Bu gün sabiq səhiyyə nazirinin məhkəməsidir; Apelyasiya Məhkəməsində yenidən mühakimə olunan sabiq naziri İsmət Abbasov “danışdırır” iddiası var; iqtidarın məhkəmə ilə bağlı son qərarı sürpriz ola bilər


Bu gün-yanvarın 31-də həbsdə olan sabiq səhiyyə naziri Əli İnsanovun işi üzrə iki məhkəmə prosesi keçiriləcək. Bakı Apelyasiya Məhkəməsində keçiriləcək ilk prosesdə Ə.İnsanovun Ədliyyə Nazirliyinə qarşı iddiasına baxılacaq.

Yanvarın 17-də keçirilən ilk məhkəmədə çıxış edən Ə.İnsanov deyib ki, onun şikayəti birbaşa ədliyyə naziri Fikrət Məmmədova qarşıdır. “O nəyə arxayındır ki, nəinki özü məhkəməyə gəlmir, eyni zamanda heç etibarnamə verib bir nümayəndəsini də məhkəməyə göndərmir” deyən Ə.İnsanov tələb edib ki, nazir məhkəməyə gəlsin. Ədliyyə Nazirliyinin Penitensiar Xidmətinin nümayəndəsi xatırladıb ki, işə Ədliyyə Nazirliyindən nümayəndə olmadan baxılması mümkündür. Ə.İnsanovun vəkilləri buna etiraz ediblər və Ədliyyə Nazirliyindən nümayəndənin məhkəməyə gəlməsini istəyiblər. Əli İnsanov da bu məsələyə reaksiya verib: “Haradadır bu məmləkətin ədaləti ki, ədalətin başında duran adam özü məhkəməni sayıb məhkəməyə gəlmir? Fikrət Məmmədov nə vaxtdan Əli İnsanovu saymır?”



Sabiq nazir iddia edib ki, ona verilən əzab-əziyyətin başında Fikrət Məmmədov durur.
Maraqlıdır ki, hakimlər müşavirə keçirərək qərara alıblar ki, cavabdeh Ədliyyə Nazirliyinin nümayəndəsi olmadan işə baxılması mümkünsüzdür və proses yanvarın 31-dək təxirə salınıb.

Ə.İnsanovun işi üzrə bu gün keçiriləcək ikinci məhkəmədə keçmiş nazirin əsas ittiham - 11 il müddətinə azadlıqdan məhrum edilməsi ilə bağlı hökmdən şikayətinə baxılacaq.
Yanvarın 17-də keçirilən bu prosesdə də Ə.İnsanov iqtidara sərt ittihamlar səsləndirib.
Qeyd edək ki, bir müddət əvvəl Ali Məhkəmənin Plenumunda Avropa İnsan Hüquqları Məhkəməsinin (AHİM) sabiq nazirlə bağlı qərarına baxılıb. Plenumun qərarına əsasən, Ə.İnsanov barəsində Apelyasiya Məhkəməsinin və Ali Məhkəmənin qərarları ləğv edilib, birinci məhkəmə instansiyanın qərarı isə dəyişdirilməyib və Ə. İnsanov həbsdən azad edilməyib. İş araşdırılması üçün yenidən Bakı Apelyasiya Məhkəməsinə göndərilib.
AİHM ötən il martın 14-də Ə. İnsanovla bağlı qərarda İnsan Hüquqları üzrə Avropa Konvensiyasının 3-cü maddəsi üzrə (işgəncə faktı), 6-cı maddəsinin 1-ci və 3-cü paraqrafları (ədalətli məhkəmə hüququ) üzrə iddiaları təmin edilib. Qərarda eyni zamanda Azərbaycan hökumətinin Ə. İnsanova 10 min avro məbləğində kompensasiya ödəməli olduğu da qeyd olunub.

Məlumatlara görə, sabiq nazirin məhkəmədəki son çıxışı hakimiyyətin ciddi narazılığına səbəb olub. “Azadlıq” qəzeti bir neçə gün əvvəl belə bir məlumat yayıb ki, iqtidarda sabiq nazirin nəinki həbsdən buraxılması, əksinə, həbs müddətinin artırılması barədə müzakirələr gedir. “Hakimiyyət eynilə Eynulla Fətullayevlə bağlı atdığı addımı Əli İnsanova qarşı atmaq planları üzərində işləyir” deyə, xəbərdə bildirilirdi.



Digər bir məlumata görə isə Ə.İnsanovun sərt aşıqlamaları təsadüfi deyil və onun arxasında duran qüvvə sabiq kənd təsərrüfatı naziri İsmət Abbasovdur. DİA.az saytı iddia edir ki, İsmət Abbasovun qayınatası Yunus Rzayevin bacısı oğlunun qızı Əli İnsanovun gəlinidir.

Hakimiyyətə yaxın mənbələrdən “Yeni Müsavat”a daxil olan məlumat da ilgincdir. Qaynağımız deyib ki, Ə.İnsanova yeni bir cinayət işi açılması hakimiyyətin planına uyğun deyil: “Avropa Məhkəməsinin qərarının icra edilməməsi Azərbaycana kifayət qədər problem yaradıb. Ona görə ən optimal variant cəmi iki il həbs cəzası qalan Əli İnsanovun işinin yüngülləşdirilməsidir. Yəni məhkəmə sabiq nazirin səhhətini və yaşını nəzərə alaraq onun cəzasını yüngülləşdirəcək. Yəqin ki, cəzanın 1 ili azaldılacaq”. Hətta tamamilə mümkündür ki, Əli İnsanov sürpriz şəkildə azadlığa buraxılsın.

Xəbər xidməti