Bakı Apellyasiya Məhkəməsinin hakimi Vaqif Mursaqulov Azərbaycan Dövlət İqtisad Universitetinin sabiq rektoru, deputat Şəmsəddin Hacıyevə qarşı xüsusi ittiham qaydasında (Cinayət Məcəlləsinin 147.2-ci maddəsi ilə) verilmiş şikayəti icraata qəbul etməkdən imtina edib.

Bu barədə Mia.az-a verilən məlumata görə, hakim Vaqif Mursaqulov Xətai rayon Məhkəməsinin qərarını qüvvədə saxlamaqla, Şəmsəddin Hacıyevin sabiq müşaviri, iqtisad elmləri doktoru, universitetdə kibernetika elminin yaradıcısı Bədirxan Musayevin Ali Məhkəməyə və ölkə prezidentinə müraciət etməsinə zəmin yaradıb.

Mia.az-a verilən məlumata görə, iddiaçı Bədirxan Musayev prezidentə müraciətində hakim Vaqif Mursaqulovun belə bir qərar verməsində Şəmsəddin Hacıyevlə Bakı Apellyasiya Məhkəməsinin sədri İman Nağıyevin təzyiqinin əsas rol oynadığını bildirib: «Şəmsəddin Hacıyev İman Nağıyevi pulunun və mandatı ilə tam təsir altına alıb. İş o yerə çatıb ki, Şəmsəddin Hacıyev «Qafqazinfo» saytında məni ən ağır cinayətdə ittiham edib və bunu da "Yeni Müsavat” başda olmaqla bir neçə mətbu orqan da tirajlayıb. Şəmsəddin Hacıyev orada deyib ki, «Mən, Bədirxan Musayevə Vətən xaini damğası vuraraq vəzifələrindən qovmuşam». Onun bu və ya digər böhtançı və cinayət tərkibli açıqlamalarını sübut etmək üçün barəmdə verdiyi əsassız əmrləri də məhkəməyə təqdim etmişəm. Orada da mənim işdən azad olunmağım səhhətimlə əlaqələndirilib. Halbuki, bunun özü də tamamilə əsassız verilmiş əmr olub».



Professor deyir ki, Şəmsəddin Hacıyevin ölkə prezidentinin və məhkəmələrin səlahiyyətini mənimsəyərək onu Vətən xainliyində ittiham etməsi haqda məhkəməyə müraciət etsə də, hakimlər qeyri-qanuni olaraq şikayətinə baxmaqdan imtina edirlər: «Xətai rayon Məhkəməsinin hakimi İbrahim İbrahimli hətta açıq şəkildə protokolu saxtalaşdıraq demədiyim sözləri oraya yazıb. Sonra isə tamamilə əsassız şəkildə iddia ərizəmi icraata qəbul etməkdən imtina edən qərar verib. Vaqif Mursaqulov Şəmsəddin Hacıyevin satın aldığı İman Nağıyevin tapşırığı ilə İbrahim İbrahimlinin məhkəmə tarixinə qara ləkə kimi düşəcək qərarını qüvvədə saxlayıb».

Sonda professor ölkə prezidenti İlham Əliyevdən həmin hakimlər barəsində tədbir görülməsini xahiş edib.

Açıqlama ilə bağlı qarşı tərəflərin fikirlərini də dinləməyə hazırıq.