Ukrayna hökuməti ölkənin hava məkanını bütün növ hərbi təyyarələr üçün qapalı elan edib

gundemxeber.az saytı "Röyter"ə istinadən xəbər verir ki, bu qərarı Ukrayna prezidentinin səlahiyyətlərini icra edən Aleksandr Turçinov bu gün verib. Müvəqqəti prezident bəyan edib ki, Ukraynanın hava məkanı yalnız mülki təyyarələrə açıqdır. O, əlavə edib ki, ölkədəki bütün aeroportlar gücləndirilmiş mühafizə ilə təmin olunub və nəzarətə götürülüb.

16:26
Ukrayna Müdafiə Nazirliyi bu gün rəsmi bəyanatla çıxış edib.
Virtualaz.org saytı Ukrayna mətbuatına istinadən xəbər verir ki, bəyanatda deyilir: "Bəzi xarici KİV-lər ukraynalı hərbçilərinin guya Krım ərazisindəki hərbi hissələrini tərk etdikləri barədə məlumatlar yayıblar. Rəsmi olaraq bəyan edirik ki, yayılmış məlumatlar həqiqətəuyğun deyil və təxribat xarakterlidir. Ukrayna hərbçilərinin Ukrayna Hərbi Qüvvələrinin hərbi xidmətindən kütləvi şəkildə azad edilməsi də reallıqla üst-üstə düşmür".
Qeyd edək ki, Rusiya hərbçiləri Kerçdə hərbi hissəni mühasirəyə alıblar. Hərbi formada insanlar A-0669 hərbi hissəsinin ərazisini ələ keçiriblər. Hərbi hissənin qapılarının önündə Rusiya nömrəli "Ural" markalı yük maşınları dayanıb. Əsgərlərin isə Rusiya hərbi geyim formasında olduğu və rus dilində danışdıqları bildirilir.
A-0669 Hərbi Dəniz-Piyada Qoşununları hərbi hissəsinin komandiri Aleksey Nikiforov vəziyyətin nəzarətdə olduğunu və təlaşa ehtiyac olmadığını bildirib: "Hərbi hissənin ərazisində yad şəxs yoxdur. Şəxsi heyət rəhbərlikləri tapşırığı yerinə yetirməyə hazırdır. Komandirlər mənə məlumat verdi ki, batalyonun təslim olması barədə xəbərlər şayiədir, həqiqətəuyğun deyil".

15:26
Sevastopol yaxınlığında Rusiya desantının mühasirədə saxladığı Ukrayna hərbi bazasının komandiri əsgərlərinə “ölərik, ancaq ruslara təslim olmarıq” əmri verib.
Virtualaz.org saytı Ukrayna qaynaqlarına istinadən xəbər verir ki, Perevalnıy kəndində dislokasiya olunmuş 39-cu briqadanın komandirinə Rusiya “spesnaz”ı tərəfindən ultimatum verilib. Əgər saat yarım ərzində briqadanın şəxsi heyəti silahlarını təhvil verməsə və hərbi kazarmaları müqavimətsiz boşaltmasa, ruslar hücuma keçəcək.
Ukrayna ordusunun ehtiyatda olan zabiti Sergey Lanşin bildirib ki, o, bu dəqiqələrdə 39-cu briqadanın komandiri ilə danışıb.
“Komandir təslim olmamağı qərara alıb, əsgərlərinə ölənə qədər vuruşmaq əmri verib” - deyə o, bildirib.
S.Lanşin deyib ki, komandir onun vasitəsilə yerli və xarici KİV-lərə müraciət edərək tezliklə bazaya gəlməyi xahiş edir.
“Qoy onlar bu cinayəti öz gözləri ilə görsünlər” - deyə Lanşin komandirin adından bildirib.
Jurnalistlər xəbər verir ki, Perevalniy istiqamətində Rusiya desantının ikinci kalonu-15 “Ural” və bir neçə zirehli “Tiqr” maşını hərəkət dir.
Digər məlumata görə, Ukrayna Ali Radası ölkənin təhlükəsizliyinə qarant olan ölkələrə təcili kömək üçün müraciət edib. Ukraynadakı hadisələr getdikcə daha dramatik xarakter alır.
Daha bir məlumata görə, bu gün səhər tezdən Kiyevdə hərbi komissarlıqlar səfərbərlik başlandığını elan ediblər. Hərbi mükəlləfiyyətli bütün kişilər qeydə alınır.

14:54
Ukraynanın Milli Təhlükəsizlik və Müdafiə Şurasının (MTMŞ) təcili toplantısı keçirilib.
MTMŞ-nın toplantısında Ukrayna üçün önəmli qərarlar qəbul edilib. MTMŞ-nın katibi Andrey Parubiyin sözlərinə görə, həmin qərarlardan biri hələlik məxfi saxlanmaqdadır.
Digər qərarlara əsasən isə, Ukrayna ordusu tam şəkildə döyüşə hazır vəziyyətə gətirilib. Dünya dövlətlərinin diplomatik idarələrinə Ukraynanın Rusiya aqressiyasından müdafiə edilməsiylə bağlı müraciət ünvanlanıb.
Eyni zamanda Krım Muxtar Respublikasında vəziyyətin normallaşdırılması üçün MTMŞ-nin rəhbərliyinin təmsil olunduğu nümayəndə heyətinin formalaşdırılması qərarlaşdırırlıb.

13:23
Ukrayna mənbələrinin bu dəqiqələrdə yaydığı xəbərə görə Rusiyanın Krıma yeritdiyi desant qüvvələri Ukrayna ordusunun Sevastopoldakı hərbi hissəsinə hücuma keçib.
Rusiya desantçıları Ukrayna hərbi dəniz qüvvələrinin 39-cu xüsusi təyinatlı hissəsinə həmlə edir. Desantçılar hərbi hissəyə “KamAZ” maşınlarında gəliblər, maşınlardan biri hərbi hissənin nəzarət-buraxılış məntəqəsini dağıdaraq içəri keçib. Ukrayna ordusunun BTR-ləri hərbi hissəni müdafiə etmək üçün maşının qarşısını kəsib.
Rusiya desantı silah tətbiqi ilə hədələyir. Ukrayna ordusunun bir neçə zabiti əsir götürülüb, kazarmalardan birində yanğın başlayıb. Ruslar hərbi hissəni avtomatçılara mühasirəyə alıblar, atışma səsləri eşidilir. Lakin tərəflər hələlik bir-birlərinə yox, havaya atəş açırlar. Rusiya desantı hərbi hissənin ələ keçirilməsi barədə əmr aldıqlarını bildirir və tezliklə hücuma keçəcəkləri haqda xəbərdarlıq edir.
Rusiyanın Krımı işğal etdiyi və Ukraynanın qalan ərazilərinə qoşun yeritmək barədə qərar verdiyi bir vaxtda Qərb dövlətləri hələlik diplomatik təzyiqlər və bəyanatlarla kifayətlənirlər. ABŞ prezidenti Barak Obama martın 2-nə keçən gecə Rusiya prezidenti Vladimir Putinlə telefon danışığı aparıb və onu Ukraynaya hərbi müdaxiləni dayandırmağa çağırıb. Həmçinin ABŞ prezidenti bildirib ki, Rusiyanın hərəkətlərinə cavab olaraq “Böyük səkkizlər”in bu ilin iyun ayında Soçidə keçiriləcək sammitinə hazırlığı dayandırır.
Kanadanın baş naziri Steven Harper də ölkəsinin Rusiyada keçiriləcək “Böyük səkkizlər”in sammitinə hazırlığı dayandırdığını və Moskvadakı səfirini geri çağırdığını elan edib.
ABŞ dövlət katibi Con Kerri növbəti bəyanatla çıxış edərək deyib ki, Rusiyanın Ukraynaya qarşı hərbi əməliyyatları regionda gərginliyi artıracaq və Vaşinqtonla Moskva arasında münasibətləri korlayacaq. Con Kerri ABŞ-ın qlobal tərəfdaşları ilə təcili telekonfrans keçirdiyini və “sonrakı addımları” müzakirə etdiyini deyib. Dövlət katibi Ukraynaya kömək ediləcəyini bildirib, lakin köməyin nədən ibarət olacağını açıqlamayıb.
Ukrayna hərbi komissarlıqları isə ehtiyatda olan hərbi qulluqçulara təcili çağırış vərəqəsi göndərib. Bu qərar ölkədə ümumi səfərbərliyin elan edilməsinə hazırlıqla bağlıdır. Bu dəqiqələrdə Ukrayna Ali Radası ölkədə yaranmış vəziyyəti qapalı iclasında müzakirə edir. Gözlənilir ki, Rusiyanın hərbi təcavüzü il bağlı ölkədə ümumi səfərbərlik və fövqəladə vəziyyət elan ediləcək.
Ukraynanın yeni baş naziri Arseni Yasenyuk isə bildirib ki, şənbə günü axşam ona Rusiyanın baş naziri Dmitri Medvedyev zəng edib və Ukraynaya hərbi müdaxilə qərarının olmadığını, yalnız belə ehtimalın mövcudluğunu deyib. Yasenyuk deyib ki, telefon danışığı zamanı Rusiya qoşunlarının Krımdan çəkilməsini tələb edib.
“Biz suverenliyimizi qorumağa hazırıq. Əgər Rusiya hərbi müdaxiləyə başlasa bu, iki ölkə arasında müharibəyə və bütün münasibətlərin kəsilməsinə səbəb olacaq” - deyə Yasenyuk bildirib.