyatına təsir göstərməyin yollarını bilirlər. Əl-Qaidə şəbəkəsi 11 sentyabr terrorundan yüz milyonlarla dollar pul qazanmışdı. Çünki terrordan az əvvəl Yaponiya yeni və qiymətli metallara pul yatırmışdılar. Terrordan dərhal sonra bu iki istiqamət üzrə qiymətlər qalxdı və Əl-Qaidə istədiyi qazancı əldə etdi.
Belə ağıllı terror təşkilatlarını hərəkətə gətirən başlıca motiv isə Qərbə nifrətdir. Bu nifrətin səbəblərinə gəlincə, Mərkəzi Kəşfiyyat İdarəsinin sabiq analitiki, Üsamə ben Ladeinin axtarışlarına başçılıq etmiş Maykl Şuer belə yazır: “Müsəlmanlar bizə kimliyimizə görə yox, əməllərimizə görə nifrət edirlər. Bu əməllərin siyahısı aşağıdakı kimidir: ABŞ-ın İsrailə aşkar dəstəyi; müsəlmanların müqəddəs yerlərində ABŞ ordusunun mövcudluğu; ABŞ-ın müsəlman ölkələrində polis rejimlərinə dəstək verməsi; ABŞ-ın Əfqanıstan və İraqa müdaxiləsi; ABŞ-ın dəstəyi ilə müsəlman İndoneziyanın ərazisində Şərqi Timor xristian dövlətinin qurulması; Hindistan, Çeçenistan, Çin və Fələstində müsəlman qiyamçılara qarşı əməliyyatlara ABŞ-ın dəstək verməsi; “Xaç yürüşləri” kimi tarixi faktorlar; Qərb dünyasının müsəlman mühacirlərə qarşı ayrı-seçkiliyi”.
Qərbə qarşı terror əhvalının kökündə məhz bu faktorlar dayanır və “ABŞ-ın müsəlman ölkələrində polis rejimlərinə dəstək verməsi” bəndini Azərbaycana da aid etmək olar. Prinsipcə, Azərbaycan hakimiyyətini milyarderə çevirən elə Qərbin özüdür. Belə bir avtoritar rejimlə enerji əməkdaşlığı əslində bu rejimə dəstək vermək anlamına gəlir. Bunun nəticəsidir ki, Azərbaycandan da xeyli sayda dindar mücahid müxtəlif terror təşkilatlarının sıralarında amerikalılara qarşı “cihad”a qoşulublar. Dindar olmayanlar da xəyallarında Ağ Evi partladırlar...
Görünür, Qərb avtoritarizmin kökünü kəsmədən terrorun kökünü kəsməyin mümkün olmayacağını başa düşür. Məhz bu prosesə start verilib. “Vircin materiallar”nı da prosesin tərkib hissəsi saymaq olar. Cinayət işlərinin açılması və müsadirə versiyaları da gündəmdədir. Əvvllər də ofşor bizneslərinə qarşı belə hallar yer alıb. Ancaq bu dəfə prosesin miqyası çox böyükdür. Qalmaqallar seriyasında Azərbaycan hakimiyyətinin önə çıxarılması isə əlavə suallara yol açır...

Orxan