Yeni “halal” standartları müəyyən etməyin vaxtı çatıb

Standartlaşdırma, Metrologiya və Patent üzrə Dövlət
Komitəsindən bu kiçik yazımıza da halallıq verməsini istərdik

Aprel ayı başlar-başlamaz ölkəmizdə halallığa qarşı mübarizə kompaniyasına start verilib. Belə ki, “Halal qida.Ümumi tələblər” dövlət standartlarına uyğun sertifikatlaşdırılmayan , lakin üzərində “halal” sözü yazılan məhsulların istehsalı qadağan olunacaq. Artıq halallıq almaq üçün mütləq Standartlaşdırma, Metrologiya və Patent üzrə Dövlət Komitəsinə müraciət etmək lazım gələcək. Yaxşı plandır, halal-haram məsələlərinin dövlət nəzarətinə keçməsi təqdirəlayiqdir. Yoxsa bəzi para haramzadalar tamamilə cızıqdan çıxaraq halal adı ilə uca millətimizə torba tikirdilər. Camaatımızın kolbasaya olan ülvü məhəbbətindən məharətlə istifadə edən işbazlar növbənöv, rəngbərəng ət məhsullarının üstünə “halal” etiketi yapışdırmaqla insanların hissləri ilə oynayırdılar. Özü də hər sahədə unikallığını qoruyub saxlayan ölkəmizdə halallığın faiz dərəcəsi də kəşf olunmuşdu. 100 faiz halal kolbasa! Adam fikirləşirdi ki, görəsən 90 faiz də halallıq ola bilər? Amma, əslində bu 100 faiz halal yazılan ət məhsullarının heç bir faizi də halal deyildi. Müxtəlif bölgələrdə at, eşşək qəbristanlıqları tapan qayğıkeş yetkililərimiz bildirirdilər ki, bu nəcib heyvanların ətini qəssablarımız toyda-nişanda bəh-bəhlə bizlərə yedizdirirmiş. Özü də halal adı ilə. Xüsusilə bu halal məhsulların üstündən bir qədəh Hacı pivəsi də vurandan sonra adamın bütün günahları o dəqiqə yuyulub gedir, olur anadangəlmə pak. Hörmətli Patent Komitəsinin əməkdaşları min bir əziyyətlə vurub gediblər Hindistana ki, baxsınlar görək burada kəsilən heyvanlar “bismillah”la kəsilir ya yox. Çünki, çox adam hindlilərə inanmayıb ordan gələn ətdən hazırlanan kolbasaları ürəklə yemirdi. Komitə əmin edir ki, hind qardaşlarımız hər kəsimdən əvvəl qüsl olur, iki rükət namaz qılaraq ölkəmizə əti göndəriləcək heyvanların başına bıçaq çəkirlər.
Bu halallıq kompaniyasına başlamışkən dövlətimiz bir çox sahələrdə islahatlar aparsa, yaxşı olar. Məsələn, dəfələrlə rüşvətxorluğa, korrupsiyaya qarşı dövlət səviyyəsində mübarizə başlanmasına, hətta bu işlə məşğul olan zorba bir idarə yaradılmasına baxmayaraq belə haram işin axırına çıxmaq mümkün olmur. Təklif edirik ki, hörmətli Patent Komitəsi rüşvətə də halallıq versin. Xüsusi “Halal rüşvət” kateqoriyası yaradılsın və dərəcələri müəyyən edilsin. Komitə üzərində”Halal” loqosu həkk edilən paketlər istehsal etməli, nazirliklərin, idarə və təşkilatların qarşısında insanlara havayı paylamalıdır. Əvvəllər gizli şəkildə verilən rüşvət indi mərd-mərdanə halal paketlərdə məmurlara təqdim olunmalıdır. Beləcə inanclı məmurlarımız da səksəkədən xilas olar, qazandıqları “halal” pulları alnı açıq, üzü ağ şəkildə milli iqtisadiyyatımızın dirçəldilməsinə sərf edərdilər. Yoxsa yazıqlar qorxudan əllərinə düşən beş-üç manatı aparıb xarici banklarda kifləndirir, Londonda, Dubayda villalara xərcləyirlər. Yaxud korrupsiya hallarına qarşı mübarizə aparmaq üçün “halal korrupsiya” standartı müəyyənləşdirmək yaxşı effekt verə bilər. Nazirlərimiz, komitə sədrlərimiz, icra başçılarımız bundan sonra daha rahat şəkildə fəaliyyət göstərməklə öz işlərində dönüş yaradardılar. Tutaq ki, 1 milyon manatlıq bir layihəni həyata keçirən məmura bu vəsaitin 200 min manatının halallığı verilir, bundan artıq mənimsənilən vəsait isə korrupsiya hesab olunur. Təbii ki, məbləğ artdıqca halallığın da ölçüsü artırılmalıdır, yoxsa 10 milyonluq bir layihədən ən azı iki-üç milyonunu götürmədinsə o halallıq kimə lazımdır. Bax beləcə dövlət gəlir-çıxarını hesablayar, həm də halallıq kimi bir ülvi hiss də yenidən məmurlarımızın leksikonuna qayıdardı. Halallıq kompaniyası çərçivəsində məmurların dövlət hesabına Həcc ziyarətinə də göndərmək olar. Hacı adını alan məmurların halallığı veriləndən artıq dövlət puluna əl uzatmayacağı şübhəsizdir. Halallıq kompaniyasına təcili şəkildə dövlət xəstəxanalarında, ali təhsil ocaqlarında, məktəblərdə də başlamaq lazımdır. Xalqımızı haram yeməkdən qurtarmaq vaxtıdır. Hətta halallıq mərkəzləri yaratmaq, burada məmurlara və vətəndaşlara mühazirələr oxumaqla maarifləndirmə işləri aparılmalıdır. Xüsusi bukletlər nəşr olunmalı, hər bir dövlət təşkilatında çalışanların stolüstü kitabına çevrilməlidir. Halallıq barədə hikmətli sözlər yazılan şüarlar hər yerdə cəlbedici məkanlardan asılmalıdır. Məsələn, “Haram tikə göz deşər!”, “Halal rüşvətdən artıq pul alan məmurlara ar olsun!”, “Bu layihənin 40 faizi halallıqla mənimsənilmişdir!” və s. Dünyada bir ilkə imza ataraq “Asan xidmət” yaradan dövlətimiz “Halal xidmət” yaratmaqla bütün millətləri heyrətə sala bilər. Onda bütün dünya bizə baxıb köks ötürər, ürəkdən “Halal olsun!” deyərdi.
Sonda çox hörmətli Standartlaşdırma, Metrologiya və Patent üzrə Dövlət Komitəsindən bu kiçik yazımıza da halallıq verməsini rica edirik!
NİCAT MAHMUDOV