“Gündəm-xəbərə”ə şok sənədlər və disk təqdim olunub;
Prorektorların iştirak etdiyi iclasda küçə söyüşləri işlədilib

Professor Şəmsəddin Hacıyev haqda dəhşətli ittihamlar irəli sürdü

Mart ayının 5-də prezident İlham Əliyevin sərəncamı ilə Azərbaycan Dövlət İqtisad Universitetinin rektoru təyin olunan Ədalət Muradov sələfi Şəmsəddin Hacıyevin kadrları ilə bağlı sərt mövqe tutmasından sonra sözügedən universitetdə gərginlik hökm sürür.
Bu barədə qəzetimizə Azərbaycan Dövlət İqtisad Universitetindən məlumat daxil olub. Məlumatda bildirilir ki, yeni rektorun sonrakı addımlarını əngəlləmək üçün keçmiş rektorun yaxın ətrafı universitetdə yaşananların ictimailəşməsindən xüsusi maraqlı qüvvəyə çevriliblər: “Onlar bütün imkanları ilə çalışırlar ki, universitetdə rektorun atdığı hər bir addım cəmiyyətdə mənfi istiqamətdə geniş müzakirəyə səbəb olsun. Çünki belə də onlar universitetdəki mövqelərini nəinki qoruya bilərlər, hətta başda prorektor Damət Bağırov və Şəmsəddin Hacıyevin qızı Çeşmi Hacıyevanın vəzifələrində qalması təmin edilər. Ancaq hadisələrin gedişi göstərir ki, Şəmsəddin Hacıyev və yaxın ətrafının bu planı yeni rektor Ədalət Muradovu dayandırmaq gücündə deyil: “Ədalət Muradov da bir neçə gediş edərək, Ş.Hacıyevin tərəfdarlarının “mərkəzi nüvəsi”ni zərərsizləşdirmək istiqamətində önəmli addım atdı. O, hələki prorektorlar - Əvəz Bayramovla Damət Bağırovu vəzifələrindən saxlamaqla yanaşı, onlara qarşı olduqca səmimi davranır. Rektor onlarla yanaşı, universitetin kadrlar şöbəsinin müdiri ilə hüquqşünasını da hələki vəzifələrində saxlayıb. Hansı ki, hər iki şəxsin barəsində də rektorda olduqca ciddi faktlar var. Görünür, o, həmin faktlardan istifadə etmək üçün münasib zamanı gözləyir”.
Xəbərə görə, vaxtı ilə universitetdə Şəmsəddin Hacıyevin korrupsiya şəbəkəsinin başında dayananlardan arasında olan Əsəd Mirzəyevi zərərsizləşdirən Ədalət Muradov Damət Bağırov və bir neçə vəzifəli şəxsin isə universitetdən birdəfəlik uzaqlaşdırılmasını planlayıb: “Artıq Şəmsəddin Hacıyevin universitetdəki qohumları və adıçəkilən vəzifəli şəxslər böyük qorxu altındadırlar. Çünki universitetdə bir neçə qurumdan ibarət heyət yoxlama aparır. Maraqlı budur ki, o qruplardan birinin yoxlamasını universitetin kollektivinin mütləq əksəriyyəti xəbərsizdir. Yəni təftiş məxfi aparılır. Buna görə keçmiş rektorun komandasının yeni rektora müqavimət göstərmək gücləri də minimuma enib”.
Məlumatda o da vurğulanır ki, Şəmsəddin Hacıyev gələn il keçiriləcək parlament seçkisində kənarda saxlanılacağından ehtiyat edərək qızı Çeşmi Hacıyevanın elmi ad almasını da sürətləndirib: “Aprelin 30-da o, İqtisad Universitetində rəhbəri olduğu Müdafiə Şurasında qızının elmi işini müdafiə etməsinə şərait yaradıb. Görünür, rektor hazırda universitetdə İstedadlar qrupunun rəhbəri olan qızının gələcəyini bəri-başdan təminat altına almaq istəyir”.
Yeri gəlmişkən, son bir həftə ərzində redaksiyamıza Şəmsəddin Hacıyevin keçmiş müşaviri və həmin universitetdə 40 ilə yaxın kafedra müdiri olan professor, iqtisad elmləri doktoru Bədirxan Musayev tərəfindən prezident İlham Əliyev və digər rəsmilərə ünvanlanmış bir neçə müraciətin surətləri də daxil olub. Həmin müraciətlərə professorun prezident İlham Əliyevin qəbuluna düşmək üçün topladığı 2000 nəfərə yaxın müxtəlif sahələrdə çalışan elm adamlarının imzaları da əlavə olunub. Hazırda cəmiyyətin müxtəlif kəsimlərindən imza toplamasının davam etdiyini bildirən B. Musayev keçmiş rəhbərliklə bağlı sərt ittihamlar səsləndirib.
Professor yazır ki, təhsil sahəsində nəzarət edən məmurlar Şəmsəddin Hacıyevin milyardları, havadarları və vəzifələri qarşısında aciz olmasaydı, 2011-ci ildə qanunsuz azad edildiyi vəzifəsinə bərpa edilər, keçmiş rektor isə həm universiteti, həm də məhkəmələri alverxanaya çevirdiyi üçün çoxdan həbsxanada islah olunmalıydı: “Lakin bunların heç biri olmayıb. Tam əksinə, hələ də Ş.Hacıyevin təmir-tikinti işlərində dövlət vəsaitini mənimsəməsi, struktur islahatları adı altında bəd və bədnam fəaliyyəti, bölgələr arasında nifaq salması və sair təkzibedilməz faktlara hüquqi qiymət verilməyib. Bu isə mənim hüququmu kobud pozulmasına səbəb verməkdədir. Bəli, Heydər Əliyevin və Sizin siyasətinizə sadiq qaldığım üçün 3 ildir Hacıyev tərəfindən əzab-əziyyətlərə məruz qalmışam. İş o yerə qalıb ki, məhkəmə hakimləri belə, Ş.Hacıyevin puluna satılıb. Və hakimlər onun bəd əməllərini pərdələmək və universiteti alverxana mərkəzinə çevirməklərini gizlətmək üçün kafedra seçkisi üzrə komissiyasının video-kasetini (bizim təkidimizə baxmayaraq) nümayiş etdirməkdən imtina və digər çoxsaylı ədalətsizliklərə imza atmaqla ədalət məhkəməsini hörmət və nüfuzdan salmaqda davam edirlər.
Müraciətdə daha sonra bildirilir: “İnkar olunmaz sənədlər əsasında Ş. Hacıyevin rüşvətxorluğu və çoxsaylı saxtakarlıqlarına qarşı mübarizə aparıb, onu ifşa etdiyimə görə məndən intiqam almaq məqsədi ilə bir həftə ərzində məni üç vəzifədən (sənədləri saxtalaşdırmaq yolu ilə) qeyri-qanuni azad edib, universitet binalarına daxil olmağa qadağa qoymuş və mənə «vətən xaini» damğası vuraraq, vətənimi zorakı yollarla tərk etməyə cəhd göstərmişdir.
Ş.Hacıyev rektorluğu dövründə mənim kafedra müdirliyimdən imtina ərizəmi nəzərə almadan, Təhsil Nazirliyinin təlimatının 2.9 maddəsini pozaraq, məni seçki komissiyasının iclasına dəvət etdirdi. Mən seçki komissiyasının iclasında imtina ərizəmi oxuyub, mənim idarəetmə qabiliyyətim və bacarığım haqda ictimai rəy sorğusu keçirilmədiyini, müvafiq kafedra və ekspertlərin rəylərinin olmadığını nəzərə alıb, seçki komissiyasında kafedra müdiri seçilmək haqda müzakirənin keçirilməsinin heç bir hüquqi əsası olmadığını bildirib, zalı tərk etdim. Belə şəraitdə Ş. Hacıyev tərəfindən seçki komissiyasında müzakirə aparmadan məni gizli səsə buraxdırıb, yeşikdə qoydurması yeni rəhbərlik tərəfindən nəzərə alınmır.
Hörmətli cənab Prezident! Universitetdə mənim yaşımda 17 nəfər, mənim yaşımdan çox 22 nəfər, əməkdaşların əksəriyyəti vəzifə ilə təmin olunmuşlar. Necə olur ki, Ş.Hacıyev kafedra müdiri, 4 ştat aspirant və dissertantlara rəhbər (25-30 nəfərə), millət vəkili, komissiya sədri, təşkil etdiyi şirkətlərə rəhbərlik edə bilir, mən isə yaratdığım "İqtisadi Kibernetika” ixtisasının kafedrasında professor və ya məsləhətçi kimi qəbul edilə bilmirəm?
Necə olur ki, Ş.Hacıyevin təhlükəli dəstə üzvləri kafedra müdiri əvəzi, 0,5 ştat əvəzçiliklə kafedra əməkdaşı, 250 saat hesabı dərs deyir və tam pensiya ilə təmin olunurlar, mən isə İqtisadi Kibernetika ixtisasının yaradıcısı və təhsil sisteminin milli qəhrəmanı kimi yaratdığım və formalaşdırdığım “İqtisadi Kibernetika” kafedrasında professor və ya məsləhətçi ola bilmirəm?
Son üç ildə 60 dəfə rayon, apellyasiya və ali məhkəmələrdə Ş. Hacıyevin cinayətləri müzakirə olunub. Müzakirələrdə 120 nəfər hakim iştirak edib. Hakimlərin bəzisi qabaqcadan səmimi etiraf edirlər ki, ədalət və həqiqət sənin (Musayev B) tərəfindədir, ancaq Ş.Hacıyev imkan vermir ki, ədaləti bərpa edək.
Hörmətli cənab Prezident! Sabiq rektor Ş.Hacıyevin sayəsində 10 il ərzində Dərbənd filialına qəbul olan tələbələrin 60-70%-i nə qəbul, nə də semestr imtahanları vermədən (onların imtahanlarını valideynləri verir) 40-50 min manata diplom əldə ediblər. Bir çoxları hərbi xidmətdə olduqları halda, birinci kursu oxumadan, ikinci kursa köçürülüblər. Riyaziyyat fənnindən bilikləri sıfır olduğu halda, qəbul və semestr imtahanlarından əla və yaxşı qiymətlər yazılır. Bunlar Ş. Hacıyevin vəzifə başında cinayətləri deyildirmi? Müvafiq orqanlar bunlara nə üçün göz yumurlar?
Hörmətli cənab Prezident! Necə olur 100-200 manat rüşvət alanlar həbs olunur, amma Dərbənd filialına tələbə qəbulundan 145-150 milyon manat, daxili və xarici köçürmələrdən 80-100 milyon manat, digər mənbələrdən 350-400 milyon manat rüşvət yığan Ş.Hacıyev həbs olunmaq əvəzinə, günəş kimi yanıb, ulduz kimi parıldayır. Bunlarla əlaqədar olaraq Baş prokurora yazdığım müraciətlərə cavab olaraq, aldığım məktubda deyilir: “Təhsil Nazirliyindən aldığımız məktubdan məlum olmuşdur ki, Sizin müraciətinizdə göstərilənlər Ş.Hacıyev tərəfindən araşdırılmış və öz təsdiqini tapmamışdır”. Axı, Ş.Hacıyev və ya belə hərəkətə yol verən kim deyər ki, bu, düzdür? Niyə bunlar onun üstünə geri qaytarılıb? (İstənilən vaxt cavabları təqdim edə bilərəm).
Qeyd edim ki, harınlıq və özbaşınalığın pik nöqtəsi sayıla biləcək dövlət səlahiyyətini mənimsəyərək Şəmsəddin Hacıyevin mənə qarşı «Bədirxan Musayevə «Vətən xaini» damğası vuraraq universitetdən qovmuşam» ifadəsi ilə bağlı onu məhkəməyə də vermişəm. Lakin nə Nizami, nə də Xətai rayon məhkəmələri nəinki şikayətimə baxıb, bir-birinin üzərinə göndərməklə, keçmiş rektorun «caynağı»nın hakimləri necə qamarlamasının bariz təsdiqidir”.
Son olaraq onu da qeyd edək ki, sözügedən universitetdəki «mavi qalmaqalı» ilə bağlı redaksiyamıza məhkəmə qətnamələri ilə yanaşı, Şəmsəddin Hacıyevin yaxın ətrafından ibarət komissiyasının keçirdiyi iclaslardan birinin video-kaseti daxil olub. Heyrət doğuracaq sənədlər və diskdə elm adamlarının küçə səviyyəsində söyüş və təhqirlərin işlətməsi universitetə ciddi ləkə gətirir. Maraqlı budur ki, universitetin prorektorlarının iştirak etdiyi həmin iclasda qadınlar da olub. Lakin görünür, küçə söyüşləri işlədənlər qadınlara da əhəmiyyət verməyiblər. Həmin «mavi olayı» ilə bağlı məhkəmə qətnamələri və disklə bağlı yazını növbəti sayımızda oxuya bilərsiniz.
Qarşı tərəfi də dinləməyə hazırıq.
FƏRİD