İqtisad Universitetindəki qalmaqal yeni frazaya keçdı, professor başqa tələblər irəli sürdü

Azərbaycan Respublikası Milli Məclisinin deputatı, Dövlət İqtisad Universitetinin sabiq rektoru, hazırda həmin universitetdə kafedra müdiri olan Şəmsəddin Hacıyevə qarşı şok iddia qaldırılıb.
Bu barədə «Gündəmxəbər»ə verilən məlumata görə, deputat Ş.Hacıyev Cinayət Məcəlləsinin dörd maddəsi ilə - 294.2.9 (Sübutların saxtalaşdırılması), 308-ci maddə ( Vəzifə səlahiyyətlərindən sui-istifadə,) 309-cu maddə ( Vəzifə səlahiyyətlərini aşma) və 310-cu maddənin (Vəzifəli şəxsin səlahiyyətlərini mənimsəmə) müvafiq bəndləri ilə təqsirləndirilərək, xüsusi ittiham qaydasında məhkəməyə verilib.
Bu barədə qəzetimizə açıqlama verən İqtisad Universitetinin professoru, iqtiisad elmləri doktoru Bədirxan Musayev deyir ki, deputatın bu maddələrlə cinayət məsuliyyətinə cəlb edilməsi üçün, yetərincə ciddi təkzibolunmaz əsasları var:
«Yəqin məlumatınız var ki, Şəmsəddin Hacıyev hələ 2011-ci ildə məni rektorun müşaviri və 40 il rəhbərlik etdiyi kafedra müdiri vəzifələrindən saxta və qanunsuz əmrlərlə azad etdi. O, bu əmrləri verərkən, saxta sənədlərə əsaslanıb. Bundan əlavə, professorluğumla bağlı əmr olmadığı halda, universitetə buraxılmağıma da qadağa qoyuldu. Bununla bağlı keçirilən məhkəmələrə saxta sənədlər təqdim olundu. Bu azmış kimi, elə sənədlər var ki, o, vəzifə səlahiyyətlərindən sui-istfadə edərək, bunları da məhkəməyə və mənə təqdim etməkdən yayınıb».
İqtisad elmləri doktoru bildirir ki, o, kafedra müdiri kimi hələ 22 mart 1972-ci ildən kafedranın professoru seçilib: «Ərizəm əsasında kafedra müdiri, dekan və prorektor vəzifələrindən çıxan zaman, təlimata əsasən, professor vəzifəsini həmişə özümdə saxlamışam. Təlimatların dəyişilməsi ilə əlaqədar, 02/XII-2008-ci ildən 11/XI-2011-ci ilə kimi professor vəzifəsini aşağıdakı inkarolunmaz faktlara əsasən yerinə yetirmişəm:
1) Rektorun 28.02.2006-cı il tarixli 20/3 nömrəli əmrinə əsasən 6-cı dəfə 5 il müddətinə kafedra müdiri və kafedranın professoru seçilmişəm.
2) Kafedra tərəfindən 5 il müddətinə hər il üçün 700-800 saat tədris yükü ayrılmış və rektorat tərəfindən təsdiq edilmişdir. (tədris yükü ilə bağlı sənədləri təqdim edə bilərəm).
3) İllər üzrə tədris yükünü yerinə yetirmək haqda, hesabatım rektorat tərəfindən təstiq edilmişdir,
4) Hər ay mühasibatlıq tərəfindən professor maaşı hesablanmış və həmin maaş aylar üzrə 1400-1500 manat məbləğində 2009, 2010 və 2011-ci illər üzrə almışam .
5) Rektorat tərəfindən maaşım haqda verilən hər iki arayışla, saxta olduğundan həqiqəti təmin etmək məqsədilə, bankdan arayış alıb təqdim etmişəm.
Sadaladığım bu faktların hər birini təsdiq edəcək sənədləri sizə təqdim edirəm. Baxın və özünüz qiymət verin. Bəli, professor vəzifəsindən azad olmaq haqda əmr olmadan, əmr əmək kitabçamda qeyd edilmədən, əmrin surətini rektorat tərəfindən mənə imza etdirib təhvil vermədən, yuxarıda göstərilən şərtlər daxilində, mən professor vəzifəsini özümdə saxlamışam. Çünki təlimata əsasən, işdən çıxmaq, başqa işə keçmək və onun səbəbləri əmək kitabçasında əks olunmalıdır. Əmr əmək kitabçamda öz əksini tapmayıb. Ortada olan təkzibolunmaz sənədlərə rəğmən, bu gün də Şəmsəddin Hacıyevin qanunsuz əməlləri səbəbindən, mən haqqımı bərpa edə bilmirəm. Və nəhayət, bunların aradan qaldırılması üçün, onun barəsində 4 maddə ilə məsuliyyətə cəlb edilməsini tələb etmişəm».
Bədirxan Musayev bildirir ki, artıq onun şikayəti Nəsimi rayon Məhkəməsinə təqdim olunub: «Yəqin ki, yaxın günlərdə məhkəmə prosesi başlayacaq».
Professor «Gündəmxəbər»ə deyib ki, o, Şəmsəddin Hacıyevə qarşı Cinayət Məcəlləsinin 147 və 148-ci maddələri ilə də, xüsusi ittiham qaydasında şikayət verib: «O, «Qafqazinfo» saytına «Mən Bədirxan Musayevə «Vətən xaini» damğası vuraraq işdən qovmuşam» başlığı adı altında açıqlama verib. Həmin açıqlama bir neçə qəzetdə də yayılıb. Orada mənə qarşı cinayət xarakterli ittihamlar yönəldib. Üstəlik o, dövlətin və onun ali rəhbərliyinin səlahiyyətini mənimsəyərək, haqqımda «Vətən xaini» ifadəsini işlədib. Buna görən Şəmsəddin Hacıyevi məhkəməyə verdim. Hakimləri pulunun və mandatının gücü ilə təsirdə saxlayan bu adam, şikayətimin icraata qəbul edilməsinə aylarla mane olsa da, nəhayət ki, Nəsimi rayon Məhkəməsində işə baxıldı. Orada onun vəkili Şəmsəddinin belə söz demədiyini və sayt və «Yeni Müsavat» qəzetinin guya xəbəri olmadan, onun adından yalan yazdığını iddia etdi. Məndə hakimə «əgər elədirsə, niyə indiyədək həmin media orqanlarına çıxıb, təkzib tələb etməyib?” deyə sual etdim. Lakin təbii ki, hakim deputata qarşı çıxa bilməzdi və bu səbəbdən suçu medianın üzərinə ataraq, özünü və deputatı təmizə çıxarmağa çalışdı. Yəni, bu adam dara düşəndə onun açıqlamasını yayan jurnalistləri də satmaqdan utanmayıb. Hazırda rayon məhkəməsinin qərarından apellyasiya şikayəti vermişəm. Sonadək bu məsələnin üzərində dayanıb, onu buna görə də cəzalandırmağa nail olacağam».
Sonda professor bildirib ki, o, Şəmsəddin Hacıyevlə birgə universitetin yeni rektoru Ədalət Muradovu da məhkəməyə verib: «Bəli, mən, üzləşdiyim haqsız vəziyyətlərlə bağlı məcbur qalıb, universitetə və onun hazırkı rektoru, hörmətli Ədalət Muradova qarşı da mülki iddia qaldırıb, 60 il işlədiyim universitetə daxil olmağımı və professor kimi fəaliyyətimi davam etdirməyimin təmin olunmasını xahiş etmişəm. Bununla bağlı Səbail rayon Məhkəməsində iddia da qaldırmışam. Yəqin ki, bununla bağlı yaxın günlərdə məhkəmə prosesi başlayacaq».
Yazıda adları hallanan tərəflərin də mövqeyinin dərcinə hazırıq.

Cəfər Mərdanoğlu