Nəqliyyat nazirinin gələcək siyasi hədəfləri hakimiyyətə yiyələnməkdir

Hakimiyyət elitasında təmsil olunan, illərdir vəzifə kürsüsündə yaşlanaraq sonsuz var dövlət sahibinə çevrilən bəzi məmurlar artıq iqtidar üçün baş bəlasına dönərək addımbaşı problemlər yaradırlar. Son zamanlar Azərbaycanda yüksək mövqe tutan məmurların bir çox xarici qüvvələrlə iş birliyində olması, dini-siyasi hərəkatlara, cərəyanlara himayədarlıq etməsi əsas müzakirə mövzularından biridir. Heç kimə sirr deyil ki, ölkəmiz müxtəlif güclərin maraqlarının toqquşduğu mühüm geosiyasi əhəmiyyətə malik bölgədə yerləşir. Maraqlı qüvvələr Azərbaycanda möhkəmlənmək üçün təşkilatlanır, bir sıra dövlət məmurları ilə əlaqə yaratmaqla planlarını həyata keçirirlər. Təsadüfi deyil ki, iqtidarın ən üst düzənində yer alan məmur-oliqarxlar da belə güclərlə əlaqələr qurmaqdan çəkinməyib, bir çox hallarda onlara himayədarlıq ediblər. Bütün bunlar isə təkcə biznes əlaqələri ilə kifayətlənməyib. Ortada konkret siyasi hədəflər və iddialar var. İqtidar düşərgəsində uzun illər qüvvətlənən, böyük biznes şəbəkələrinə malik olan iri məmur oliqarxlar içərisində hakimiyyət ambisiyaları güclənən, konkret siyasi maraqlar güdən qüvvələr meydana gəlib. Belə qüvvələr özlərini Azərbaycanın gələcək siyasi hakimiyyətinin iddiaçıları hesab edir, bütün planlarını və addımlarını bu istiqamətdə qururlar.

İqtidar komandasında güclü rıçaqlara malik olan, ölkənin ən güclü məmur-oliqarxlarından birinə çevrilən nəqliyyat naziri Ziya Məmmədovun adı son dövrlər müxtəlif siyasi qalmaqallardan düşmür. Türkiyədə başlanan anti-nur kompaniyasının Azərbaycanda da geniş əks səda doğurması Z. Məmmədovun da personasını yenidən diqqətə gətirdi. Fətulla Gülən tərəfdarları ilə əlaqədə ittiham olunan məmurların adları mediyada tirajlananda nəqliyyat nazirinin də adı “unudulmadı”. Araşdırmalar nəticəsində məlum oldu ki, nazirin yaxın çevrəsində uzun illərdir ki, nurçular çox rahat şəkildə düşərgə salaraq fəaliyyət göstəriblər. Belələri Nəqliyyat Nazirliyində müxtəlif yüksək postlarda təmsil olunub, vəzifələrdə yerləşdiriliblər. Hətta nazirin oğlu Anar Məmmədovun da nurçularla əlaqəsi təsdiqini tapdı, onun Amerikada həyata keçirdiyi bir çox layihələri məhz hizmətçilər vasitəsilə reallaşdırdığı məlum oldu. Ziya Məmmədovun son zamanlarda atdığı addımlara nəzər saldıqda onun fəaliyyət planının gələcəyə hesablanmış sırf siyasi məqsədlər daşıdığını görmək olar. Məlumdur ki, nəqliyyat nazirinin adı həmişə Baş nazir postuna iddialılar içərisində yer alıb. Onun bu istiqamətdə həmişə çaba sərf etdiyi də bildirilir. Lakin, regionda baş verən son böhranlı hadisələrdən sonra nəqliyyat nazirinin siyasi iddiaları daha da böyüyüb. Ziya Məmmədovun bu gün qurduğu planlar, atdığı addımlar gələcəkdə Azərbaycanda siyasi hakimiyyətə sahiblənməyə hesablanıb. O, “X günü” planını reallaşdırmaq üçün müxtəlif variantlar üzərində işləyir, xüsusilə beynəlxalq miqyasda özünə dayaqlar yaradır. Azərbaycanın dünyada tanıtımı adı ilə təqdim olunan bu lobbiçilik fəaliyyəti, əslində gələcək siyasi hakimiyyətə gedən yolun ilk mərhələləridir.
Qərb ölkələri, xüsusilə Amerikanın müxtəlif siyasi dairələri ilə sıcaq əlaqələr yaratmaq üçün Ziya Məmmədov oğlunun “siyasi karyerasından” yararlanmaq qərarına gəlir. Azərbaycanda əsasən “ayı qalmaqalı” ilə tanınan Anar Məmmədov birdən-birə lobbiçilik fəaliyyətinə başlayır, “Azərbaycan-Amerika Alyansı”nı yaradaraq siyasi fəaliyyət müstəvisinə keçir. Təbii ki, öz böyük siyasi maraqlarını təmin etmək üçün Z. Məmmədova Qərbdə siyasi dayaqlar lazımdır. Onun Amerikada siyasi maraqlarının təmin olunması üçün nüfuzlu Gülən tərəfdarlarının xidmətlərindən yararlanması lazım idi. Türkiyəyə və dolayısıyla Amerikaya bu çıxışı saxlamaq üçün nazirin yaxın qohumları Sabir və Tənzilə Rüstəmxanlıların əlaqələrindən istifadə olunur. Həmin əlaqələr hesabına Gülən icması ilə münasibətlər yaradılır və Anar Məmmədovun Amerikada lobbiçilik fəaliyyətinin əsası qoyulur. A. Məmmədovun Vaşinqtonda, Nyu-Yorkda və bir sıra digər ABŞ şəhərlərində təşkil etdiyi lobbiçi tədbirləri Fətullah Gülənin ən yaxın çevrəsində yer alan Faruk Tabanın fəal qatqıları ilə həyata keçirilib. Türk-Amerikan Alyansının rəhbəri olan F. Taban “gənc siyasətçiyə” Amerikadakı fəaliyyətində lazımi dəstəyi verib. Təbii ki, əlaqələr qarşılıqlı olub. Faruk Taban Gülən hərəkatının reallaşdırdığı bir sıra layihələri məhz Ziya Məmmədovun maliyyə dəstəyi ilə gerçəkləşdirib. Gülən icmasına maliyyə dəstəyi verməklə nəqliyyat naziri özünün gələcək siyasi karyerası naminə Amerikadakı siyasi dairələrlə yaxın əlaqələr qurmağı hədəfləyib. Lakin, Anar Məmmədovun “Amerika lobbiçiliyini” heç də uğurlu layihə hesab etmək olmaz. Amerikanın siyasi dairələrinə “gələcəyin perespektivli siyasətçisi” kimi təqdim edilən Anar Məmmədov ABŞ-da heç də müsbət imic formalaşdıra bilməyib. Bir çox konqresmenlər, senatorlarla fotolora yayılaraq reklam olunmasına baxmayaraq onun ABŞ-dakı fəaliyyəti fiaskoya uğradı. İntellektual və siyasi baxımdan Anar Məmmədov heç də Qərb texnoloqlarında müsbət rəy formalaşdırmağı bacarmadı. Amma, təbii ki, güclü maliyyə qaynaqları hesabına Ziya Məmmədov oğlunun “Amerika diplomatiyası” nəticəsində Qərb ölkələri ilə münasibətlər qurmaqda israr edir. Anar Məmmədovun son zamanlar nəhəng mediya holdinq formalaşdırması da bu fəaliyyətin tərkib hissəsidir. Artıq bir çox saytlar, mediya orqanları satın alınaraq holdinqə daxil edilib. Nazirin Türkiyə əlaqələrində müstəsna rol oynayan Sabir Rüstəmxanlının oğlu Cəmil Rüstəmxanlının rəhbərlik etməsi planlaşdırılan media holdinq nazirin siyasi karyerasını qorumaqla yanaşı, əsas rəqiblərinin də vurulmasına xidmət etməlidir. Maraqlıdır ki, özünü müstəqil mətbuat kimi və özlərini ölkənin aparıcı qəzeti kimi qələmə verən bir çox media orqanları da bu layihələrdə aktiv iştirak edir, xüsusi fəallıq göstərirlər. Yəqin ki, yeni media holdinqin güclü maliyyə qaynaqları bir çoxlarını öz cazibəsinə sala bilib.
Hakimiyyətə iddialı siyasi qüvvəyə çevrilmək üçün təbii ki, regionun “jandarmı” olan Rusiya ilə münasibətlər qurmamaq mümkün deyil. Ziya Məmmədov bu istiqamətdə də fəal hərəkət edir. Məlumat verilir ki, nazirin Kremlə çıxışlarını saxlamaq üçün Çeçenistan prezidentinin imkanlarından istifadə olunur. Nazirin özünün və deputat qardaşı Elton Məmmədovun güclü biznes əlaqələri olan R. Kadırov Kremllə və Rusiyanın digər siyasi dairələri ilə Məmmədovların əlaqələrini qurmaq üçün öz dəstəyini verir. Ziya Məmmədovun Milyarderlər İttifaqının rəhbərliyi ilə də yaxın dostluq münasibətləri var. Telman İsmayılovla, Abbas Abbasovla olan çox sıcaq əlaqələri Ziya Məmmədovun Rusiya siyasi elitası ilə təmaslarında mühüm rol oynayır. Təbii ki, Azərbaycanda mövqeyini qorumaq üçün nazir bu münasibətlərin açıq müstəviyə keçməsinə imkan vermir. Amma, gələcək projenin reallaşması üçün Rusiyada olan dostların da dəstəyi çox önəmlidir.
Göründüyü kimi, nəqliyyat naziri bütün əlaqələrini işə salaraq gələcək siyasi karyerasını təmin etmək üçün çalışır. Sırf siyasi maraqlara hesablanan bu proje Ziya Məmmədovun hakimiyyətə yiyələnməsinə xidmət edir. “X günü” planı son zamanlar Ukrayna böhranının dərinləşməsi ilə regionda yaranan gərgin siyasi şəraitdə yenidən aktuallaşıb. Bu yolla Ziya Məmmədov özünü real siyasi güc kimi təqdim etməklə siyasi hakimiyyətə alternative sayır. Əlverişli məqam yetişən kimi nazir öz planını fəal siyasi müstəviyə keçirərək real addımlar atmağı hədəfləyir. Təmsil olunduğu komandanın “X günü” Ziya Məmmədovun gələcək siyasi karyerasının başlanğıcı olmalıdır. Çox çətin siyasi düsturdur, çoxları bu “X”oyunun qurbanları olub.
"Gündəm Xəbər"