Ramiz Mehdiyev Kremlin ssenarisində baş rolda

Rusiya Azərbaycan iqtidarındakı adamlarını qorumaq üçün irimiqyaslı diversiya-təxribat hərəkətlərinə start verəcək. Bu barədə etibarlı mənbələrdən redaksiyamıza məlumat daxil olub. Məlumatda bildirilir ki, xüsusilə Azərbaycanda daha həssas məqamlar olan ordu və Qarabağ problemi ilə bağlı olaraq mübarizənin aparılması nəzərdə tutulur.
Bildirilir ki, yaxın zamanlarda Bakının mərkəzində, Yasamal rayonunda yerləşən Bakı Dövlət Universitetlərindəki köçkünlərin şəhərin kənarında Müşfiq qəsəbəsində inşa edilmiş şəhərciyə köçürülməsi ilə bağlı etirazlar da təşkil edilə bilər. Məlumatlara görə, son zamanlar BDU-nun yataqxanasında məskunlaşmış köçkünlərin şəhərdən kənara köçürülməsinə etiraz etmək üçün əhali arasında müxtəlif söhbətlər aparılır. Hətta şaiələr də buraxılır.
Maraqlıdır ki, siyasi şərhçilər də məhz Rusiyanın Azərbaycandakı Qəbələ RLS-dən imtina etməsi, «Miylarderlər konseyi»nin formalaşması və sair kimi siyasi projeləri də təsadüf kimi qiymiətləndirilmir. Həmçinin də son zamanlar hakimiyyət daxilində daha çox prezidentə yaxınlığı ilə tanınan və islahatçı gənc komanda üzvlərinin Ramiz Mehdiyevi hədəfə alması da Rusiya ilə Azərbaycan iqtidarı arasında baş verən savaş kimi xarakterizə edilir.
Görünən odur ki, faktiki olaraq rəsmi Bakı Kremldən siyasi asılılıqdan xilas olmağa cəhd etdikcə, daxildə sabitliyin pozulmasına səbəb olan bütün təxribat xarakterli elementlər görünməyə başlayıb. Görünür bir şəxsin deyil, bütövlükdə köhnə kommunist qvardiyasının yola salınması üçün aparılan mübarizə heç bir nəticə verməyib. Bütün hallarda Rusiyanın Azərbaycanla bağlı planlarında “içimizdəki Denikin” rolunun kimə tapşırıldığı maraq doğurur.
İlk ağla gələn Rusiyada təsis edilən və yaranan kimi Kremlin damğası vurulan “Milyarderlər İttifaqı”dır. Amma bu günlərdə məlum olub ki, Kremlin sifarişi ilə Azərbaycan hakimiyyətinə qarşı təzyiq aləti kimi düşünülmüş Rusiya Azərbaycan Təşkilatları İttifaqının elan olunan sədri, baş nazirin keçmiş müavini Abbas Abbasov yaxın günlərdə Bakıya gələcək. Bu barədə məlumatı Rusiyadakı soydaşlarımız verib. Soydaşlarımızın bildirdiyinə görə, bir müddət əvvəl prezidentlə görüşməyə müvəffəq olan Abbas Abbasov görüşdən sonra RATİ ilə bağlı hər hansı addımı atmaması və fəaliyyət göstərməməsilə əslində hansı qərarı verdiyini və həm də prezidentlə görüşdə nələri müzakirə etdiyini də hiss etdirmiş oldu.
Mənbəmiz bildirir ki, amma buna rəğmən hələ də o, RATİ-də və özü də rəhbər olaraq qalır ki, bu da Azərbaycan mətbuatında müxtəlif şaiyələrin dərcinə rəvac verməkdədir. Mənbəmizin söylədikləri: «Əslində Abbas Abbasov birdəfəlik olaraq RATİ projesindən uzaqlaşıb və Bakıya gəlişi də əslində bir bəhanə ilə yerli mətbuatla görüşmək niyyətindən ibarətdir. Ola bilsin ki, gələn həftə və yaxud da on gündən sonra o, Bakıda olsun və bu zaman onun yerli qəzetlərə rahat şəkildə müsahibə və açıqlamalar verəcəyi də istisna deyil».
Kremlin Azərbaycan planları ilə bağlı başqa bir məlumat da diqqət çəkir. Aldığımız məlumata görə Prezident Administrasiyasının rəhbəri Ramiz Mehdiyev bu günlərdə Moskvaya səfər edəcək». Bu ilginc məlumatı bizə çatdıran mənbə bildirir ki, son günlər yaranmış situasiya ilə bağlı zaman-zaman dövrü mətbuatımızda «Rusiyanın bir nömrəli adamı» kimi təqdim edilən Ramiz Mehdiyev Kremldən məsləhətlər almağa gedir.
Mənbəmizin xəbərində o da vurğulanır ki, Ramiz Mehdiyevin Rusiyaya çağrılmasından Azərbaycan hakimiyyətinin yuxarı eşalonu da tam olaraq xəbərdardır. Sadəcə olaraq, bu məsələ ətrafında heç bir müzakirə aparılmayıb. Məlumatlara görə, gələn həftə baş tutacaq səfər qeyri-rəsmi xarakter daşıyır və hətta ictimaiyyət bu səfərdən xəbərdar edilməyəcək. Məlumatlara görə, məhz Moskvanın istəyilə baş tutan bu səfər zamanı son durumun müzakirəsilə yanaşı, həmçinin Ramiz Mehdiyevin bundan sonrakı aqibəti və Azərbaycanda keçirilməsi nəzərdə tutulan prezident seçkiləri də müzakirə predmeti olacaq.
Azər Talıbov