“Azərenerji” ASC-də böhranlı vəziyyət yaranıb

Son dövrlərdə gündəmin ən sevimli müzakirələrindən olan hansısa məmurun işdən alınması mövzusunun yeni baş qəhrəmanı “Azərenerji” Açıq Səhmdar Cəmiyyətinin sədri Etibar Pirverdiyevdir. Bir neçə gündür ki, Azərbaycanın işıqlarını istədiyi kimi yandırıb söndürən məmurun vəzifəsi ilə vidalaşacağı söylənilir. “Azərenerji” ASC-nin sədrinin işdən çıxarılması üçün ciddi arqumentlər səsləndirilir. Əslində bu faktlar uzun illərdir ki, ölkə KİV-lərində dönə-dönə işıqlandırılıb. Lakin, deyilənlər özünü doğrultsa, Pirverdiyevin karyerasına son qoyacaq mühüm amillər axtarmaq elə də çətin deyil. Hal-hazırda ASC sədri üçün ən başağrıdıcı vəziyyət Sumqayıt Texnologiyalar Parkında yaranıb. Verilən bilgilərə görə xeyli vaxtdır ki, STP-da işçilərə əmək haqqı verilmədiyi üçün gərginlik hökm sürür. Ümumiyyətlə, son dövrlərdə “Azərenerji” ASC-də ürəkaçan atmosfer müşahidə olunmur. Təşkilatda çox ciddi maliyyə böhranı yaranıb. Bir sıra mətbu orqanlarına sızan məlumatlara əsasən, hətta ASC-də kağız almağa belə vəsait tapılmır. “Azərenerji”də vəziyyəti şirkətin böyük investisiya layihələrini maliyyələşdirməsi ilə əlaqələndirsələr də, ASC-nin iri həcmli kredit borclarının olduğu da diqqət çəkir. Etibar Pirverdiyev çətin duruma düşüb. Hətta “Azərenerji”nin koridorlarında yeni sədrin adını çəkənlər də az deyil. Bir çoxları “Bakıelektrikşəbəkə”nin rəhbəri Baba Rzayevin təyinat əmrini gözlədiyini deyir.
Etibar Pirverdiyevin əleyhinə səsləndirilən əsas arqumentlərdən biri də “Azərenerji”nin AZENCO şirkəti ilə bağladığı müqavilələrdir. AZENCO-nun Pirverdiyevin nəzarətində fəaliyyət göstərməsi bağlanan müqavilələrin şəffaflığını şübhə altına alır. “Azərenerji”-nin bu şirkətlə bağladığı böyük məbləğli müqavilələr nəticəsində külli miqdarda vəsaitin yoxa çıxdığı bildirilir. Təkcə son 6 il ərzində “Azərenerji”-yə 3 milyard dollara yaxın investisiya yatırıldığını nəzərə alsaq ortaya xeyli ciddi rəqəmlər çıxartmaq olar. Məlumdur ki, ASC-nin bütün layihələri məhz AZENCO vasitəsilə həyata keçirilir. Eyni zamanda AZENCO 17 zavodu özündə birləşdirən Sumqayıt Texnologiyalar Parkının da sahibidir. Bu fakt Vergilər Nazirliyinin 6 aprel 2012-ci il məlumatında da öz əksini tapıb. Xüsusi kapitalı 500 milyon dollar təşkil edən AZENCO isə 23 dekabr 2009-cu ildə cəmisi 6,4 milyon manata özəlləşdirilib. Şirkət ölkədə həyata keçirilən bir sıra dövlət əhəmiyyətli layihələrin, o cümlədən Dövlət Bayraq Meydanı və digər mühüm obyektlərin tikintisini həyata keçirib.
Beləliklə AZENCO və Sumqayıt Texnologiyalar Parkında yaranan böhranlı şərait “Azərenerji” sədri üçün arzuolunmaz məcraya dönüşüb. Bu şirkətlər qrupunda çalışan 8 mindən çox işçinin əmək haqqı almasında problemlər yaranıb və bu barədə KİV-lərdə yetərincə məlumatlar yer alıb. Bir müddət öncə isə “Azərenerji” sistemində çalışan əməkdaşlar arasında ixtisarlar aparılmış, işçilər məcburi qaydada məzuniyyətə göndərilmişdi. Amma, yaranmış böhran hələ ki, həllini tapmadığı üçün əsas günahkar kimi Etibar Pirverdiyev hədəfə alınıb. Büdcədən səxavətlə vəsait almasına baxmayaraq ölkənin enerji sistemində hələ də kəskin problemlər hökm sürür. Bu qış bir neçə gün davam edən şaxtalı və küləkli hava şəraitində paytaxt ətrafında yerləşən yaşayış məntəqələrində günlərlə elektrik enerjisinin verilməsində fasilələrin yaranması prezident səviyyəsində tənqid olunmuşdu. “Azərenerji”-nin yarıtmaz fəaliyyəti bir neçə dəfə parlamentdə də müzakirə obyekti olub. Lakin, hər dəfə tənqidlərdən salamat qurtara bilən Pirverdiyev vəzifə kürsüsünün təhlükəsizliyini təmin edə bilirdi.
Etibar Pirverdiyevin üzləşdiyi digər bir arqument isə “Azərenerji” ASC-də hökm sürən qohumbazlıq və tayfabazlıqdır. Bildirilir ki, məsələ artıq ən yüksək dairələrin də diqqətini çəkib. Şirkətdə ən mühüm postlara Pirverdiyevin yaxınlarının sahiblənməsi narazılıqla qarşılanıb.
“Azərenerji”-də bütün işləri qaynı Kərim Xammətov vasitəsilə həyata keçirən ASC sədri burada yaxınlarından ibarət nəzarət piramidası formalaşdırıb. Şirkətdə digər bir mühüm fiqur isə Etibar Pirverdiyevin qardaşı Vüqar Pirverdiyevdir. Daha çox “Azərenerji”-də kadr işlərinə baxdığı bildirilən V.Pirverdiyevin istəyi olmadan heç kim şirkətə qəbul oluna və yaxud azad edilə bilməz. Vüqar həm də “Azərenerji”-ni elektrik avadanlıqları ilə təmin edən şirkətin də rəhbəridir. Baş verən alqı-satqı əməliyyatlarında qardaşlıq hisslərinin az rol oynamadığı bildirilir. Məlumatlara görə artıq qardaşlar arasında aparılan əməliyyatlar lazımi dairələrin diqqətinə düşüb və ilkin araşdırmalara başlanılıb.
Hər halda vəziyyət heç də “Azərenerji”-nin sədri üçün istənilən durumda deyil. Yaranmış şəraitdə böhranın davam etməsi isə onu daha çıxılmaz situasiya ilə üz-üzə qoyub. Məlumatlı mənbələr Etibar Pirverdiyevin çətin durumdan daha az itki ilə çıxmaq yönündə çalışdığını, heç olmazsa sərvətini xilas etmək istədiyini bildirirlər. Son qərarın yaxın vaxtlarda açıqlanacağı gözlənilir.
NİCAT MAHMUDOV