Cənubi Qafqazda nə baş verir?

Deyəsən, tarix təkrarlanır. XXI əsrin başlanğıcı nədənsə XX əsrin əvvəllərini xatırladır. Yenə də dünya savaş ab-havasındadır, böyük güclər üz-üzə durublar. Rusiyadan imperiya küləkləri əsir, Putin yeni əsrin yeni Lenini olmaq ərəfəsindədir. İndi ən böyük təhlükə keçmiş müstəmləkə respublikalarının başının üstünü alıb. SSRİ-nin dağılmasından sonra zəif duruma düşən Rusiya yenidən güclənərək öz köhnə qüdrətini bərpa etmək istəyir. İmperiyanın dağılmasından 23 il keçməsinə baxmayaraq, Kreml ideologiyası hələ də beyinlərdən silinməyib. Hələ də özünü Moskvanın pioneri, komsomolçusu hesab edən xeyli həmvətənimiz var ki, gecələr yuxuda Kommunist partiyasının plenumlarını görür, səhərə qədər uzun sürən sürəkli alqışlarla əl çalır. Azərbaycanda Moskva nisgili ilə yaşayan çoxsaylı insanlar üçün ölkənin müstəqilliyi əhəmiyyətli deyil, belələri öz hakimiyyət ambisiyalarını hər şeydən üstün tuturlar. Elə ötən əsrin iyirminci illərində də belə olmuşdu. Milli respublikaya qarşı çıxan, bolşeviklərin maraqlarına xidmət edən “milli komunistlər”imiz hətta ermənilərlə işbirliyinə belə getmiş, daşnakların soyqırım siyasətində iştirak etmişdilər. 23 aylıq müstəqillik dönəmində Rusiyanın əlaltıları fürsət düşdükcə pozuculuq, təxribat əməlləri törətmiş, istər parlamentdə, istərsə də hökumət daxilində Rusiyanın maraqlarını təmin etmişdilər. İndi 23 illik müstəqillik dövründə də aktiv fəaliyyət göstərməsələr də, Moskvanın Azərbaycanda kifayət qədər dayaqları var. Onlar bütün sahələrdə mövcuddur - iqtidarda da, müxalifətdə də. Sadəcə münbit şərait yaranmadığı üçün hələ ki, gözləmə mövqeyində dayanaraq Kremlin komandasını gözləyirlər.
Müstəqilliyimizə xəyanət edərək Leninin işğal siyasətinə xidmət edən yerli bolşeviklərin “hədiyyəsini” Sovet dövləti vaxtında vermişdi. Stalin repressiyalarının ən böyük qurbanları elə bolşevizmin Azərbaycanda yayılmasına xidmət edən insanlar oldu. Övladlarının adlarını Leninin şərəfinə Vladlen qoyanlar ən dəhşətli üsullarla cəzalandırıldılar, sürgün olundular, güllələndilər. Çünki, Moskva Azərbaycanda məqsədlərinə nail olandan sonra daha “ərköyün” bolşeviklərə ehtiyac duymurdu. Odur ki, vaxtı keçmiş köhnə qvardiya ilə vidalaşmaq daha məqsədə uyğun sayılırdı. Tarixin ironiyası onda idi ki, bolşevizmin təntənəsi üçün hər şeydən keçən Moskva kölələri sonralar əksinqilabi fəaliyyətdə günahlandırılaraq məhv olundular.
Sovet imperiyası dağılan zaman Rusiya Azərbaycanda mövcud olan eloktoratını qorumaq üçün xüsusi tədbirlər gördü. Məfkurəsində Kremlin ideologiyası əsas olan insanlar müxtəlif vasitələrlə bütün strukturlara “paylaşdırıldı”. Rusiyanın “beşinci kolonu” Azərbaycanda həmişə olub - aktiv və ya passiv durumda. Onlar yeri gəldikdə müstəqilliyin ən fəal müdafiəçisi olur, lazım olduqda müxalifətin döyünən ürəyi, uyğun zamanda iqtidarın vuran əlinə çevrilirlər. Həmin şəxslərin hamısı Rusiyanın nəzarəti altındadır, fəal şəkildə təlimatlandırılır, fəaliyyət strategiyaları planlaşdırılır. Xüsusilə, Ukrayna böhranının yaranması ilə dünyaya meydan oxuyan Rusiya özünün “beşinci kolonunu” səfərbərliyə alıb. Keçmiş SSRİ-ni bərpa etmək istəyini gizlətməyən Putin artıq Azərbaycanda da aktiv fəaliyyətə keçib. Müxtəlif şəxslər vasitəsilə səsləndirilən bəyanatlar cəmiyyətin nəbzini tutmağa hesablanıb. Bu yolla Rusiya Azərbaycanın ictimai rəyini tədricən özünə uyğun gələn formaya salmağı hədəfləyir. Kreml Cənubi Qafqaz regionunda fəal hərəkətə keçərsə, yeni bolşeviklər dərhal fəallaşacaqlar. Təsadüfi deyil ki, Krımın işğalı zamanı Azərbaycandan Putinə dəstək bəyanatları səslənməyə başlandı. Müasir dövrümüzün nərimanovları, Həmid Sultanovları, musabəyovları təşkilatlanırlar. İqtidarla iqtidar, müxalifətlə müxalifət olan Kreml əlaltıları səbirsizliklə 11-ci Qızıl ordunun gəlişini gözləyirlər. Ölkənin təhlükəsizlik orqanlarında, hərbi qüvvələrində, polis sistemində siqnal gözləyən pavlik morozovlar üçün Putinin bir işarəsi kifayətdir. Kim təminat verə bilər ki, sabah Azərbaycan parlamentində Kreml mandatını daşıyanlar ortaya çıxmayacaq? Bu gün Azərbaycanın yarısından çoxu rus pulu ilə dolanır. Moskva istənilən an miqrantlar məsələsini gündəmə gətirməklə Azərbaycana təzyiq edir. Rusiya üçün bazarlarında alver edən həmvətənlərimiz də xüsusi önəm daşıyır. Onlar da beşinci kolonun mühüm tərkib hissəsi olmaqla Rusiyanın mühüm təsir mexanizmidir. Rusiyanın imperiya ambisiyalarını reallaşdırmasında istifadə etdiyi vasitələrdən biri də etnik münaqişələrdir. Rusiya fəallaşan kimi ölkənin müxtəlif etnik azlıqları arasında siyasi fəallıq müşahidə olunur. Elə son dövrlərdə Azərbaycanda müxtəlif etnik azlıqların hüquqlarının tapdalanması haqqında cəfəng bəyanatlar səsləndirilməsi də təsadüfi deyil. Rusiyada radikal dini qruplaşmalarda təmsil olunan xeyli sayda “mömin tərəfdarları” da az deyil. Beşinci kolonun içərisində xüsusi yeri olan “əhli Kreml” lazım olduğu təqdirdə Rusiyanın Azərbaycanı vurması üçün ən zəif nöqtədən hərəkətə keçməyə hazırdır. Azərbaycanda dini cərəyanların içərisində Rusiyadan maliyyələşən, təlimatlandırılan xüsusi qruplar mövcuddur və onlar komanda verilən kimi sabitliyin pozulması üçün öz “töhfələrini”verməyə hazırdırlar. Pyotrun vəsiyyət etdiyi dini qarşıdurma yaratmaq siyasəti Rusiya üçün hər zaman mühüm kart olaraq əhəmiyyətini saxlayır.
Bu gün Azərbaycanda “Vətən haradan başlayır” sualına “Vətən Kremldən başlayır” cavabını verənlər kifayət qədərdir. Ölkədə hökm sürən korrupsiya, rüşvət ab-havası onlara yetərincə arqumentlər qazandırır. Ukraynada işğalçılıq siyasətini reallaşdıran Rusiyanın təbliğat maşınının ən çox qabartdığı məsələ məhz insanların məmur oliqarxların əməllərindən narazılıq etməsidir. Sabah Azərbaycanda eyni ssenarini işə salmaq üçün Rusiyanın əlində kifayət qədər arqumentlər var. Leninin “fəhlə-kəndli” siyasətini davam etdirmək üçün sosial narazılıq dalğası yaratmaq bu işin ustası olan Moskva texnoloqları üçün çətin deyil. Sosial narazılq yaradan məmurların Rusiya maraqlarına xidmət etmədiyinə kim qrantiya verə bilər? Belə nəticəyə gəlmək olar ki, hökumət daxilində də beşinci kolona xidmət edənlərin sayı az deyil.
Azadlıq hər bir xalqın hüququdur. Lakin, öz hakimiyyət ambisiyalarını həyata keçirmək istəyən qüvvələr hər zaman olub və oplacaq. Rusiyanın işğalçılıq siyasətinin kölgəsində maraqlarını təmin etməyə çalışan beşinci kolon Azərbaycan üçün indi hər zamankından daha təhlükəlidir. Özünüzü beşinci kolonun təkəri olmaqdan qoruyun! Tarix belə səhvləri bağışlamır.
NICAT