Zakir Həsənov Səfərbərlik və Hərbi Xidmətə Çağırış üzrə
Dövlət Xidmətinin rəisini dəyişmək üçün əlindən gələni edir

Arzu Yusif oğlu Rəhimov - 1964-cü il oktyabrın 1-də Naxçıvan şəhərində anadan olub. 1986-cı ildə Novosibirsk Ali Hərbi Siyasi Ümumqoşun məktəbini bitirib. 1986-1989-cu illlərdə Keçmiş SSRİ Silahlı Qüvvələrində müxtəlif vəzifələrdə xidmət edib. 1992-2004-cü illərdə Azərbaycan Respublikasının Sərhəd Qoşunlarında baş zabit vəzifəsindən hərbi hissə komandiri vəzifəsinədək yüksəlib. 2004-cü ildən 2006-cı ilədək Sərhəd Qoşunları Baş Qərargahı rəisinin 1-ci müavini vəzifəsində çalışıb. 2006-cı ildə Dövlət Sərhəd Xidməti rəisinin 1-ci müavini –Sərhəd Qoşunları Baş Qərargahı rəisi vəzifəsinə təyin edilib. 2004-cü ildə «general-mayor» ali hərbi rütbəsinə layiq görülüb. 2007-2012-ci illərdə Azərbaycan Respublikası Dövlət Miqrasiya Xidmətinin rəisi vəzifəsində çalışıb. 2010-cu ilin 17 mart tarixində Azərbaycan Respublikasının Prezidentinin 813 saylı Sərəncamına əsasən II dərəcəli dövlət miqrasiya xidməti müşaviri ali xüsusi rütbəsi alıb. Azərbaycan Respublikası Prezidentinin 13 fevral 2012-ci il tarixli Sərəncamı ilə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin rəisi təyin edilib. Azərbaycan Respublikası Prezidentinin 1 mart 2012-ci il tarixli Sərəncamı ilə general-leytenant hərbi rütbəsi verilməklə həqiqi hərbi xidmətə qəbul edilib.
Yalnız 2012-ci ildən etibarən Arzu Rəhimov həqiqi hərbi xidmətə qəbul edilib. Cəmi 2 il ərzində Arzu Rəhimov yaradılan xidmətdə sözün bütün mənalarında «nailiyyətlərə» imza ata bilib. Hərbi komissarlıqlar ləğv edilərkən istər hərbi ekspertlərin, istərsə də ictimaiyyət nümayəndələrinin reaksiyası eyni olmadı. Belə ki, onlar açıqlamalarında bildirirdilər ki, yeni yaranan qurum bu sahədəki nöqsanları aradan qaldırmayacaq, əksinə başqa problemlər üzə çıxacaq. Ekspertlər deyirdilər ki, hərbi komissarlıqların ləğv edilməsinə heç bir ehtiyac yoxdur. Sadəcə, bu qurumun fəaliyyətini bir qədər təkmilləşdirmək yetərlidir. Ancaq təəssüflər olsun ki, hərbi komissarlıqlar ləğv olundu və onun yerinə SHXÇDX yaradıldı. Bu gün Səfərbərlik və Hərbi Xidmətə Çağırış üzrə Dövlət Xidməti dövlət vəsaitini düzgün istifadə etməməklə məşğuldur. Şişirdilmiş ştat və dörd general vəzifəsi buna nümunədir. Bu qurum hərbi komissarlıqlara rəhmət oxutdurur kimi etiraz ifadələri də açıqlanırdı.
General-leytenant Arzu Rəhimovun Dövlət Miqrasiya Xidmətindən (DMX) bura gətirilməsi isə vəziyyəti daha da ağırlaşdırdı. Artıq iki ili tamam olan xidmət bu müddət ərzində onlarla gəncin ölümünə səbəb olub. Xidmətin yerlərdəki şöbələrində hərbi-həkim komissiyasından keçən gənc çağırışçılar xəstəlikləri olduqları halda, sağlam kimi qeydiyyatdan keçiriliblər. Hərbi xidmətə yollanandan sonra xəstəlikləri özünü büruzə verib. Və xəstəliyə məğlub olan gənc əsgərlər xidmət zamanı dünyalarını dəyişiblər. Bir ayın əsgərlərinin bir-birinin ardınca vəfat etməsi bütün nəzərləri generalın üzərində cəmləşdirir. Bəziləri onun rütbədən vurulacağını, bəziləri də vəzifədən çıxarılacağını söyləyirdi. Lakin 2012-ci ildə Rəhimovun karyerası barədə verilən proqnozların heç biri özünü doğrultmadı. Kimlərinsə vasitəsilə vəzifəsinə olan mövcud təhlükədən qoruna bilən baş hərbi komissar rahat nəfəs aldı. Amma onun gələcək fəaliyyəti haqqında son günlər bir sıra söhbətlər yayılıb.
Bizdə olan xəbərlərə görə, general haqqında artıq yuxarı dairələrə məlumat verilib. İşi qənaətbəxş hesab olunmayan generala bu ilin ortalarına kimi vaxt verilib ki, özünü doğrultsun və günahkar hərbi komissarları işdən çıxarsın. Əks təqdirdə bu dəfə ona heç kim kömək edə bilməyəcək və tutduğu vəzifəsini itirməklə sərt şəkildə cəzalanacaq. Bəzi mənbələr belə hesab edir ki, xidmət rəisinin "vurulmasında" bəzi maraqlı qüvvələr var. Onların fikrincə, Müdafiə Nazirliyində vəzifədə olan generallardan biri ölkənin baş hərbi komissarı olmaq haqqında plan qurur. Bunun üçün də əlinə düşən hər fürsətdə xidmət rəhbərini küncə sıxışdıraraq, səlahiyyətlərinin əlindən alınmasına çalışır. Xidmətin paytaxtdakı şöbələrindən bir neçəsinin hərbi komissarı da generalın kreslosuna oturmaq istəyir. Sadəcə, nazirlikdə çalışan yüksək rütbəli zabit bu posta daha real namizəddir. Çünki, həm rütbəsi, həm də arxasında duran iri ranqlı məmurlar imkan verir ki, o, SHXÇDX-də başçı olsun.
Sonda qeyd edək ki, xidmətə kimin rəhbər təyin edilməsindən asılı olmayaraq, gənclərin hərbi xidmətə yola salınması zamanı qanunlara ciddi şəkildə riayət olunmalıdır. Yoxsa ki, xəstəliyi olan çağırışçıları hərbi xidmətə yola salıb, sonra meyitlərini valideynlərinin üzərinə qaytarmasınlar.
Bununla belə müdafiə naziri Zakir Həsənovun da Arzu Rəhimovla ciddi konfiliktlərinin olduğu heç kimə sirr deyil. Nazir təyinat aldığı ilk dönəmlərdə hərbi xidmətə çağırışla bağlı sərt yoxlamalar aparmağa qərar verdi. Hətta bununla bağlı olaraq ortaya çıxan əsas məqamlardan biri də o idi ki, yüzlərlə əsgər ordudan xəstəliklə hərbi xidmətə aparıldığına görə təxris edildilər. Əsgərlərin geriçağırılma tendensiyası bir qədər səngidi. Amma hüquq-mühafizə orqanlarında şhərbi xidmətə çağırışla bağlı olaraq həyata keçirilən yoxlamalar bu gün də davam etməkdədir. Məlumatlara əsasən ordudakı neqativ halların yaşanması, xüsusilə də əsgərlərin bir-birinə qarşı silah işlətməsinə dair faktlar kifayət qədər incəliklərinə qədər araşdırılıb. Nəticə etibarilə də məlum olub ki, əslində silahdan istifvadə edərək əsgər yoldaşlarını və komandirlərini öldürənlərin psixaloji durumlarında, səhhətlərində ciddi problemlər olub.
Hərbi xidmətə çağırışla bağlı da dövlət sirlərinin qorunması baxımından elektron təkminləşdirmə sistemlərində ciddi qüsurlara yol verildiyi deyilir. Təbii ki, bunları hər kəs bildiyindən və yol verilmiş elektron sistemlərinə dair nöqsanlarla bağlı olaraq ortaya çıxan neqativ məqamlar haqda araşdırmalarımız davam edir.
RÜFƏT