Teleaparıcı İlham Mirzəyevin həbsində siyasi motivlər olduğu barədə məlumatlar dolaşır

Azərbaycan teleməkanının “ulduzlarından” biri olan, ekranlarda bir çox məşhurları “etiraf” etdirərək ağladan, fala baxan, rəml atan İlham Mirzəyev həbs olunub. Daxili İşlər Nazirliyi Mütəşəkkil Cinayətkarlıqla Mübarizə İdarəsinin əməkdaşları onu Cinayət Məcəlləsinin 178-ci maddəsi ilə, yəni dələduzluqda ittiham edərək saxlayıb. Nərimanov rayon məhkəməsində İlham Mirzəyevə irəlli sürülmüş ittihamlarla bağlı 2 aylıq həbs qəti imkan tədbiri seçilib. Həbs xəbərini eşidən “etirafçı”nın məhkəmə zalında ürəyi gedib və ona təcili tibbi yardım göstərilib. Təbii ki, bir çox sənət sahələri ilə bahəm teleaparıcılıq da edən İ.Mirzəyev cəmiyyətdə az-çox tanınan isimlərdən biri olduğu üçün onun həbsi maraqla qarşılanıb. Amma, məsələni daha maraqlı edən digər bir nüans isə həbsdən dərhal sonra aparıcı ilə bağlı çox maraqlı informasiyaların yayılması oldu. Dələduzluq maddəsi ilə həbs olunan İ.Mirzəyevin cinayət işində hətta siyai motivlər belə tapıldı. Şairliklə, publisistliklə, psixoloqluqla, falçılıqla, alimliklə, aparıcılıqla, həkimliklə məşğul olan İ.Mirzəyev haqqında bir-birindən maraqlı məlumatlar üzə çıxır. İlk öncə onun ittiham olunduğu dələduzluq maddəsi barəsində ilginc faktlar aşkarlanıb.

“Fala baxıram, rəml atıram”

Tamaşaçılarına öz verilişlərində dindən, şəriətdən, imandan danışan aparıcı əslində insanların inamından istifadə etməklə fala baxmaqla, bəxt açmaqla, proqnozlar verməklə məşğul imiş. Bizim telekanallarımızın ucuz reytinq qazanmaq naminə falçıları, ekstrasensləri reklam etməsi çoxdanın təcrübəsidir. Bu gün sadəlövh insanların falçıların qapısı önündə növbəyə durmasında, aldadılmasında telekanalların günahı heç də az deyil. Elə bu “reytinq yarışında” İlham Mirzəyevin “Etiraf”ları da hər həftə evlərin çağırılmamış qonağı idi. Dininmizin ən günah əməllərdən sandığı falçılıq, gələcəkdən xəbər vermək kimi əməlləri camaata “sırıyan” telekanallar üçün İ.Mirzəyev əsl tapıntıdır. Beləcə həm kanal “qazanır”, həm də aparıcı. Arada isə avam camaat “İlhaMed”dən imdad ummağa sürüklənirdi. İnsanların “tale yolları”na baxmaq üçün o, Gənclik metrosunun yaxınlığında icarəyə götürdüyü 5 mərtəbəli ofisdən istifadə edib. Bildirilir ki, İ.Mirzəyevin bu nəhəng ofisində qəbuluna düşməyin qiyməti 1000 manatdan ucuz olmayıb. Amma, təbii ki, hər “xidmətin” qiyməti də fərqli imiş. Bəxti açılıb ərə getmək istəyənlər bir məbləğdə, çoxlu toy tutmaq istəyənlər isə başqa məbləğdə pul ödəməli olublar. İ.Mirzəyevin “müştəriləri” arasında studiyada qonağı olarkən ağlatdığı tanınmışların da sayı kifayət qədər olub. Onun həm də siyasilərin də bəxtini açmağa cəhd etdiyi haqqında informasiyalar var. Amma, “İlhaMed”ə üz tutanların arzuları çin olmasa da, çin-çin pulları əldən gedib. Bu gün iş işdən keçəndən sonra Səhiyyə Nazirliyi bildirir ki, onlar “İlhaMed”ə heç bir lisenziya verməyiblər. Bəs görəsən, bu qədər müddətdə şəhərin mərkəzində bu qanunsuz fəaliyyətə kimlər imkan yaradıblar? Dinimizin günah sandığı bir əməllə qazandığı pullarla Həcc ziyarətinə gedən “Münəccim”i (İ. Mirzəyevin belə bir verilişi də olub) ekranlarda axşam-sabah təbliğ edənlər əslində xalqı şüurlu şəkildə cəhalətə sürükləyirdilər. Məlumatlara görə, reklamı güclü olan İ.Mirzəyevin müştərilərinin çeşidi də müxtəlif olub. Onların arsında müasir tibbin müalicə etməsi mümkün olan xəstələr də var. Amma, “əcnəbilərin seyrə balonlarla çıxdığı” müasir dövrümüzdə hələ də İlham “həkimin” kiminsə lal dilini açacağına, şikəstlərə şəfa verəcəyinə, dəlini ağıllandıracağına təəssüf ki, inananlar var. Bildirilir ki, “İlhaMed” klinikasında 150-200 min manatlıq aparatlar var. Maraqlıdır ki, fala baxmaqla bu boyda bir klinikanı saxlamaq və belə bahalı avadanlıqları almaq necə mümkün olub? İ.Mirzəyevin Xırdalan ərazisində yerləşən “Tale yolları” şadlıq sarayının qiyməti isə miyonlarla ölçülür. Ümumiyyətlə, mətbuatda verilən məlumatlarda etirafçı aparıcının Bakıda bir neçə mənzilinin, Abşeronda bağlarının, kommersiya müəssisələrinin olduğu aşkar olunub. Rəsmi dövlət mətbuatında yer alan informasiyalarda bütün bunların İlham Mirzəyevin hansısa gizlin əlaqələri vasitəsilə əldə etməsinə dair eyhamlar vurulub.

Falçılıqdan böyük siyasətə gedən yol?

Ölkənin aparıcı kütləvi informasiya vasitələrində, iqtidar yönlü mətbu orqanlarda İlham Mirzəyevin həbsi ilə bağlı siyasi motivlər də səsləndirilməyə başlayıb. Hər halda bu həbs adi bir teleaparıcı, falçı həbsindən daha çox səs-küy doğurub. Və belə bir nəticə də çıxarmaq olar ki, məgər İ.Mirzəyevin falçılığı, klinikasının lisenziyasız fəaliyyəti indimi yada düşüb?! Onun qəflətən həbs olunması, obyektlərində yoxlamalar aparılması belə əsas verir ki, bu həbsin arxasında daha mühüm amillər durur. Falçılıqdan böyük siyasətə gedən yol haqqında artıq bəzi detallar da səsləndirilir. İqtidar yönlü mətbuatda İlham Mirzəyevin Abbas Abbasovla, Telman İsmayılovla əlaqələri barəsində ittihamlar yer alıb. Bildirilir ki, aparıcının belə böyük biznes şəbəkəsinin formalaşdırılmasında, uzun müddət gündəmdə saxlanılmasında adı çəkilən şəxslərin əməyi az deyil. Bu barədə “Xalq qəzeti”nin yazarı İttifaq Mirzəbəylinin Facebook səhifəsində məlumat verilib. Yazar bildirir ki, İlham Mirzəyevi yerində saxlayan adamlardan biri ötən ilki prezident seçkilərindən əvvəl Moskvadan İstanbula gələrək Azərbaycanda siyasi vəziyyətə müdaxilə etmək barədə plan hazırlanmasında iştirak edib. İndi isə həmin məsələnin detalları araşdırılır.
Aparıcının həbsindən sonra məhz həmin ərəfədə onun Türkiyədə-Antaliya və İstanbulda dincəldiyi üzə çıxıb. İlham Mirzəyev qalmaqallı “istirahət turu”nda Antaliyada AST Telmana məxsus olan “Mardan Palace”-da 10 gün dincəlib və otelin sahibindən (T. İsmayılov) qiymətli hədiyyələr alıb. İ.Mirzəyev səfərindən sonra verdiyi açıqlamada T.İsmayılov tərəfindən hərtərəfli qayğı ilə əhatə olunduğunu və “dünyanın dörd bir yanından gələn azərbaycanlılarla görüşlərinin təşkil olunduğunu” bildirib. Bu səfərdə AST Telman İ.Mirzəyevdən öz səxavətini əsirgəməyib. Teleaparıcıya qızıl və gümüşlə işlənmiş müqəddəs Quran kitabı və hündürlüyü 40 sm, eni 20 sm ölçülü, qızıl əqrəbinin çəkisi 500 qr olan “Mardan Palace” leybi bağışlanılıb. Məsələni ciddiləşdirən əsas səbəb isə İlham Mirzəyevin Antaliyada dincəldiyi və qiymətli hədiyyələr aldığı zaman Abbas Abbasov və Telman İsmayılovun həmin məkanda görüşməsi və Azərbaycanda siyasi vəziyyətə müdaxilə etmək planları müzakirə etdikləri barədə səsləndirilən ittihamlardır. Hətta bəzi məlumatlarda aprıcının da həmin görüşlərdə iştirak etdiyi və indiyə qədər adları çəkilən şəxslər tərəfindən himayə olunduğu bildirilir. Bu ərəfədə məlum olub ki, İlham Mirzəyev aparıcısı olduğu “Space” kanalında heç də arzulanan şəxs olmayıb, sadəcə kanal rəhbərliyi onu efirdən “uzaqlaşdıra bilməyib”. Bunu İlham Mirzəyevin xüsusi şəxslər tərəfindən himayə olunması ilə əlaqələndirirlər. Hər halda bütün söylənilənlərə yəqin ki, yaxın günlərdə istintaq orqanları açıqlama verəcək. Amma, hər halda bu həbsin dələduzluqdan daha çox “siyasi dəcəlliklə” bağlı olduğu görünür.
NICAT