Ölkədə problemlər bitmək bilmir

Övlad toyu hər bir valideynin arzusudur. Bu səbəbdən hər ata-ana övladının toyunun yaddaqalan olmasını arzulayır. Bakıda şadlıq evləri, restoranlar çoxdur. Bəzən bu çoxluq içində seçim etməkdə valideynlər çətinlik çəkilər. Qonaqların narazı getməməsi üçün: “Hansı şadlıq evi və ya restoranı seçim?” fikri də düşündürən suallar arasındadır. Mən də sizlərə bir toy məkanı haqqında söhbət açmaq istəyirəm – “Monolit Plaza”.
Dördulduzlu otel olan “Monolit Plaza”. Bu məkanın kiməməxsus olması hamıya bəllidir. Odur ki, həmin mötəbər şəxsin adına uyğun olaraq buranın fərqli bir məkan olması, xidmətlərin dördulduzlu otel səviyyəsində ola biləcəyi fikri bir çox ziyalıları övlad toyu etmək üçün bura gətirib çıxarır. Bir məqamı da qeyd edək ki, “Monolit Plaza”nın administratoru Qoşqar bəyin də professionallığı, özünün də qeyd etdiyi kimi “Moskva” mehmanxanası kimi mötəbər bir məkanın administratoru olması bura gələnlərin diqqətini cəlb edir. Lakin, əfsuslar olsun ki, bütün bunlar zahiri görünüşdür. Əslində isə dördulduzlu “Monolit Plaza” otelində toy reklamını nəzərdən keçirək. Yəqin ki, telekanallarda bu məkandan keçirilən toy reklamını sizlər də görmüsünüz. Elə administrator Qoşqar bəy də öz şirin dili ilə həmin reklamı müştərilərə təkrarlayır.

Müğənni hoqqabazlığı
Qeyd edək ki, “Monolit Plaza”da toy şənliklərini iki müğənni idarə edir. Bundan əlavə Rüfət Axundov, Beybut Kərimov, İlqar Xəyal, Səidə Dadaşova, Elariz, Vüqar Muradovun da adları təbrik edən müğənnilər sırasındadır. Yəni bəy-gəlin bu müğənnilər arasından birini seçir və restoran bəylə gəlinə onların ifasını hədiyyə edir. Amma araşdırmalarımız zamanı maraqlı faktlar üzə çıxdı. Belə ki, Rüfət Axundovun adı siyahıda olsa da, müğənninin bundan xəbəri belə yoxdur. Bu azmış kimi bəy-gəlini yalandan əmin edirlər ki, Rüfət Axundov mütləq gələcək. Elə ki, işin üstü açılır, o zaman Qoşqar bəy İlqar Xəyalın toy məclisində iştirak edəcəyini vəd edir. Amma toy zamanı İlqar Xəyalın yerinə Vüqar Muradovun ora təşrifi bəylə gəlinə həqiqətən də sürpriz olur, özü də qanlarını qaraldan sürpriz.
“Monolit Plaza”da keçirilən toy məclisini oranın iki müğənnisi aparır. Onlardan biri gələn qonaqların zövqünə və səviyyəsinə uyğun mahnılar ifa edən Kifayət xanım, digəri isə dördulduzlu oteldə keçirilən toyu palatka toyu səviyyəsinə endirən “Qarabala çaykovski” kimi aşağı səviyyəli mahnıları ifa edən Kamran Musa oğlu. Kamran Musaoğlunun əlindən mikrafonu aldırmaq üçün toy sahibləri dəridən-qabıqdan çıxırlar.
Əlqərəz, “Monolit Plaza”dakı sərgüzəştlər bütün bunlarla bitmir. Belə ki, hamıya bəllidir ki, bütün toylarda bəylə gəlinin körpəliyindən tanış olmalarından olan bütün hadisələr “Love store” şəklində gələn qonaqlara çatdırılır. Amma “Monolit Plaza”da toy zamanı məlum olur ki, restoranda təqdim etmək üçün aparatura yoxdur. Toy sahibinin səs-küyündən sonra aparatura gətirilir, lakin çox keyfiyyətsiz şəkildə, qüsurlarla qonaqlara təqdim olunur. Bu rəzaləti də məclis sahibləri ilə bəy-gəlin sinəyə çəkirlər. Amma...

Fotoşəkil fırıldağı
Hər kəs istəyir ki, iştirak etdiyi xeyir məclisində şəkil çəkdirsin, kollektiv şəkildə, həm də bəy-gəlinlə şəkilləri olsun. O da bu fotonu iştirak etdiyi toy məclisindən xatirə kimi özündə saxlasın. Adi fotostudiyada 20-30 qəpiyə başa gələn fotolar, bütün şadlıq evlərində olduğu kimi “Monolit Plaza”da 2 manata başa gəlir. Yaxşı, buna sözüm yox. Hər kəs qiyməti bilib şəkil çəkdirir. Bəs bu qiymətə olan şəkillərin keyfiyyəti necədir? Restoran rəhbərliyi bəhbəhlə üzə çıxartdığı fotoqrafların şəkillərin keyfiyyətindən əcəba xəbərdardırlarmı? Sarılıq xəstəliyinə tutulmuş kimi saralmış şəkillərin qeyri-professionallar tərəfindən çəkildiyi dərhal sezilir. Araşıdırmalar zamanı məlum oldu ki, restoran rəhbərliyi bu keyfiyyətsiz şəkilləri çəkən fotoqrafa çox cüzi pul verir. Əsas məbləğ də restoran rəhbərliyinə qalır.
Əslində “Monolit Plaza”da fotoqrafların özləri də üzlükləri ilə seçilirlər. Belə ki, onlar toyda iştirak edən qonaqlara israrla xatirə fotosu çəkdirmələrini bildirir. Ətrafındakı insanlar qarşısında çıxılmaz vəziyyətə düşmək istəməyənlər isə asanlıqla fotoqrafların “ovuna” çevrilirlər.

Şirin çay pulu və “bacarıqlı” ofesiantlar
Sən demə bütün restoranlardan fərqli olaraq, “Monolit Plaza”da şirin çay adəti var. Belə ki, bəyin və gəlinin anasına restoran rəhbərliyi ofesiantlarla şirin çay göndərir. Ofesiant da çayı gətirərək analara verir. Analar çayı içib qurtardıqda: “Bəs şirinlik?” deyərək ən azı 20 manat alırlar. Mən hələ adı çəkilən restoranın “kokteyl” əməliyyatından danışmıram. Belə ki, bəylə-gəlinə restoran rəhbərliyi pulsuz olaraq kokteyl təqdim etməlidir. Amma bu kokteyllər bəylə-gəlinə verilmir. Əksinə, gələn qonaqlara zorla sırınır və əvəzində pul alınır. Heç kim kokteyl sifariş verməsə də, ofesiant kokteyli gətirir və əvəzində pul alır.
Bundan başqa “Monolit Plaza”da ofesiantların qulluğu da çox aşağıdır. Belə ki, başları pul qazanmağa qarışan ofesiantlar çox aşağı səviyyədə qonaqlara qulluq edir, adi su içmək istəyənlərə suyu candərdi, minnətlə verirlər. Qeyd etmək yerinə düşər ki, buranın ofesiantları da administratorları Qoşqar bəy kimi pul qazanmağın yollarını gözəl bilirlər. Əfsuslar olsun ki, başları pul qazanmağın yollarının icadına qarışan ofesiantların “Monolit Plaza”dakı fəaliyyətləri ən aşağı səviyyədə olan şadlıq evlərinin ofesiantlarından da qat-qat aşağıdır.

“Çalğıçı yeməyi” fırıldağı
Heç bir restoranda olmayan bir fırıldaq da “Monolit Plaza”da dəb halını alıb. Belə ki, toyu danışmağa gələn toy sahiblərinə Qoşqar bəy toyun sonunda çalğıçıların yemək masalarının pulunu tamlığı ilə ödəyəcəklərini demir. Toyun sonunda isə o, toy sahibindən 12 nəfərlik süfrənin pulunu qəpiyindək tələb edir. Bu azmış kimi, bunu o qədər üzlülüklə edir ki, ev sahibi utanaraq pulu ödəyir.
Qeyd edək ki, “Monolit Plaza”dakı rəzalətlər təkcə toylarla bitmir. Belə ki, Hüseyn Cavidin 130 illiyinə həsr olunmuş beynəlxalq elmi konfrans keçirilən zaman qonaqlar burada yerləşdirilmişdi. Ölkə prezidentinin sərəncamı ilə keçirilən bu tədbirə xarici ölkədən də çoxsaylı qonaqlar gəlmişdi. Konfrans iştirakçısı, Almaniyada yaşayan Almaniyadakı “Muğam” Mədəniyyət Mərkəzinin direktoru Abdulkadir İnaltekin “Monolit Plaza”nın dördulduzlu otel səviyyəsindən çox aşağı olduğunu söyləmiş, otel rəhbərliyinin bir günün pulunu qanunsuz olaraq onlardan almasından, konfrans zamanı çayın belə qonaqlara pulla satılmasından gileylənmişdir. O, “Monolit Plaza”da özbaşınalığın hökm sürdüyünü qeyd etmişdir.
Aldığımız digər məlumat isə daha maraqlıdır. Belə ki, “Təzadlar” qəzeti adı çəkilən məkanda tədbir keçirmək istəmişdir. Hətta, qonaqlar üçün xüsusi dəvətnamələr də qəzet rəhbəliyinə təqdim edilmişdi. Lakin sonradan gələn qonaqlar arasında müxalifət liderlərinin də olduğunu sbilə otel rəhbərliyi “Təzadlar”ın burada tədbir keçirməsinə icazə verilməmişdir.
Sizləri bilmirəm, amma heç kimə “Monolit Plaza”da toy etməsini məsləhət bilmirik. Ən azı gələn qonaqlar arasında başınız aşağı olmasın. Dördulduzlu otelin restoranının administratoru Qaşqar bəyin də şirin vədlərinə aldanmayın. Elə buranın kimə məxsus olması da sizləri aldatmasın. Amma əslində Qoşqar bəyin otelin sahibinə və onun adına ehtiramı olsaydı, burada keçirilən toy şənlikləri belə vəziyyətdə olmazdı. Çünki...
Cəfər