Anar Məmmədovun nurçularla əlaqələri və onları
maliyyələşdirməsi ilə bağlı ittihamlar səsləndirilir

Məmur övladları, onların dəbdəbəli həyat tərzi zaman-zaman medianın diqqət mərkəzində olub. Xüsusilə, son dövrlərdə sosial şəbəkələrdə vəzifə sahiblərinin övladları öz bahalı avtomobilərinin, zinət əşyalarının, dünyanın məhşur istirahət zonalarında təşkil etdikləri əyləncələrin fotoşəkillərini paylaşmaqla yenidən diqqət mərkəzinə gəliblər. Ümumiyyətlə, cəmiyyətdə kifayət qədər müzakirə obyekti olan məmurların övladları bir çox hallarda onların “baş bəlasına” çevrilməklə ataları üçün əlavə problemlər yaradırlar. Bu məsələ artıq bir neçə dəfə prezident səviyyəsində belə müzakirə olunub, hakim komandada təmsil olunan vəzifə sahiblərinə ciddi xəbərdarlıqlar edilib. Milli Bankın sədri Elman Rüstəmovun, Xüsusi Dövlət Mühafizə Xidmətinin rəisi Vaqif Axundovun, Prezident Aparatında mühüm postun sahibi Nazim İbrahimovun, bir çox millət vəkillərinin övladları məmur maaşına uyğun gəlməyən zənginliklərini sosial şəbəkələrdə paylaşmaqla atalarını gündəmdə saxlamağa müvəffəq olublar. Hətta ərköyün balalarının güdazına gedən məmurlar da var. Məhşur İsmayıllı qiyamının başlanmasına səbəb olan Ələkbərov qardaşlarının övladlarının cəzasını ataları-İsmayıllının icra başçısı Nizami Ələkbərov və Əmək və Əhalinin Sosial Müdafiəsi naziri Füzuli Ələkbərov çəkdilər. Balalarının ərköyünlüyü hər iki qardaşın vəzifəsini itirməsi ilə nəticələndi. Elə bu günlərdə daha bir məmur övladının güdazına getdi. Xalq artisti, görkəmli tarzən Ağasəlim Abdullayevin ailə faciəsinə səbəb olan, bahalı “Mercedes-Benz-G 55” avtomobili ilə sərxoş vəziyyətdə qəza törədərək iki nəfərin ölümünə səbəkarlıq edən Xaliq Mədətovun atası da övladının ərköyünlüyünün cəzsını çəkdi. “Azərbaycan Xəzər Dəniz Gəmiçiliyi” QSC-nin sədr müavini Mübariz Mədətov da vəzifəsi ilə vidalaşmalı oldu. Biznesmen-deputat kimi tanınan, həm də Qaçqınkomun keçmiş məmuru olmuş Ayaz Orucovun oğlu da atasının karyerasına öz töhfəsini verib. “Gelandewagen” avtomobili ilə şəhərin mərkəzində içərisində iki qadının olduğu maşını gülləbaran etməklə adını “ərköyünlər” siyahısına yazdıran deputat oğlu deyilənə görə hələ də cəzasız gəzməkdədir. Digər bir deputat Elton Məmmədovun oğlu Aynar isə son model BMW-sini Zığ şosesində saatda 240 kilometr sürməsinin zövqünü İnstaqramda bütün xalqımızla paylaşmışdı.
Artıq bu ərköyün məmur balalarının əməlləri təkcə valideyinləri üçün yox, bütün ölkə üçün əməlli başlı problemə çevrilib. Xalqın ağır sosial şəraitdə yaşamasına rəğmən əfsanəvi zənginlik dünyasında yaşayan məmur balaları bütün əndazələri aşıblar. Demək olar ki, hər gün müxtəlif problemlər səbəbindən intihar halları ölkədə adi hal alıb. İnsanlar onların düşdüyü çətin vəziyyətə biganəlik göstərən məmurların haqsızlıqlarından bezərək canlarına qıyırlar. Xalqın böyük qismi banklardan asılı vəziyyətə düşərək borc içərisində üzür. Amma, bunun qarşılığında illərdir vəzifə kürsüsündə feodallaşmış məmurların balaları atalarının hesabına xalqı aşağılayır, həqarət edirlər. Xalq bunların atalarından çəkdikləri azmış kimi, indi də balalarının nazını çəkməyə məcbur olub. Görəsən, qiyməti yüz minlərlə ölçülən avtomobilləri, brend malları bu ərköyünlərə ataları quru maaşlamı alıblar? Əhalinin mütləq əksəriyyəti ölkə xəstəxanalarında müalicə olunmağa pul tapmayıb İran xəstəxanalarına üz tutduğu halda bu balalar hansı vəsaitlə dünyanın ən bahalı kurortlarında, restoranlarında kef çəkirlər? Məgər bu vətən səngərlərdə düşmənlə üz-üzə duran, şəhid olan kasıb balalarınındırmı? İndiyə qədər hansı məmur balası hərbi xidmətə gedib, yaxud cəbhə bölgəsində xidmət edib? Olmazmı ki, dövlətin səfasını çəkənlər bir az da zəhmət çəkib cəfasını çəksinlər!

Lakin, ölkə başçısının dəfələrlə sərt xəbərdarlıqlarına baxmayaraq görünən odur ki, bu ərköyün balaları durdurmaq mümkün deyil. Atalarının milyonları hesabına qayğısız həyat tərzi keçirən məmur övladları cəmiyyətdə kifayət qədər narazılıq yaradırlar. Onlar nəinki heç bir qayda-qanuna məhəl qoymur, əksinə dövlətçilik üçün təhlükə mənbəyi olan təriqətlərə, sektalara, müxtəlif QHT-lərə himayədarlıq edirlər. Bu barədə müxtəlif səviyyələrdə xəbərdarlıq siqnalları verilib, həyəcan təbili çalınıb. Son günlər xüsusilə diqqət mərkəzində olan nurçuların da ən böyük himayədarları elə məmurlar və camaat tərəfindən himayə olunan onların övladlarıdır. Vəzifə sahiblərinin övladlarının adları ən radikal dini təriqətlərə himayədarlıq etməkdə, onları maliyyələşdirməkdə hallanır. Bunlar isə təbii ki, səxavətdən irəli gəlmir, ortada konkret siyasi və iqtisadi maraqlar dayanır. Məmur balaları dövlətin özü üçün real təhlükə mənbəyinə çevrilirlər.
Nurçuların Azərbaycanda təşkilatlanması, Türkiyədə olduğu kimi burada da “dövlət içərisində dövlət” halına gəlməsi son günlərin ən çox müzakirə olunan mövzusudur. Dövlətin ən üst düzənində yer alan məmurların adları Gülən camaatı ilə işbirliyində çəkilir. Artıq bu siyahının başında yer alan deputat oğlu və Prezident Aparatının şöbə müdiri olan Elnur Aslanov antinur kompaniyası çərçivəsində görəvdən alınıb. Amma, siyahı gündən-günə durmadan genişlənir və daha çox iri məmurun adı hallandırılır. Eyni zamanda hakimiyyət daxilində əks cəbhələrdə yer alan məmurlar üçün nurçularla əlaqədə olmaq son vaxtlar sevimli kompromata çevrilib. Nüfuz dairələrini genişləndirmək, mövqelərini möhkəmləndirmək istəyən məmurlar bir-birlərinə qarşı kompromatları səxavətlə kütləvi informasiya vasitələrinə ötürürlər. Təsadüfi deyil ki, çoxlarının həyat yoluna, fəaliyyətinə son günlər “nur” düşüb. Nurçularla əlaqədar olduğu, hətta onların bir çox layihələrini maliyyələşdirdiyi barədə ittihamlar səsləndirilən şəxslərdən biri də ölkə gündəminin sevimli qəhrəmanlarından olan Nəqliyyat naziri Ziya Məmmədovun oğlu Anar Məmmədovdur. Bir müddət əvvəl KİV-lərdə Ziya Məmmədovun oğlunu vəzifəyə gətirmək istəyindən yazılmışdı. İddia olunurdu ki, Gənclər və idman naziri Azad Rəhimovun adının nurçularla əlaqələndirilməsindən sonra onun vəzifədən alınması ehtimalı var. Elə bu şansı dəyərləndirən Nəqliyyat naziri həmin posta oğlunu təyin etdirmək üçün çaba sərf edir. Bildirilirdi ki, Ziya Məmmədov ən azından oğlunu nazir müavini təyin etdirmək niyyətindədir. Lakin, bu dəfə də “təsir əks təsirə bərabərdir” prinsipi özünü çox gözlətmədi. Nurçularla əlaqədə ittiham olunan nazirin yerinə gəlmək istəyən Anar Məmmədovun özü onlarla iş birliyində ittiham olunmağa başlandı. “Qarant Holdinq”in rəhbərinə qarşı son günlər ikinci cəbhə açıldığı görünür. Bunun həm onun vəzifə təyinatı ehtimalına qarşı, həm də dolayısıyla birbaşa Ziya Məmmədova qarşı atılan addım olduğu bildirilir. Nurçularla əlaqədə ittiham olunan məmurların hədəfdə olduğunu və onlara qarşı cinayət işi açılması təhlükəsinin mövcudluğunu nəzərə alsaq, Ziya Məmmədova qarşı olan qrupun fürsətdən kifayət qədər yararlanmaq istədiyi görünür.
Azərbaycan-Amerika Alyansının rəhbəri olan Anar Məmmədovun ABŞ-da həyata keçirdiyi lobbiçilik fəaliyyətini birbaşa nurçuların nəzarəti altında etdiyi iddia olunur. Verilən məlumatlara əsasən, Anar Məmmədov Vaşinqtonda, Nyu Yorkda və bir çox digər şəhərlərdə təşkil etdiyi tədbirləri Türk-Amerikan Alyansının prezidenti Dr.Faruk Tabanın fəal iştirakı və yardımları ilə həyata keçirir. Türk-Amerikan Alyansının Fətullah Gülənin təlimatı əsasında yaradıldığı və şəxsi nəzarəti altında fəaliyyət göstərdiyi bildirilir. Alyansın prezidenti Faruk Taban isə Gülənə ən yaxın olan şəxslərdən biri hesab olunur. Anar Məmmədovun rəhbərlik etdiyi alyansın da onun fəal qatqıları ilə formalaşdırıldığı göstərilir. Həmçinin Faruk Tabanın Anar Məmmədovun maliyyə imkanlarından da yetərincə bəhrələndiyi yer alan iddialar içərisindədir. Bu isə Nəqliyyat nazirinə qarşı kifayət qədər ciddi arqument hesab olunmalıdır. Fakt təsdiq olunarsa Gülənin rəhbərlik etdiyi Hizmət hərəkatının dolayısıyla Ziya Məmmədov tərəfindən maliyyələşdirildiyi ortaya çıxacaqdır. Verilən məlumatlarda bildirilir ki, Azərbaycan-Amerika Alyansında təmsil olunan şəxslərin böyük əksəriyyəti nurçulardır.
Anar Məmmədovun adı nurçuların Azərbaycanda ən böyük fiqurlarından biri olan Elnur Aslanovla işbirliyində də hallandırılır. Bildirilir ki, bilavasitə Elnur Aslanovun nəzarətində olan çoxsaylı QHT-lərin bir sıra layihələrinin maliyyə dəstəkçisi məhz Anar Məmmədov olmuşdur. Xüsusilə, ABŞ-da həyata keçirilən təbliğat xarakterli tədbirlərin əksəriyyəti Azərbaycan-Amerika Alyansının rəhbərinin pulları hesabına baş tutub. Göründüyü kimi, Anar Məmmədov təkcə nurçularla əlaqədə ittiham olunmur, eyni zamanda onların ən böyük maliyyə qaynaqlarından biri hesab olunur. Elnur Aslanovun vəzifədən alındığını, haqqında cinayət içinin açılması ehtimalının da olduğunu nəzərə alsaq, Ziya Məmmədova qarşı çox güclü hücum planlaşdırıldığını söyləmək olar. Anar Məmmədovun himayədarlığı ilə Nəqliyyat Nazirliyinin mühüm strukturlarında xeyli sayda nurçunun yerləşdirildiyi də artıq mətbuatda işıqlandırılıb.
Beləliklə, nazirin oğlunu daha mühüm vəzifəyə gətirmək istəyi ona qarşı böyük kompaniyaya çevrilib. Ziya Məmmədov son günlərin ən sərt ittihamıyla oğlunun vasitəsilə vurulur. Görünür Nəqliyyat nazirinin hakimiyyət daxilində daha da qüvvətlənməsindən ehtiyat edən qüvvələr əllərində olan kompromatlarla onu sıradan çıxarmağa çalışırlar. Ziya Məmmədovun da oğlunun badına getməsi ehtimalı hər an güclənir.
NİCAT MAHMUDOV