Akif Muradverdiyevə görə təhvil-təslim aparan yoxdur

Elnur Aslanova görə isə SAM-ın da işi iflic olub

Elnur Aslanov Siyasi təhlil və informasiya təminatı şöbəsinin müdirliyindən çıxarılandan sonra Azərbaycanın "Ağ Ev”ində - Prezident Administrasiyasında boşalan yüksək vəzifələrin sayı ikiyə çatıb. Hazırda Administrasiyada iki vakant vəzifə də var. Bunlardan biri 9 ildir heç kimin təyin olunmadığı Azərbaycan Respublikası Prezidentinin işlər idarəsindəki prezidentin işlər müdiri vəzifəsidir. Prezidentin işlər müdirinə aid bəzi məsələləri, o cümlədən vətəndaşların qəbulunu 9 ildir Prezidentin İşlər müdirinin birinci müavini həyata keçirir.
Prezidentin işlər müdiri vəzifəsi 2005-ci ildən boşalıb. Belə ki, Prezidentinin işlər idarəsinin sabiq müdiri Akif Muradverdiyev 2005-ci ilin oktyabr ayında həbs olunduğuna görə, həmin vaxt ölkə başçısının müvafiq sərəncamı ilə tutduğu vəzifədən kənarlaşdırılıb. Sonradan bu vəzifəyə yeni təyinat gerçəkləşdirilməyib.
2014-cü il martın 17-də Prezident İlham Əliyev Elnur Aslanovun Azərbaycan Respublikası Prezidentinin Administrasiyasının Siyasi təhlil və informasiya təminatı şöbəsinin müdiri vəzifəsindən azad edilməsi haqqında sərəncam imzalayıb. Hələ ki bu posta da təyinat olmayıb.
Yeri gəlmişkən, bir neçə gün öncə bəzi KİV-lər Elnur Aslanov işdən çıxarılandan sonra Siyasi təhlil və informasiya təminatı şöbəsinin İctimai-siyasi məsələlər şöbəsinə birləşdirildiyi barədə məlumat yaysalar da, bu, təsdiqlənməyib. Belə ki, Prezidentinin Administrasiyasının saytında hər iki vəzifə hazırda ayrı-ayrılıqda göstərilir. Həm də saytda Siyasi təhlil və informasiya təminatı şöbəsinin müdiri vəzifəsi vakant olaraq qeyd edilib.
Yaxın günlərdə bu postlara kimlərin təyin ediləcəyini iddia etmək kifayət qədər çətindir. Hakimiyyətdəki mənbələrdən daxil olan informasiyalara əsasən, PA-da İşlər İdarəsi kifayət qədər strateji bir post olduğundan onun uzun müddət rəhbərsiz qalması müəyyən çətinliklər yaradır. Administrasiyanın bu strateji postunun səlahiyyətlərinin bir qismi hələlik PA rəhbəri Ramiz Mehdiyevin bir qədər əvvəl təyin olunan müavinləri arasında bölüşdürülüb. Lakin bütövlükdə idarənin fəaliyyəti ilə bağlı olaraq müəmmalar qalmaqdadır. Məlumatlara əsasən, İşlər İdarəsinin boş qalmasına səbəb sabiq rəis Akif Muradverdiyevin burada işlədiyi zamanlar ciddi nöqsanlara yol verməsi olub. İndi İşlər İdarəsinin təhvil-təsliminin həyata keçirilməsi də bu baxımdan kifayət qədər çətinə düşüb. Gələn xəbərlərdə hələlik kimsə bu bataqlığa girmək istəmir. Lakin, Elnur Aslanovun rəhbərlik etdiyi strateji postun gündəlik siyasi təhlil və strateji araşdırmalar aparması lazım gəlir. Məlumatlara görə, E.Aslanovun yerinə təyinatın yaxın günlərdə veriləcəyi gözləniləndir. Çünki faktiki olaraq Elnur Aslanovun işdən çıxarılmasından sonra Strateji Araşdırmalar Mərkəzinin də fəaliyyətində ciddi axsamalar müşahidə edilməkdədir. Faktiki olaraq SAM fəaliyyətsiz vəziyyətə düşüb. Qurumun rəsmi saytı fəaliyyətini dayandırıb. E.Aslanovun bir zamanlar rəhbəri olduğu şöbənin birbaşa və gündəlik cari təhlillərlə təmin edən bu qurumun da işini qaydaya salmaq üçün yeni təyinatın vaxtının çox uzanmayacağı gözləniləndir.
Eldar QASIMOV