Rektor ittihamlara cavab verdi: “Azərbaycanda adam oğurluğu ilə məşğul olan mütəşəkkil cinayətkar təşkilata Mehdiyev havadarlıq edir”

gundemxeber.az İki gün öncə YouTube beynəlxalq paylaşım səhifəsində ABU-nun sabiq sahibi və rektoru Elşad Abdullayevin əleyhinə çıxış edən şəxsin videogörüntüləri yayılıb. Bu şəxs Daxili İşlər Nazirliyinin sabiq əməkdaşı Neman Kərimovdur. İndiyə qədər hakimiyyəti, ayrı-ayrı şəxsləri ağır ittihamlara məruz qoyan E.Abdullayevin özü bu dəfə Kərimovun ittihamlarına məruz qalır. N.Kərimov onu cinayət törətməkdə, anasının ölümünə bais olmaqda ittiham edir. Məlum olur ki, Kərimovun anası vaxtilə E.Abdullayevin yanında çalışıb və onunla arasında olan 2 milyon dollara görə özünü öldürüb.
Üç hissədən ibarət olan 29 dəqiqə 41 saniyəlik video dekabrın 18-də sayta qoyulub. N.Kərimov orada kameraya baxaraq yaşadıqlarını nəql edir. Qeyd edək ki, onun qarşısında vərəq olduğu və hərdənbir bu vərəqdə yazılanları oxuduğu sezilir. Keçmiş polis əməkdaşı özü barədə məlumat verməsə də anasının E.Abdullayev tərəfindən necə aldadılmasını bütün detalları ilə danışır. Onun dediklərinə görə, 2002-ci ildə anası, ibtidai sinif müəlliməsi olan Svetlana Mövsümovanın E.Abdullayevin qardaşı Mahir Abdullayevlə şəxsi münasibəti olduğu üçün həyatında dəyişiklik olub.
M.Abdullayev Svetlana Mövsümovaya bildirib ki, onu qardaşının rəhbəri olduğu universitetdə hüquq fakültəsində işə düzəldə bilər: “Mahir şəxsən anam Svetlananın qardaşı Elşadla görüşünü təşkil edib. Anamı Elşada ən yaxın iş görən adamı kimi təqdim edib ki, hüquq fakültəsində işləsin, tələbə qəbulu ilə məşğul olsun. Anam da razılaşıb. 2002-2003-cü illərdə San- Marino Universitetinin hüquq fakültəsində işləyirdi. Elşad Abdullayevlə arada əlavə adam olmadan tələbələri qəbul edib, onların sənədləri isə Elşada verilib. Anam tələbələrin valideynləri ilə əlaqə yaradıb, istədiyi fakültəyə qəbul etdirib. Amma göstəriş Elşad Abdullayev tərəfindən olub”.
Bu video olayı ilə bağlı E.Abdullayev də “Yeni Müsavat”a danışıb. Sabiq rektor dedi ki, Neman Kərimov Arzu Kazımovun oğlu Zaur Kazımovla birlikdə Binəqədi Rayon Polis İdarəsində çalışıb: “Zaur Kazımov əvvəl İnterpolun Azərbaycan bölməsində işləyib. Sonra isə atasının cinayətlərini gizlətmək üçün daha aşağı vəzifəyə - Binəqədi polisinə, 4-cü polis bölməsinə rəis müavini təyin edilmişdi ki, ABU-ya qarşı terror etsin. Həmişə də ABU müəllimlərinə və tələbələrinə qarşı ”fabrikovat" olunmuş (qurama-red.) cinayət işləri açırdı. Son bəyanatı da yalandır, telefon nömrəsini də qeyd etmişəm".
E.Abdullayev dedi ki, Z.Kazımovun onunla birlikdə bir neçə videogörüntüləri var. “Növbəti dəfə Zaurun videosunu qoyacağam” - deyən sabiq rektor N.Kərimov barədə də danışdı: “Qaldı Neman Kərimova, o, Zaur Kazımovun hazırda polis agentidir. ”Kliçka"sı “Qarğa”dır. 2009-cu ildən Nəsimi Rayon Məhkəməsində dələduzluğa görə polisdən uzaqlaşdırılıbdır. Hazırda Zaurun agentidir. 2008-ci ildə mənim vəkilim və nümayəndəmi, doğma bacım oğlu Azad Mürsəliyevi Milli Elmlər Akademiyasının qabağında polis formasında sürtüşərək şərləmişdi. Bacım oğlunu guya polisə müqavimət, Neman Kərimovun polis formasını cırdığına görə 1 il azadlıqdan məhrum etdirmişdi. Sonra da Arzu Kazımovun sifarişi ilə qəzetlərdə yazdırırdı ki, ABU-nun rektoru Elşad Abdullayev öz bacısı oğlunu həbs etdirdi. Hətta BDU hüquq fakültəsində dərs dediyim yerdə tələbələrə paylayırdılar".
E.Abdullayev sonda onu da dedi ki, Azərbaycanda adam oğurluğu ilə məşğul olan mütəşəkkil cinayətkar təşkilat leqal fəaliyyət göstərir: “Çünki onlara Mehdiyev havadarlıq edir”. E.Abdullayevin sözlərinə görə, Z.Kazımovun İnterpolda idarə rəisi vəzifəsini qoyub Binəqədi rayonuna aşağı vəzifəyə gəlməsinin bir məqsədi var: “Bu da mənə qarşı ”fabrikovat" olunmuş cinayət işi yaratmaq olub. O yaxşı bilirdi ki, nə qədər mən varam, atası adam oğurluğuna görə həbs olunacaq. Necə ki, bu gün Arzu Kazımov həbs olunub. Bu və ya bənzər adamlar, videolar, yalançı şahidlər və s. davamlı ola bilər. Məqsəd videoların effektini aşağı salmaqdır. Amma bunu bacarmayacaqlar"

“Siyasət şöbəsi”