Azərbaycanın silah təhcizatı kimə tapşırılıb?


gundemxeber.az Azərbaycan maraqlı olduğu qədər, həm də özünəməxsus ölkədir. Xüsusilə təqdimat sahəsində. Hər şey ya partlama həddinə qədər şişirdilmiş şəkildə təqdim edilir, ya da çox kiçildilmiş maket formasına salıb, əhəmiyyətsiz bir şey kimi ictimai şüura sırınır. Yəni, hakimiyyətin ən kiçik uğuru belə böyüdülür, qüsuru isə mikroskopik səviyyəyədək kiçildilir. Bu cür “dahiyanə” əxlaqi-mənəvi mühitin yaranmasını hazırkı iqtidar gözünü belə qırpmadan öz adına çıxa bilər. Bundan qürur hissi keçirmək istəyən “yap”çılar varsa da, onların menyusunda bu, “delikotes”, siyasi mətbəxində isə nailiyyət sayıla bilər. Və bunu heç də küçümsəməyin, ən azından “19 illik hakimiyyətdə nə etmisiniz” sualına cavab kimi yarayır.
İnanmırsız, diqqət edin: Hakimiyyətin ideoloji rəhbəri Ramiz Mehdiyevə “Gülərqeyt” olayı haqda soruşurlar, ən azından qızarmaq, daha məsuliyyətli olmaq və hüquq çərçivəsində cavab vermək əvəzinə, hadisəni öz adı ilə deyil, kiçildilmiş maketini düzəldərək ictimai şüura soyuqqanlıqla sırımağa cəhd edir. Olayı iki dələduzun sövdələşməsi kimi cılız bir çərçivəyə pərçim etmək istəyir. Hansı ki, huquq dövlətində bu hadisə siyasi sistemi çökürdəcək bir gücdə olan tektonik olaydır. Ancaq bunu ad dəyişdirmək yolu ilə, daha doğrusu yolsuzluğuyla yola verdiklərini sanırlar və biz eləcə də anlayırıq. Amma soruşan yoxdur ki, ay Ramiz müəllim, bəs MTN mayorunun oğurlanmasında ölkənin ən ünlü generallarının isimləri də hallanır, bunun adını nə qoyaq? Soruşan olmadı. Görünür, olayın adını qoymaqda bəzi çətinlikləri olduğundan dolayı isim qoyma mərasimi hələlik təxirə salınıb. Cavab olmadığ üçün də, sual da olmadı. Ancaq hadisələrin inkişafı göstərir ki, belə getsə, olayın adını başqaları qoyacaq. Və bu dəfə kiçildilmiş maket formasında deyil, hər şey adına layiq olacaq. Necə ki, gec-tez su axıb, çuxurunu tapdığı kimi...
Bu hakimiyyətin uğurlarını böyüdüb, qüsurlarını kiçiltdiyini dedik. Növbəti olayın hansı kriteriyaya uyduğunu isə oxucular müəyyənləşdirəcək. Hadisə Nazirlər Kabinetində vaqe olub. Baş nazirin rəsmi görüş zamanı halının pisləşməsi və bunun fonunda baş nazirin birinci müavini Yaqub Eyyubovun onun yerinə qollarını çırmanması hadisəsi belə o olayın yanında yalan olub. Belə ki, mətbuatda gedən bu xəbərə aşağı-yuxarı ad qoymaq, anlamaq olar. Çünki insanların xəstələnməsi təbii və mümkün bir haldır. Başqa birisinin yıxılanın yerinə göz dikməsi də xəstəlik kimi doğaldır. İraq baş nazirdən, necə deyərlər, “biri ölməsə, biri dirilməz”. Yəni, bunu anladıq. Amma indi yazacağımız bu sətirləri necə, görək anlayacaqsınızmı?
Nazirlər Kabinetindəki mənbənin verdiyi məlumata əsasən, Azərbaycanın müdafiə qüdrətinin artırılması ilə bağlı ordunun silah-sursat təhcizatı baş nazirin 1-ci müavini Yaqub Eyyubova tapşırılıb. Bundan sonra ən müasir silah və texnikanın ölkəyə ucuz, ya baha alınıb gətirilməsindən o, sorumludur. Region ölkələrinin silah arsenalının ciddi təhlil olunub, ona adekvat ən müasir müdafiə və hücum texnikalarının müəyyənləşdirilib, alınması da Yaqub Eyyubovun səlahiyyət çərçivəsinə aid edilib.
İlk baxışdan bu, normal görsənə bilər. Ancaq müasir silahların texniki göstəricilərindən tutmuş, təyinatı və düşmənin əlində olanlarla müqayisəli təhlilin aparılmasını düşünəndə xoruzun quyruğu görsənməyə başlayır. Çünki ölkədə məmə yeyəndən, pəpə yeyənə qədər hamı bilir ki, Yaqub müəllim hərbçi deyil, bu yöndə də ciddi bir anlayışı yoxdur. Bəs onda necə ola bilər ki, ölkənin müdafiə qüdrətinin taleyi bu yöndə anlayışsız birinin ümidinə buraxılır? Bu, ölkənin gələcək taleyi ilə oynamaq kimi bir şeydir.
Sabah ölkəyə nəm fitillərin, yararsız helikopter və qırıcı təyyarələrin, tankların, silah-sursatların alınıb gətirilməyəcəyinə kim zəmanət verə bilər? Hərbçi olmayan birinə silah alınmasının həvalə edilməsi dəmirçinin balet oynaması kimi bir şeydir. Niyə bu ölkədə hər şey öz adı ilə çağırılmır, hər şey öz yerində deyil? Bir şeyi öz yerindən etmək doğru olmadığı kimi, silah alverinin Yaqub Eyyubova tapşırılması da zülmdür. Avtomat patronu ilə pulemyot patronunu ayırd edə bilməyən birinə ən müasir raket və texnikaların alınmasını həvalə etmək hansı məntiq və etikaya sığar? Yaqub müəllim texniki elmlər üzrə mütəxissis ola bilər. Ancaq bu ən müasir silah məsələsində keçərli deyil. Bunun üçün yüksək peşəkarlıq tələb olunur ki, bu vaxta qədər Eyyubovun idarəetmədəki davranışları buna imkan vermir. Yaqub müəllimi biz yalnız xarici qonaqların qarşılanma və yola salınma mərasimlərində epizodik olaraq görməyə adət etmişik. O, daha çox kölgədə qalmağı tərcih edən birini xatırladır. Gölgədə isə günəş işığı olmadığından alatoran bir mühit hökmran olur. Eynən silah alverində olan qaranlıq işlər kimi... Yaqub müəllimin qaranlıq aşiqi olduğunu bilmirik. Amma düşünürük ki, silah alverinin onun kurasiyasına verilməsi kimi məsuliyyətli bir işin ona tapşırılmasında “qaranlıq” faktoru əsas götürülə bilər. Düşünmək cinayət olmadığı kimi, qarşı tərəfin fikirlərini öyrənməyi xəyal etmək də bizim haqqımızdır. Ona görə də bu haqda qarşı tərəfin irad və təklifləri varsa, biz dinləməyə və dərc etməyə hazırıq.

Eyyub Məmmədov