Əhliman Əmiraslanovun adı siyasi arenada Rəsul Quliyevlə hallanır
Azərbaycan Tibb Universitetində “Koloniya sistemi” və yaxud akademik
Bu gün Azərbaycan səhiyyəsinin acınacaqlı durumu heç kimə sir deyildir. Rüşvət çirkabında boğulan ölkə səhiyyəsi əslində insanların sağlamlığını qorumasından daha çox onların cibinin soyulması ilə məşğuldur. Artıq Azərbaycan insanların həkimə getməyə qorxduğu bir ölkədir. Bir çox hallarda savadsız həkimlərin səhv, düzgün olmayan diaqnozu insan faciələri ilə nəticələnir. Maaşının azlığından şikayətlənən ağxalatlı həkimlərimiz bunun bütün ağrı-acısını sadə vətəndaşlardan çıxırlar. Apteklərlə faizə işləyən həkimlərimiz bahalı, çox vaxt yararsız dərmanları xəstələrə “sırımaqla” (başqa ad tapmaq mümkün deyil) onların taleyi ilə oynayırlar. Azərbaycan səhiyyəsinin yazılmamış qanunu belədirki, pulun yoxdursa ölməlisən.
Heç təsadüfi deyil ki, indi qarnı ağrıyan vətəndaşımız da sağalmaq ümidi ilə İrana üz tutmaq məcburiyyətində qalır.Buna səbəb təkcə qiymətlərin ucuzluğu deyil, həm də insanların öz həkimlərimizə inanmamasıdır. Əslində xəstələrə pulsuz xidmət etməli olan dövlət xəstəxanaları əsl həkimlərimiz tərəfindən sözün əsl mənasında talanır.
Ölkə səhiyyəsinin mövcud acınacaqlı, faciəli durumunda, savadsız tibb kadrlarının hazırlanması ilə məhşurlaşan Azərbaycan Dövlət Tibb Universitetinin “misilsiz” xidmətlərini vurğulamamaq mümkün deyil. Bilavasitə insanların sağlamlığını qorumalı olan kadrların hazırlanmasına cavabdeh olan bu alitəhsil ocağı isə daha çox şəxsi biznes maraqlarına xidmət edən bir təhsil müəssisəsidir. 1992-ci ildən bu təhsil ocağına rəhbərlik edən Əhliman Əmiraslanovun “yetirmələri” ölkə səhiyyəsinin “ağxalatlı qara ləkələrinə” çevriliblər. Demək olar ki, müstəqillik dövrümüzün “canlı tibb səlnaməsi” olan Ə.Əmiraslanovun Tibb Universitetində illərlə davam etdirilən siyasəti nəticəsində pulla diplom alan tələbələr səhiyyəmizdə at oynadırlar. Həkimlərimizin qoyduğu diaqnozlar əksər hallarda xarici ölkələrdə heyrətlə, gülüşlə qarşılanır. Çünki, “pulun gücünə malik olanların” məqsədi xəstəni sağaltmaq yox, pulunu “sağmaqdır” . Tibb Universiteti çoxdandır ki, Baloniya sisteminə keçsə də, əslində imtahanlar yenə də “dədə-baba” qaydasıyla, yəni pulla aparılır.Bir müddə təvvəl Tibb Universitetindən dərsə davamiyyəti pis olan yüzdən çox tələbənin qovulması haqqında məlumatlar yayılmışdı. Daha sonar isə həmin qovulan tələbələrin böyük əksəriyyətinin yenidən universitetə bərpa olunduğu məlum oldu və bu bərpaolunmaların hər birinin 20-40 min manat arasında baş verdiyi də vurğulanırdı. İndi düşünürsünüzmü ki, səhiyyə təhsilimiz kimlərin əlindədir və görün sağlamlığımızı kimlərə etibar edirik? Bir vaxtlar Rəsul Quliyevə “xüsusi” yaxınlığı ilə tanınan Ə.Əmiraslanov daha sonar sabiq səhiyyə naziri Əli İnsanovun “sədaqətli” kadrı olmuşdur. Ə.İnsanov vəzifəsindən kənarlaşdırılıb, həbs olunandan sonar Ə.Əmiraslanovun da vəzifədən götürüləcəyi an məsələsiydi. Lakin, bu zaman prezidentin dayısı Cəmil Əliyevin dəstəyi ilə vəzifəsində saxlanılan Əmiraslanov öz “gərgin elmi fəaliyyətini” davam etdirmişdir. Keçmiş “siyasi əlaqələri” onun fəaliyyətinə heç bir maneçilik törətməmişdir.
Akademik Ə.Əmiraslanov həm də ölkəninən böyük “onkologiya bazarının” rəhbəridir. Bu gün Azərbaycanda az qala qrip səviyyəsində yayılan bu dəhşətli xəstəlik “onkologiya bazarı”nın rəvac tapmasında mühüm rol oynayır. 2007-ci ildən Tibb Universitetinin Onkoloji Klinikasına rəhbərlik edən Ə.Əmiraslanov bu sahəni sözün əsl mənasında əməlli-başlı inhisara almışdır. Paytaxtda hörmətli Cəmil Əliyevin rəhbərlik etdiyi Milli Onkologiya Mərkəzi fəaliyyət göstərdiyi bir halda Ə.Əmiraslanov Universitetin Onkoloji Klinikasında öz “gərgin” fəaliyyətini davam etdirir. Həyatla ölüm arasında çarpışan xəstələr bu klinikada akademikin qoyduğu “xüsusiqaydalar” əsasında müalicə olunurlar. Necə deyərlər, Onkoloji klinikada qiymətlər “od tutub yanır”. Yaşamaq ümidiylə hər şeyini qurban verməyə hazır olan xəstələr üçün 3-5 min manat arasında dəyişən qiymətlərlə burada cərrahi əməliyyatlar həyata keçirilir.Bu da təsadüfi deyil. Axı akademik Ə.Əmiraslanov həm də millət vəkilidir. Millətin sağlamlığının keşiyində isə ucuz qiymətə durmaq olmur!
Məhz Ə.Əmiraslanovun “yetişdirdiyi” kadrların qoyduğu onkoloji diaqnozlarla İrana, Türkiyəyə, Rusiyaya üz tutan bir çox xəstlərdə ümumiyyətlə bu xəstəliklər müşahidə olunmamışdır. Bu gün İran xəstəxanaları Azərbaycandan axışan xəstələrlə dolub daşır.Çünki, məhz akademikin “od qiymətinə etdiyi” əməliyyatları burda qat-qat ucuz qiymətə, həm də keyfiyyətlə etdirmək olur. Klinikanın baş həkimi Nəsimi Qasımov və həkim heyyətinin “qayğıkeşliyini” görən xəstələrimiz dərd əlindən “başgötürüb” İrana, Turana qaçmağa məcbur olurlar.
Çünki, burada əməliyyat olunmağın qiymətləri bir yana, palatada yatmağın bir gününün qiyməti 20-30 manat arasındadır. Bu Onkoloji Klinikanın yazılmamış qanunlarından biridir. Həyatla ölüm arasında mücadilə edən xəstələrin bir günlük rahatlığını da satmaq məhz bizim səhiyyə sistemimizin “böyük uğurudur” . Bəs görəsən dövlət səhiyyə müəssisələrində müalicənin pulsuz olması haqqında president fərmanı nə üçündür?
Akademik Ə.Əmiraslanov 22 illik rektorluq fəaliyyətinin məntiqi nəticəsi bu günkü Azərbaycan səhiyyəsinin acınacaqlı vəziyyətidir. İnsanların sağlamlığına cavabdeh olan, gələcək həkimlərin rüşvətlə təhsil aldığı, imtahanverdiyi Tibb Universitetinin yarıtmaz fəaliyyəti nəticəsində ölkə səhiyyəsi can üstədir. Universitetdə pul gücünə təhsil alıb diplom qazanan, yenə də pulla təyinat əldə edərək müxtəlif xəstəxanalara yerləşən həkimlərin əsas məqsədi “mayasını çıxartmaqdır”.Bu gün ölkədə çoxlu sayda yeni, müasir tələblərə cavab verən, texniki təchizatı yüksək olan xəstəxanalar tikilib istifadəyə verilir. Amma, bu xəstəxanaların soyuq divarları savadlı, insaflı həkim nəfəsinə həsrətdir.
1992-ci ildən ATU rektoru, 1993-cü ildənATU-nin Onkologiya kafedrasının müdiri, 2007-ci ildən Universitetin Onkoloji Klinikasının direktoru, 2010-cu ildən Milli Məclisin deputatı olan akademik Ə.Əmiraslanovun yuxarıda sadaladıqlarımızdan aydın olur. Eyni vaxtda bir neçə mühüm postu əlində saxlayan akademikin bütün sahələrdə necə “fədakarlıqla” çalışdığının acı nəticələrini Azərbaycan səhiyyəsi və insanı hələ uzun illər yaşadacaqdır.
Saatlı-Sabirabad-Kürdəmir seçki dairəsinin seçiciləri də öz vəkillərinin üzünü seçkidən-seçkiyə görməyə alışıblar. Çünki, millət vəkilinin başı “onkoloji problemlərə” qarışdığından seçicilərinə vaxt ayıra bilmir.
Gözümüzün önündə Azərbaycan səhiyyəsinin gələcəyi metastaz vəziyyətindədir. Uzun illər bu sahəyə rəhbərlik edərək, öz qanunlarını həyata keçirən Ə.Əmiraslanov əslində Azərbaycanın tibbi təhsil sistemini “onkolji” vəziyyətə gətirmişdir. Kimsənin isə müalicəyə başlamaq niyyəti görünmür.
Məsələni diqqətimizdə saxlayacağıq və növbəti saylarımızda daha ətraflı məlumat verəcəyik.
Nicat Mahmudov