Nurçu qalmaqalına görə “vurulan” sabiq məmurun informasiya saytlarının əlindən
alınmasının sensasion tərəfləri üzə çıxıb; eks şöbə müdirinin portalları kimə verildi,
“Vikiliks” zəlzələsinin təkanları indi hiss olunmağa başlayır, növbəti istefa dalğası hazırlanır

Elnur Aslanovun media hökmranlığına da son qoyuldu. Bayram günləri qara gələn sabiq məmurun əlində olan media imkanları əl dəyişdi. Mətbuat bu haqda ümumi xəbər yazsa da, təfərrüatlarını araşdırmayıb. Yenicə məlum olub ki, Elnur Aslanovla haqq-hesab çürüdülüb və onun kurasiyasında olan media orqanları başqa məmurun nəzarətinə keçib.
Hərçənd ki, həmin saytların redaktorları E.Aslanovla əlaqələrinin olmasını təkzib ediblər. Ancaq reallıq başqa mətləbdən xəbər verir. Hətta rəsmi qaydada bu məsələ təsdiqlənib.
Prezidentinin Administrasiyasının İctimai-siyasi məsələlər şöbəsinin müdiri Əli Həsənov deyib ki, bundan sonra həmin saytların nəzarəti ona həvalə olunsa, o bu nəzarəti həyata keçirəcək: “Prezident Administrasiyasının rəsmisi kimi biz özəl saytların fəaliyyətinə nəzarət edə bilmərik, çünki hər bir internet portalının öz iş mexanizmi var.
Biz isə yalnız dövlət sayt və kütləvi informasiya vasitələrində gedən materiallara nəzarət edirik. Elnur Aslanovun saytları mənə verilsə, bundan sonra bu saytlara mən nəzarət edəcəm. Əlavə şərhə ehtiyac yoxdu”.
Ə.Həsənovun açıqlaması kifayət edir ki, E.Aslanovun saytlarının əldən çıxdığını deməyə əsaslanasan. Ancaq etibarlı mənbədən verilən xəbərdə söylənir ki, hələlik saytlara nəzarət PA sözçüsünə keçməyib. Amma sabiq məmurun əlindən alınıb PA-da daha qüdrətli məmura həvalə olunduğu iddia olunur.
“Artıq saytlar əl dəyişib. Ola bilsin ki, həmin saytlarda kadr islahatları getsin. Yeni redaktorların təyinatı gözlənilir.
Ona görə də apreldə dəyişikliklər baş verə bilər. Elnur Aslanov saytlarda söz sahibliyini itirib. Onun gözdən salınması prosesi o dərəcədə sürətli gedib ki, artıq biznesinin də çökdürülməsi istisna olunmur. Hazırda PA dəhlizlərində bəzi məmurlar bayram edir. Onlar Aslanovun sıradan çıxarılmasına sevinirlər. Əli Həsənovun açıqlaması da buna bir nümunədir ki, rəqiblərinə gücü çatmadı.
Deyilirdi ki, keçmiş şöbə müdirinin nəzarətində olan rusdilli 1news.az saytı və “Baku Post” qəzeti rəhbərlik üçün “Trend” informasiya agentliyinin rəhbəri İlqar Hüseynova veriləcək. Bütövlükdə isə eks şöbə müdirinin kurasiyasında olan bütün mətbuat orqanlarına Əli Həsənov nəzarət edəcək. Amma bu iddialar özünü tam doğrultmayıb,”-deyə mənbə xəbər verir.
Onun sözlərinə görə, E.Aslanovun media hökmranlığına son qoyulana qədər bir neçə saytının olması haqda xəbəri gizlədirdi. Eks-məmur gözə girməməyə çalışırdı. Ancaq istefaya göndərilməsinin ardınca mediada kapitan olduğu üzə çıxıb. Mənbə bildirir ki, E.Aslanov saytları təhvil verib və tərk-silah edilib.
“Elnur Aslanov haqda kompromat toplanır. Onu cəzalandıra bilərlər. Hətta Hafiz Hacıyev kimi adamı qabağa veriblər. Adətə hökumət Putin kimi Jirinovskini qabağa verir, Hafiz Hacıyevin dilindən fikirlər səslənir, sonra iş başlanır. Elçibəyin zəhərlənməsi haqda cinayət işi də belə açılmışdı. Hafiz Hacıyev deyib ki, Elnur Aslanov Azərbaycan dövlətçiliyinə işləmir, onun ideyaları, məramları başqadır,”-deyə qaynağımız şərh edir.
H.Hacıyev deyib ki, bu şəbəkənin nümayəndələri təkcə Elnur Aslanov deyil, başqaları da var. Onun sözlərinə görə, həmin adamlar bu gün də Azərbaycan dövlətçiliyinə zərbə vurmağa hazırdırlar.
Mənbə iddia edir ki, E.Aslanovu hədələyib, yerinə oturtmaq istəyirlər. Ümumiyyətlə, istefasından sonra susmağa üstünlük verən gənc məmur artıq gedişatı gözləyir.
Onun cəzalanmasını istəyən PA-da bəzi qüvvələr var. Ancaq buna qarşı çıxanlar da az deyil. Bununla belə, informasiya müharibəsində uduzan E.Aslanov saytlarını təhvil-təslim edib. PA-da olan məmurlardan hansının bu saytlara kuratorluq edəcəyi bilinmir: “Elnuru himayə edən qüvvələr, nurçular onu müdafiə edə bilmirlər. Prezident bir başa işə qarışıb. Bundan kimsə dinə bilməzdi. Cəmiyyətdə fikir yayılıb ki, Elnur Aslanov nurçu olduğu üçün vəzifəsindən azad edilib. Əgər doğrudan da belədirsə, o zaman nə üçün illər öncə deyil, indi vəzifədən azad etdilər. Onun nurçu olması barəsində mətbuatda dəfələrlə yazılar dərc edilib. Hər kəs də bilirdi ki, həmin şəxs nurçudur. Onun vəzifədən azad edilməsi dövlət daxilində bəzi irimiqyaslı məsələlərlə bağlıdır. Ümumiyyətlə, bu kimi şəxslər hakimiyyət daxilində çox kiçik əhəmiyyətli insanlardır. Elnur Aslanovun vəzifədən azad edilməsi daha böyük şəxslərin işdən çıxarılması üzrə gedən hazırlıqdır. Bunu analitiklər də açıqlayıblar. Deməli, qarşıda maraqlı proseslər gedəcək”.
Qeyd edək ki, pezident İlham Əliyevin sərəncamı ilə vəzifəsindən azad olunmuş Prezident Administrasiyasının şöbə müdiri Elnur Aslanovun nəzarətində olan bütün saytlar əlindən alınıb. Xatırladaq ki, Elnur Aslanov ölkə mətbuatında Fətullah Gülənin rəhbərlik etdiyi “Hizmət” hərəkatı ilə yaxınlıqda ittiham edilirdi. Qeyd edək ki, Elnur Aslanovun «Gülənçi»lərlə sıx əlaqələrinə dair məxfi sənədlər hələ 2011-ci ildə məşhur “WikiLeaks” qalmaqalında da yayılmışdı.
Belə ki, saytda ABŞ-ın ölkəmizdəki səfirliyinin müvəqqəti işlər vəkili olmuş Donald Lunun Vaşinqtona ünvanladığı məxfi teleqramında Elnur Aslanovun daha çox “Nurçular” dini təriqətinin lideri Fətullah Gülənə bağlılığı ilə tanınan “Çağ Öyrətim” təhsil şəbəkəsinin rəsmiləri ilə yaxın olduğu yazılıb.
R.QARA