Kartlardan istifadə, pulköçürmələri, vəsait çıxarılması ilə bağlı vətəndaşlar bank xidmətlərindən heç də hər zaman razı qalmırlar. Xüsusilə komissiya haqlarının yüksək olması ilə bağlı narazılıqlara daha tez-tez rast gəlinir.

Bizim.Media-ya daxil olan bank xidmətindən narazılıq da eyni xarakterlidir.

Amma bu dəfə söhbət məsələ vətəndaşın müştərisi olduğu bankın deyil, digər bankın xidmətindən narazı qalmasından gedir.

Belə ki, bir bankın kartı vasitəsilə digər banka məxsus bankomatdan pul çıxarmağa çalışan vətəndaş yüksək məbləğli komissiya haqqı ilə üzləşib. 50 manata görə 3 manat 50 qəpik kommisiya haqqı. Bu da nə az, nə çox, düz 7 % edir.

Bankların xidmət haqlarının yüksək olması nə ilə bağlıdır? Bu cür hallarla üzləşməmək üçün vətəndaşlar nə etməlidir?

Bank məsələləri üzrə ekspert Əkrəm Həsənov Bizim.Media-ya bildirib ki, hər hansı bir bankın müştərisi göstərilən xidmətə görə, öz bankına müəyyən xidmət haqqı ödəyir:

“Müştəri bank hesabını açanda, kartı alanda, pul köçürməsi, pul çıxarılması zamanı öz bankına köçürmə edir. Digər bankdan pul çıxarılan zaman kommissiya haqqı tutulmasa, belə çıxır ki, o, başqasının müştərisinə pulsuz xidmət göstərməlidir”.

Bununla belə Əkrəm Həsənov bildirib ki, bankomatlardan pul çıxaran zaman əvvəlcədən ekranda komissiya haqqı ilə bağlı məlumat göstərilməlidir:

“Yəni müştəri bilməlidir ki, bu əməliyyatı edərsə, nə qədər haqq çıxılacaq. Bu zaman müştəri qiymətlə razılaşa da bilər, razılaşmadığı halda əməliyyatı dayandıra da bilər”.

Hüquqşünas bankların öz aralarında bu məsələni tənzimləməsinin də mümkün olduğunu qeyd edib:

“Banklar öz aralarnda bu məsələni tənzimləyə bilər. Bu zaman onlar digər bankların onların müştərilərinə göstərdiyi xidmətin haqqını ödəməyi öz üzərlərinə götürə bilərlər. Amma təbii ki, bütün bankların razılaşma əldə etməsi də asan deyil”.

Əkrəm Həsənov bildirib ki, bu cür problemlərin yaranmaması üçün müştərilər bank seçərkən, onun filial şəbəkəsinin geniş olmasına, bankomatlarının çox olmasına diqqət etməlidirlər.

Bankların qoyduğu qiymətin məbləğinə gəldikdə, ekspertin sözlərinə görə, bazar iqisadiyyatı şəraitində onların istədiyi xidmət haqqını təyin etmək hüququ var:

“Həm də burada söhbət başqa bankın müştərisinə xidmət etməkdən gedir. Banklar öz bankomatlarını vaxtlı-vaxtında pulla doldurmağa məcburdurlar. Buna görə banklar işçilər təyin edir, inkasatordan istifadə edir. Komissiya haqqı məsələsi olmasa, hər hansı bank xərc çəkib, bunu etməz ki, müştəriləri gedib başqa bankdan pul çıxarsınlar”.

Digər ekspert Samir Paşayevin fikrincə isə kapitalist cəmiyyətinin tələbləri anlaşılandır:

“Amma xarici ölkə təcrübəsini hər dəfə nümunə gətirməkdən zövq alan məmurların diqqətinə onu da çatdırmaq lazımdır ki, ölkənin rifah halını nəzərə almaqla bir Avropa ölkələrinin komissiya faizlərinə də nəzər salsınlar. Bu əksər ölkələrdə 3 faizi keçmir. Həm də bizim kimi ölkələrdə azad bazar rəqabəti olmadığına görə, mütləq dövlət tənzimləməsinə ehtiyac var. Taarif Şurası qaza, suya, işığa, dərmana baxdığı kimi bu sahələrə də nəzər salsa, pis olmaz”.

Gundemxeber.az