“Amma ayda bir dəfə mağaza sahiblərinə müxtəlif məbləğlərə qol çəkdirirlər”

gundemxeber.az “Azərsun Holdinq”in Yevlax satış bazasının sahibkarlara yaratdığı problem barədə redaksiyamıza şikayət məktubu daxil olub. Məktubun müəllifi Yevlaxda mağaza sahibi olan Cəlil Fərzəliyev iddia edir ki, “Azərsun Holdinq”in əməkdaşları yaratdıqları inhisarçılıqdan istifadə edərək sahibkarları çıxılmaz vəziyyətə salırlar: “Bu adamları maraqlandıran yalnız öz qazanclarıdır. “Azərsun” istehsal etdiyi malları istədiyi qiymətə bizə verir, istədiyi vaxt qiyməti qaldırır”.
Sahibkarın sözlərinə görə, “Azərsun Holdinq”in mağazalara payladığı şəkər tozunun qiyməti də süni şəkildə artırılıb: “Təsəvvür edin ki, əvvəllər şəkər tozu Ukrayna və Rusiyadan gətirilirdi. İmişlidə zavod tikiləndən sonra şəkər tozunu ölkəyə yalnız “Azərsun” paylayır. Xarici ölkədən gətiriləndə şəkər tozu iki dəfə bundan ucuz idi. İndi öz ölkəmizdə istehsal olunmasına baxmayaraq qiymətlər qaldırılıb. Şirkət şəkər tozunun inhisarçısıdır deyə, mağazalara malı minnətlə verir”.
Sahibkar iddia edir ki, “Azərsun”un əməkdaşları mağaza sahiblərinə mal verəndə satılmayan mallarını da götürməyi tələb edirlər: “Şirkətin satılmayan malları da var. Sahibkarlar mal istəyəndə deyirlər ki, həmin o satlmayanlardan da götürməsəz istədiyiniz malı verməyəcəyik. Bu da bizə ziyan verir. Həmin mallar mağazalarda yatır. Heç kəs almır. Nəticədə isə yazılır ayağımıza və satdığımız maldan da bu zərərə görə heç bir xeyir götürə bilmirik”.
C.Fərzəliyevin sözlərinə görə, şirkətin əməkdaşları mağaza sahiblərini aldadırlar: “Bizə deyirlər ki, malı nəğd alsanız ayın sonunda satdığınız malın dəyərinin 4 faizi özünüzə qaytarılacaq. Amma ayın axırında bizə cəmi 2 faizini qaytarırlar. Bu da həmin malın satışına görə heç vergini ödəməyə kifayət etmir”.
Sahibkarın başqa bir iddiası mağazalara verilən mallara görə qaimələrin verilməməsi ilə bağlıdır. C.Fərzəliyev deyir ki, onlara üzərində gerb şəkli olan xüsusi qaimələr əvəzinə adi qaydada mətbəədə çap olunmuş kağız parçası verirlər. Amma ayda bir dəfə mağaza sahiblərinə müxtəlif məbləğlərə qoy çəkdirirlər. Görünür bununla da vergi orqanlarını aldatmağa çalışırlar".
Məsələ ilə bağlı “Azərsun Holdinq”in də mövqeyini öyrənmək məqsədilə qurumun internet səhifəsində təqdim olunan əlaqə nömrələrinə zəng etdik. Təəssüf ki, zənglərimizə cavab verən olmadı. Buna baxmayaraq qarşı tərəfin də mövqeyini dinləməyə hazırıq.