Generalın adamı olan Firudin Nəbiyevin kürdlərin məskunlaşdırma
siyasətində barmağının olduğu, Samuxa da onları köçürdüyü deyilir;
DMX-dakı qanunsuzluqlar haqda şok bilgilər də var...

Dövlət Miqrasiya Xidmətinin rəisi Firudin Nəbiyev əyalətləri kürdləşdirmək siyasətinin əsas ruporudur. Bu barədə “Gündəm-xəbər”ə daxil olan sensasion məlumatda qeyd olunur ki, Azərbaycanın şimal zonalarının və Bakı kəndlərinin kürdlərlə əhatələnməsində DMX rəisinin müstəsna rolu var.
Samuxa kürd köçü
Belə ki, onun özünü kürd kökənli olduğu iddia edilir və rayonlara kürdlərin yerləşdirilməsinə köməklik edir. Məlumatda deyilir ki, Azərbaycanda kürdlərin yerləşdirilməsi və boş qalmış kəndlərdə məskunlaşdırılması ideoloji siyasətin tərkib hissəsidir. Son günlər adı hallanan təkcə Xaçmazın Xraxoba kəndi deyil.
Eləcə də Samuxa və digər Azərbaycanın bir çox bölgələrinə kürdlər köçürülür. Son vaxtlar paylanılan və satılan torpaqlarda əksərən onlar yerləşdirilir və işlə təmin edilirlər. Əsas strateji sahələrə onlar nəzarət edirlər. Bu, Azərbaycanı kürdləşdirmək üçün təşkilatlar tərəfindən vəzifələrə gətirilmiş generallar vasitəsi ilə aparılan planlaşdırılmış gizli siyasətdir.
Mənbə qeyd edir ki, bu işin xüsusi funksionerlərindən biri də məhz Firudin Nəbiyevdir. “Gündəm-xəbər”ə özəl olaraq bu barədə danışan məlumatlı şəxs qeyd edir ki, kürdlərin köçü prosesi davam edir və daha geniş miqyası alacağı gözlənilir.
Mənbə qeyd edir ki, DMX-da işləyənlər arasında xeyli kürd var: “Firudin Nəbiyev Dövlət Miqrasiya Xidmətinin rəisi vəzifəsinə gələndə hamı ümid edirdi ki, irəliləyiş olacaq.
Sözügedən qurumda uzun illərdən bəri yaşanan neqativ hallar, qanun pozuntuları aradan qaldırılacaq və nəhayət ki, xidmətin fəaliyyəti normallaşdırılacaq. Lakin bununla bağlı gözləntilər heç də özünü doğrultmadı.
Belə ki, bu gün Dövlət Miqrasiya Xidmətində çox ciddi problemlərin mövcud olduğunu hamı bilir. Firudin Nəbiyev rəhbərlik etdiyi sahədə yeni-yeni qanunsuzluqların meydana gəlməsi üçün münbit şərait yaradıb”.
Generalın ideoloji yardımçısı
Qaynağımız iddia edir ki, Dövlət Miqrasiya Xidmətinin rəisi 2001-ci ildə Sərhəd Qoşunları Baş İdarəsinin rəis müavini vəzifəsinə təyin olunub. 2003-cü ildə isə Dövlət Sərhəd Xidməti rəisinin maddi-texniki təminat üzrə müavini postuna gətirilib.
Firudin Nəbiyev məhz Elçin Quliyevin köməkliyi ilə 2006-cı ildə general-mayor hərbi rütbəsi alıb. 2008-ci ildə isə o, Dövlət Sərhəd Xidməti rəisinin 1-ci müavini - Sərhəd Qoşunlarının Baş Qərargah rəisi vəzifəsinə gətirilib.
2012-ci ildən bu günə kimi isə Dövlət Miqrasiya Xidmətinin rəisi vəzifəsində çalışır. Bu gün iş o yerə çatıb ki, artıq xidmətin əməkdaşları belə, Firudin Nəbiyevin əməllərindən təngə gəliblər. Çünki o, vəzifəsinə təyin olunduqdan sonra xidmətin peşəkar kadrlarını mərhələli şəkildə müxtəlif bəhanələrlə işdən uzaqlaşdırıb, onların yerinə isə özünə yaxın olan şəxsləri təyin edib.
Söhbət məhz kürdlərin cəlb edilməsindən gedir. Bu isə öz növbəsində, xidmətin əməkdaşları arasında ciddi narazılığın yaranmasına səbəb olub. Elçin Quliyevin şimal zonasını kürdləşdirmək siyasətinə də Nəbiyev köməklik göstərir”. Bildiyiniz kimi, hər ötən gün ölkəmizdəki miqrantların sayı bir qədər də atır. Onların burada qalması və işləməsi üçün ölkə rəhbərliyi tərəfindən lazımi şərait yaradılsa da, bu işə nəzarət etməli olan qurum - Dövlət Miqrasiya Xidmətinin əməkdaşları müxtəlif səbəblər üzündən sənədləri qaydasında olan xarici vətəndaşları belə, süründürməçiliyə məruz qoyurlar.
Belə ki, sözügedən məsələ ilə bağlı əldə etdiyi bilgiləri bizimlə paylaşan mənbə iddia edir ki, Firudin Nəbiyev bir sıra əcnəbiləri kütləvi şəkildə cərimədən azad edərək büdcəyə köçürmələrin və işçilərin əmək haqqına əlavələrin azalmasına şərait yaradır.
Süründürməçilik və...
Qeyd edək ki, ölkəyə gələn və ölkəni tərk edən insanlar tibbi arayış almaq üçün Respublika Diaqnostika Mərkəzi və “İnternational Medical Center” xəstəxanasına müraciət etməlidirlər. Tibbi arayışların yalnız bu xəstəxanalardan alınması isə o deməkdir ki, Firudin Nəbiyev özünəməxsus qaydalar tətbiq etməklə bu sahəni inhisarda saxlayır və ola bilsin ki, onun adıçəkilən tibb ocaqlarının rəhbərləri ilə müəyyən danışıqlardan sonra bu barədə qərar qəbul olunub.
Mənbə qeyd edir ki, F.Nəbiyevin “İnternational Medical Center” xəstəxanası ilə əlaqələrinin yaxın olması təsadüf deyil. Çünki Dövlət Sərhəd Xidməti rəisinə məxsus olduğu deyilən klinika onların monopoliyasındadır. Hər bir arayışın qiyməti böyüklər üçün 100, uşaqlar üçün isə 70 manatdır. Bu, isə il ərzində milyonlarla vəsaitin toplanması deməkdir. Həmin pullar isə birbaşa Miqrasiya Xidmətinin rəhbərliyinin şəxsi büdcəsinə yönəldilir”.
Qanunsuz cərimələr
Bundan əlavə mənbəmiz qeyd edir ki, F.Nəbiyev xidmətə rəis təyin edildikdən sonra, xidmətə Arzu Rəhimov tərəfindən gətirilmiş şəxslərə qarşı mübarizə ilə başlayıb. Nəticədə 10-a qədər əməkdaş xidmətdən kənarlaşdırılıb, rütbəsi və vəzifəsi endirilib.
Firudin Nəbiyev yalnız özünə yaxın olan adamları irəli çəkir və savadlı kadrları təhdid edir. Bildirilir ki, turist vizası ilə işləyənlərə rüşvətlə şərait yaradırlar. On minlərlə əcnəbiyə bu imkanı vermək qanunsuzdur.
Bundan başqa, bəzən pasportları özlərində olmayan, yəni pasportu işəgötürən tərəfindən götürülmüş şəxsləri ölkədə qanunsuz qalma faktına görə 400 manat cərimə edirlər. Daha bir qanunsuzluq halı odur ki, məcburi əməyin qurbanı olmuş əcnəbilər işləri araşdırılmadan ölkədən deportasiya olunur.
Məlumatlarda bildirilir ki, Firudin Nəbiyev əcnəbi vətəndaşları işlədən yerli şirkətlərə qarşı sanki qərəzli mövqe nümayiş etdirir. Qanun xarici ölkə vətəndaşlarının Azərbaycana gəlib işləməsinə mane olmur. Qanunda hər şey tam aydınlığı ilə göstərilib.
Buna baxmayaraq, xidmətin rəisi və digər səlahiyyətli şəxsləri xarici vətəndaşların əməyindən istifadə edən firma və müəssisələrə qarşı haqsızlıq edir. Hər işçiyə görə xidmətin rəsmiləri şirkət rəhbərlərindən rüşvət tələb edirlər. Halbuki, qanunda belə bir maddə qeyd olunmayıb. Onlar gündə özlərindən bir qayda icad edirlər.
Rüşvətin tüğyanı
Bildirək ki, xaricdən ölkəyə işləmək üçün gətirilən əcnəbilərlə bağlı Nazirlər Kabineti tərəfindən kvota təsdiq edilib. Lakin Firudin Nəbiyev Nazirlər Kabinetinin təsdiq etdiyi qərara önəm verməyərək yerli şirkətlərin sahiblərinə kvota bəhanəsini gətirir.
DMX-in yüksək vəzifəli şəxslərinin “haqqını” ödəyən şirkətlərlə sıcaq münasibətlər qurur. Hətta Firudin Nəbiyevlə bəzi özəl tibb ocaqlarının sahibləri üz-üzə gəliblər. Generalla razılaşmayan xarici həkimlərin işlədiyi klinikalar heç bir səbəb olmadan cərimələnirlər. Göründüyü kimi, DMX-də Arzu Rəhimovun dövründən qalan problemlər daha da çiçəklənib. Belə çıxır ki, rəis qarşıya qoyulan işlərin öhdəsindən ötən dövr ərzində gələ bilməyib.
Ondan qabaq isə xidmətin rəisi hazırda Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) rəisi işləyən Arzu Rəhimov olub. Elə Arzu Rəhimovun rəhbərliyi dövründə də qurumda qanundankənar işlər baş alıb gedirdi. Rəhbərliyin dəyişməsi problemləri nəinki azaldıb, əksinə daha ciddi özbaşınalıqlar meydana gəlməyə başlayıb.
Rafiq Qara