Ölkə rəhbərliyinin yeni komandada fikirləşmədiyi naziri sərt cəzalar gözləyir; Hesablama Palatası, Maliyyə Nazirliyi və Korrupsiyaya Qarşı Mübarizə İdarəsi KTN rəhbərinin fəaliyyətini yoxlaya bilər

Media sahəsində son bir ay ərzində aparılan monitorinqlər göstərir ki, hökumətdə təmsil olunan məmurlardan ən çox mətbuatın hədəfinə çevrilən şəxs kənd təsərrüfatı naziri İsmət Abasovdur. Oğlu Yunus Abasova Londonda aldığı imarətin, xarici ölkələrdəki biznes şəbəkələrinin və əcnəbi banklarda hesablarının üzə çıxmasından sonra mətbuatda əsas müzakirə mövzusu olan nazir haqqında məlumatlar səngimək bilmir.
2004-cü ildən indiyə qədər Kənd Təsərrüfatı Nazirliyinə (KTN) rəhbərlik edən nazir yuxarılarda təmsil olunan bəzi yüksək vəzifəli şəxslər tərəfindən müxtəlif formalı təzyiqlərə məruz qalmaqdadır. Mötəbər mənbələrdən gələn məlumatlara əsasən belə mülahizə yürütmək olar ki, deyəsən, KTN şefinin vəzifədən azad edilməsi üçün seçkiləri gözləmək lazım gəlməyəcək. Çünki ölkə rəhbərliyi adıçəkilən məmurun karyerasını daha tez həll etmək niyyətindədir: "Başı üzərində qara buludların dolaşmasından xəbərsiz olan nazir bu yaxınlarda yüksək rütbəli dövlət adamlarından biri ilə polemikaya girib. Buna səbəb həmin şəxsin nazirin sahibi olduğu var-dövləti hansı yolla əldə etməsini soruşması olub. Qarşı tərəfin sualını susaraq qarşılayan nazir bu məsələdə heç kimə hesab vermək kimi bir məsuliyyətinin olmadığını söyləyib. Nazirin kinayəli cavabından sonra hakimiyyətdə kifayət qədər ciddi fiqur kimi qəbul edilən şəxs buna görə onun başının ağrıyacağını bildirib". Qaynağın xəbərinə görə, müxtəlif dövlət qurumlarının vasitəsi ilə KTN rəhbərinə qarşı həmlələrə hazırlıq görülür: "Nazir görəvdən alınacağı ilə bağlı xəbər eşidəndən sonra bəzi şəxslərə minnətçi düşüb və onlardan xahiş edib ki, vəzifədə qalmağa ona kömək göstərsinlər. Lakin nazirin kömək istədiyi adamların hamısı ondan üz çeviriblər. Hakim dairələrdə kənd təsərrüfatı sahəsindəki problemlər barədə söhbət açılıb. Dövlət büdcəsindən kənd təsərrüfatının inkişaf etdirilməsinə ayrılan milyardların xərclənməsində yeyintiyə yol verilməsini qabardan şəxslər buna görə məsuliyyəti İsmət Abasovun üzərinə atıblar. Müzakirələr zamanı səsləndirilən fikirlərdən biri də o olub ki, Kənd Təsərrüfatı Nazirliyinə son 9 il ərzində dövlət tərəfindən göstərilən maliyyə yardımlarını nazir necə gəldi sərf edib. Və bunun hesabına ölkə xaricində özünə milyonlarla qiyməti olan villalar alıb, biznes mərkəzləri açıb. Aparılan müzakirələrdən, irəli sürülən təkliflərdən sonra qərara alınıb ki, Hesablama Palatası, Maliyyə Nazirliyi və Korrupsiyaya Qarşı Mübarizə İdarəsinin əməkdaşları nazirliyin son illərdəki fəaliyyətini və quruma ayrılan vəsaitlərin hansı təyinat üzrə xərclənməsini geniş şəkildə araşdırsınlar. Yoxlamaların həyata keçirilməsində əsas məqsəd naziri fakt qarşısında qoyaraq mənimsənilən milyonların hesabını tələb etməkdir".

Zaur