İqtisad Universitetinin rektorunun adı diplom korrupsiyasında hallanır

Bu gün Azərbaycan Respublikasının prezidentinin sərəncamı ilə İqtisad Universitetinin rektoru,millət vəkili,Milli Məclisin Elm və Təhsil komissiyasının üzvü,Şöhrət ordenli Şəmsəddin Hacıyev tutduğu vəzifədən azad olunmuşdur.Həmçinin prezidentin fərmanı ilə əvvəllər İqtisadiyyat və Sənaye Nazirliyində iqtisadi siyasət,təhlil və proqnozlaşdırma şöbəsinin müdiri vəzifəsində çalışmış Ədalət Muradov Universitetin yeni rektoru təyin olunub.Son günlərdə birbaşa prezident aparatının nəzarəti altında İqtisad Universitetində aparılan yoxlamalardan sonra gözlənilən təyinat baş tutub.
Son dövrlərdə rəhbərlik etdiyi təhsil müəssisəsində baş verən qanunsuzluqlar,cinayət tərkibli əməllərlə gündəmdən düşməyən rektor gözlənildiyi kimi artıq ölkənin ən çox korrupsiyalaşmış və daima müzakirə obyekti olan universitetinin rəhbərliyindən azad edildi.Vəzifə pillələrində yüksəlişinə görə daha çox sabiq İqtisadi İnkişaf naziri Fərhad Əliyevə borclu olan Şəmsəddin Hacıyevin adı son zamanlar daha çox saxta diplom əməliyyatlarında hallandırılırdı.Nəzərinizə çatdıraq ki,sabiq rektor “diplom əməlıiyyatını” daha çox İqtisad Universitetinin Dərbənd filialı vasitəsilə həyata keçirmişdir.Dərbənddə yaşayayan azərbaycanlıların təhsil problemlərinin həll olunmasına yardım məqsədilə mərhum prezident H.Əliyevin təşəbbüsü ilə yaradılmış İqtisad Universitetinin Dərbənd filialı son zamanlar təhsil sahəsində ən çox korrupsiya və rüşvət faktlarında adı hallandırılan bir təhsil müəssisəsi idi.Dəfələrlə bildirildiyi kimi Dərbənd filialı sabiq rektorun “diplom bazarında” ən mühüm rol oynayan bir obyekt olmuşdur.Dərbənd filialının rektoru Rövşən Göyüşovla işbirliyi quran Şöhrət ordenli rektor bu yolla hər il tələbə qəbulundan və köçürmələrdən külli miqdarda vəsait əldə etmişdir.Belə ki,Azərbaycanda tələbə adına layiq görülməyən abituriyentlər daxili imtahan adı ilə Dərbənd filialına “daxil olmuş”, bir ildən sonra isə İqtisad Universitetinə “köçürülməklə” öz təhsillərini davam etdirərək diplom almışlar.Təbii ki,bu “mütərəqqi” təhsil sistemi heç də havayı olmamışdır.Dərbənd filialına qəbul olunmanın qiyməti 10-15 min manat,həmçinin İqtisad Universitetinə “Perevod” olunmanın da dəyəri fakultədən asılı olaraq 10-15 min manat arasında dəyişmişdir.Hər il Milli Məclisdə elm və təhsilin inkişafı naminə xeyli çaba sərf edən Şəmsəddin müəllimin “qayğıkeşliyi” nəticəsində neçə-neçə gəncimiz bu yolla tələbə adına “layiq görülmüşdür”.Verilən məlumatlara görə təkcə ötən ilin dekabrından indiyə kimi 20-yə yaxın tələbə rektorun “köçürmə”əməliyyatından yararlanmışdır.Ümumiyyətlə hər il bu yolla yüzlərlə tələbənin “köçürüldüyünü” nəzərə alsaq sabiq rektorun “köçkünlərin” hesabına nə qədər qazandığını düşünmək olar.Verilən məlumatlara görə hər il universitetə 3000 tələbə qəbul olunsa da məzun olanların sayı 4500-ə qədər olurmuş. Məhz Şəmsəddin Hacıyevin bu “köçürülmə” əməliyyatlarının qurbanı olduğu bildirilir.Son zamanlar saxta diplom qalmaqallarının gündəmdən düşməməsi də belə deməyə əsas verir.
Şəmsəddin Hacıyevin rektorluq dönəmi həmçinin İqtisad Universitetinin ən çox rüşvət və korrupsiya faktlarında adı hallandırılan bir dönəmi olmuşdur.Universitetdə hökm sürən rüşvət ab-havası haqqında zaman-zaman ilginc faktlar aşkrlanmış və mediada işıqlandırılmışdır.İqtisad Universitetini özününküləşdirməyi bacaran Ş.Hacıyevin təhsil sahəsindəki “biznes dövriyyəsi” hər il on milyonlarla ölçülürdü.Bir semestr ərzində burada qiymət almanın “qiyməti”nin 3-5 min manat arasında dəyişdiyi bildirilirdi.Rəhbərlik etdiyi universiteti tamamilə qohumbazlıq,tayfabazlıq yuvasına çevirdiyi bildirilən Ş.Hacıyevin rəhbərliyi dövründə çoxlu sayda ziyalılar bu elm müəssisəsindən uzaqlaşdırılmışdır.Universitetdə bütün mühüm postlara öz yaxınlarını yerləşdirən sabiq rektor İqtisad Universitetində rüşvət piramidasının yaranmasına şərait yaratmışdır.Təsadüfi deyil ki,millət vəkilinin rəhbərliyi dönəmində İqtisad Universiteti mətbuatda ən çox adı hallandırılan bir təhsil müəssisəsi olaraq reytinqlər qırmışdır.Xüsusilə son vaxtlar bütün diqqətləri öz üzərinə çəkmiş “saxta diplom” əməliyyatlarında da yenə də ilk olaraq nəzərlər İqtisad Universitetinə və onun Şöhrət ordenli rektoruna yönəldi.
Deyilənə görə hazırki təhsil naziri Mikayıl Cabbarov da Şəmsəddin Hacıyevin tələbəsi olub və sabiq rektor son zamanlar bununla xüsusi olaraqfəxr edirmiş.Lakin,göründüyü kimi elə diplom verdiyi tələbəsinin nazirliyi dövründə Şəmsəddin Hacıyev diplom qalmaqalına görə də işdən kənarlaşdırıldı.Neynəyəsən,bumeranqı hara atsan da yenə də üstünə qayıdır...

Nicat Mahmudov