PA rəhbərinə yeni müavinlərin təyin olunması nəyə hesablanıb, «boz kardinal» yola salınır?

Məlum olduğu kimi ölkə prezidenti İlham Əliyevin sərəncamı ilə Azərbaycan Respublikası Prezident Administrasiyasının rəhbəri Ramiz Mehdiyevə üç müavin ştatı müəyyənləşib. Bununla bağlı verilən rəsmi məlumatda deyilir ki, administrasiya rəhbərinin İcra hakimiyyəti orqanları ilə iş üzrə müavini postuna Zeynal Nağdəliyev, iqtisadi məsələlər üzrə müavini vəzifəsinə Əli Əsədov, beynəlxalq məsələlər üzrə müavini postuna isə Novruz Məmmədov təyin olunublar. Bu təyinatların əslində nəyə hesablanması mövzusuna bir qədər sonra qayıdacağıq, hələliksə maraq doğuran digər nüanslara diqqət yetirək.
Qeyd edək ki, Azərbaycanda «Ağ Ev» adlandırılan Prezident Administrasiyası 2009-cu ildə ölkədə keçirilmiş referendumdan sonra yaradılıb. Buna qədər isə qurum uzun müddət Prezident Aparatı adlanıb. Artıq kimsəyə sirr deyil ki, bu struktur hər zaman Ramiz Mehdiyevin nəzarəti altında olub və PA rəhbərinin bu «qalası» neçə illərdir ki, alınmaz olaraq qalırdı. Bununla bağlı maraqlı faktlardan biri isə odur ki, PA-da uzun müddətdir bir vakant vəzifə qalır. Bu Azərbaycan Respublikası Prezidentinin işlər idarəsindəki prezidentin işlər müdiri vəzifəsidir. Administrasiyadakı prezidentin işlər müdiri vəzifəsi düz 7 ilə yaxındır boşdur. Prezidentin işlər müdirinə aid bəzi məsələləri, o cümlədən vətəndaşların qəbulunu Prezidentin İşlər müdirinin birinci müavini həyata keçirir. Xatırladaq ki, prezidentin işlər müdiri vəzifəsi 2005-ci ildən boşalıb. Prezidentinin işlər idarəsinin sabiq müdiri Akif Muradverdiyev 2005-ci ilin oktyabr ayında həbs olunduğuna görə, həmin vaxt o, ölkə başçısının müvafiq sərəncamı ilə tutduğu vəzifədən kənarlaşdırılıb. Sonradan bu vəzifəyə yeni təyinat gerçəkləşdirilməyib.
Əldə etdiyimiz özəl məlumatda isə bildirilir ki, adıçəkilən posta kiminsə təyinatının qarşısını uzun illərdir ki, R.Mehdiyevin özü əngəlləyir. Belə ki, öz adamını bu posta təyin etdirə bilməyən R.Mehdiyev bunun qarşılığında kiminsə də bura gətirilməsini əngəlləyirdi. Amma noyabrın 30-da ökə başçısının imzaladığı sərəncamlarla Prezident Administrasiyası rəhbərinin müavini vəzifəsinin təsis edilməsi bu istiqamətdə atılmış ilkin addımlardan sayıla bilər.Maraq doğuran digər amil isə, onların əvvəlki vəzifələrindən azad olunmasına dair sərəncamın imzalanmamasıdır. İndi dəqiq məlum deyil, Novruz Məmmədov, Zeynal Nağdəliyev və Əli Əsədov həm də əvvəlki vəzifələrini də aparacaqlar, ya yox. Yəqin ki, ya yeni sərəncamlar imzalanacaq, ya da bunun açıqlaması olacaq. İndi isə yeni təyinatların alt qatında yatan qaranlıqlara işıq salmağa çalışaq.
Bir çox ekpertlər bu addımın R.Mehdiyevin siyasi cəhətdən gücdən salınmasına hesablandığını iddia edirlər və baş verənlərin təhlili də belə düşünməyə əsas verir. PA rəhbərinin müavini kimi təsdiqlənmiş üç şəxsdən ikisi-Əli Əsədov və Zeynal Nağdəliyev birmənalı olaraq Mehdiyev qruplaşmasının qatı əleyhdarları kimi tanınır. Üçüncü müavin-Novruz Məmmədova gəlincə isə onun R.Mehdiyevə yaxın şəxs olduğu bildirilsə də əldə etdiyimiz informasiyalar bunun heç də belə olmadığını təsdiqləyir. Novruz Məmmədovun uzun müddət Mehdiyev qruplaşmasına aid olduğunu etiraf edən mənbəmiz onun son proseslərdə əks qütbdə yer aldığını iddia edir. Göründüyü kimi, hətta Novruz Məmmədov faktoru bir kənara qoyulsa belə yeni müavinlərin R.Mehdiyevə başağrı olacağını düşünmək olar. Bütün bunlar isə Mehdiyevə qarşı aparılan hücum kampaniyasının pik nöqtəsi də adlandırıla bilər.
İlk əvvəl fəaliyyəti dayandırılmış Azərbaycan Beynəlxalq Universitetinin (ABU) rektoru Elşad Abdullayev Gülər Əhmədova ilə itkin düşmüş qardaşının tapılması və deputat mandatı alması ilə bağlı apardığı separat danışıqların gizli videoçəkilişlərini yaydı. Nəticədə mandatı əlindən alınan Gülər Əhmədovaya qarşı bir basqı düzənləndi. Əslində ittihamın əsas hədəfi olan, yəni bu separat siyasi bazarlığın üstündə dayanan Prezident Administrasiyasının rəhbəri Ramiz Mehdiyev idi. Mehdiyev və onun çevrəsi məlum olayda nə qədər ehtiyatlı oynamağa çalışsa da, artıq hakimiyyət daxilindəki uçurum mahiyyətli parçalanmanın gizlədilməsi qeyri-mümkün idi. Bəli, hakimiyyət bu videoçəkilişin yayımı ilə parçalanaraq iç savaşa meydan oldu. Bunun ardından isə Parisdən başlanan əməliyata, Moskvadan reaksiyalar verilməyə başladı.
Söhbət təbii ki, «Oliqarxların təşkilatı» kimi tanınan Rusiya Azərbaycan Təşkilatları İttifaqından gedir. Kimlər üçünsə sadə görünən bu məsələ əslində Kremlin növbəti tryuku idi. rəsmi Moskva bu yolla Ramiz Mehdiyevdən də betər «Ramiz Mehdiyevinin» olduğunu Azərbaycan iqtidarının diqqətinə çatdırmış oldu. Gələn siqnal belə idi ki, əgər rəsmi Bakı 2013-cü il prezident seçkiləri dönəmində Ramiz Mehdiyevin timsalında rusiya qanadından imtina etmiş olarsa, o zaman Azərbaycanda təlatümlü olaylar baş qaldıracaq. Bunun ardınca isə Azərbaycan Dövlətçiliyi Naminə Demokratik Talış Təşkilatı yaradıldı. Və hər kəs fərqində idi ki, artıq Rusiya Ramiz Mehdiyevin sıradan çıxarılmasının Azərbaycana nəyə mail olacağını net şəkildə ortaya qoymaqda idi. Paralel olaraq isə Kreml artıq oyuncağa çevirdiyi «oliqarxların təşkilatının» fəaliyyəti ilə Qarabağ problemi müstəvisində Azərbaycanın sinirləri ilə oynamağa başladı. Amma bir daha vurğulayırıq ki, olduqca xəfif tərzdə cərəyan edən bu prosesdə həddsiz ehtiyatlılıq aşkar surətdə hiss olunandır ki, bu da təbii olaraq Kremlin Azərbaycanda seçkiqabağı dönəmdə yaşanılan proseslərə verdiyi reaksiyanın nəticəsi kimi qəbul olunmalıdır.
Amma görünən odur ki, Azərbaycan hakimiyyəti də Kremldən çəkinmədiyini nümayiş etdirməkdə qərarlıdır. Hər halda R.Mehdiyevə üç müavin təyin etməklə onu mühasirəyə almaq niiyətini ortaya qoyan hakimiyyət sahibi iddiasından geri çəkilməyəcəyini sərgiləmiş oldu.

Azər Talıbov