Baş nazirin müavini parlament seçkilərindən sonra “siyasi təqaüdə” göndəriləcək;
KTN-dəki vəzifəsini itirməkdən başlayan eniş dövrü 2015-ci ildə sona yetə bilər

Baş nazirin müavini İsmət Abbasov 2015-ci ildən sonra vəzifəsi ilə vidalaşacaq. Kənd təsərrüfatı naziri postundan uzaqlaşdırılması ilə ciddi şəkildə zəiflədilən İ.Abbasov gələn il “siyasi təqaüdə” göndəriləcək. Parlament seçkilərindən sonra hakimiyyətin öz daxilində başladacağı kadr islahatları, veteranların reformasiyası siyasətində İ.Abbasov da yola salınacaq.
KTN rəhbərliyindən baş nazirin müavini postuna endirilən, rütbəsi aşağı salınan İ.Abbasov iqtidar üçün bir məmur kimi əhəmiyyətini itirib. Əslində fəaliyyət göstərdiyi müddətdə hökumətə sadiq qalan, prezidentin siyasi kursundan bir qarış kənara addım atmayan və nazirlərin içərisində cəmiyyətə, mediaya ən açıq olan İ.Abbasov bir xətaya yol verməyib.
Təbii ki, oliqarxik, monopolist və korrupsioner bir nazir olması şübhə doğurmur. O da sirr deyil ki, nazir müavini KTN-də qazandığı milyonlar hesabına böyük sərvət toplayıb, ailəsi, övladları və ətrafı üçün geniş imkanlara sahiblənib. Sabiq nazirin oğlunun da Londonda villalarının, malikanələrinin meydana çıxması onda xəbər verir ki, İsmət Abbasov vəzifəsindən kifayət qədər istifadə edib və innən belə itirəcəyi heç nə qalmayıb.
Mötəbər qaynaqlardan “Gündəm-xəbər”ə verilən səhih məlumatlarda qeyd olunur ki, artıq limiti dolduran və hakimiyyət üçün lazımsızlaşan İsmət Abbasov parlament seçkilərindən sonra baş nazirin müavini postunu da itirəcək.
Onun KTN-dəki vəzifəsini itirməsi ilə başlayan proses öz məntiqi ardıcıllığını başa vurmaq üzrədir. Sabiq nazir iqtidardakı hakimliyinin sona çatdığını da gözəl bilir.
Mənbəmiz iddia edir ki, İsmət Abbasov rəqabətdə uduzub və üstəlik, barəsindəki kompromatlar, korrupsiya faktları, Aqrolizinqdə yeyintilərin aşkarlanması, medianın onun üzərinə kompaniya şəklində getməsi onun siyasi potensialının qısırlaşdırıb.
Mənbə qeyd edir ki, İ.Abbasov haqqında yekun qərar seçkilərdən sonra dəqiqləşəcək: “Əlbəttə, İsmət Abbasov vadidəki güclərin qabağında duruş gətirə bilməzdi. Onun iqtisadi resursları da buna imkan vermir. Qarşısında daha güclü qüvvələr var.
Bundan əlavə, həqiqətən də İsmət Abbasov kənd təsərrüfatı sahəsində heç bir irəliləyişə nail olmayıb, inkişaf getməyib, fermerlərin güzəranı ağırlaşıb, kənd sakinlərinin mənfəəti ilə nəticələnən torpaq islahatı getməyib, pay torpaqları pekəş olunub, subsidiyaların verilməsində ciddi şəkildə mənimsəmələr, açıq-aşkar maxinasiyalar həyata keçirilib.
Eyni zamanda bazarda süni qiymət artımına son qoyulmayıb. İsmət Abbasovun bu sahədə bir qarış da nailiyyəti yoxdur. Beləliklə, vəzifədə olarkən yalnız öz cibinə işləyən hörmətli baş nazirin müavini yeni vəzifəsində də heç nə ilə yadda qalmayıb. Sanki, onu bu posta sakit dayanması üçün qoyublar ”.
Mənbə iddia edir ki, hakimiyyət daxilində İ.Abbasovun Artur Razisadəyə müavin təyin olunmasını istəməyən qüvvələr olub. İndinin özündə də həmin qruplarla Abbasovun arasında toqquşmalar yaşanır”.
Aydın