Elmira Şükürova və Nizami
Sadıqovun birgə maxenasiyaları

Son illər təhsil sahəsində baş verən qanunsuzluqlar, maxenasiyalar, dövlət büdcəsinin mənimsənilməsi ilə bağlı dəfələrlə yazılar dərc olunub və ciddi rezonans yaranıb. Amma hər defə bu məqamlar ortaya çıxanda şəxsən nazir Misir Mərdanovun özü bəyan edib ki, konkret faktlar olarsa məsələyə baxıla bilinər. Ötən saylarımızda Ağdam rayonunda təhsil sahəsində baş verən qanunsuzluqlar, dövlət büdcəsinin talan olunması haqqında faktlarla dolu yazı dərc etdik. Amma təssüflər ki, Təhsil Nazirliyi bu faktlarla bağlı heç bir açıqlama vermədi və məsələnin daha çox unudulması xəttini tutdular. Az qala belə bir rəy yarandı ki, Ağdam rayon icra hakimiyyətinin başçısı Nizami Sadıqovla, Ağdam rayon təhsil şöbəsinin müdirəsi Elmira Şükürovanın bu qanunsuzluqlarından nazir Misir Mərdanovun xəbəri öncədən də var və bunu təbii hesab edir. Amma yenə də ümid edirik ki, məsələyə rəsmi münasibət bildiriləcək. İndi isə əldə etdiyimiz yeni faktları nəzərinizə çatdırırıq.

Məktəblərin sayı nədən artırılır?

Redaksiyamıza daxiı olan materialda göstərilir, bu gün Ağdam ərazisində süni şəkildə məktəblərin, həmçinin siniflərin sayı artırılır. Bunu nədən edirlər? Əldə etdiyimiz məlumata görə belə bir addım atmaqla büdcədən daha çox vəsait mənimsəmək olur. Bunun üçün sadəcə olaraq rayonda müvafiq təşkilatlarla əlaqə qurulur, komissiya yaradılır və aydın olur ki, sinif otaqları “balaca” olduğundan şagirdlər üçün narahatlıq yaranır. Buna görə əlavə sinif yaradılır. Əlavə sinif isə sözsüz ki, əlavə gəlir mənbəyi sayılır. Bu işdə isə zaman-zaman Ağdam rayon icra hakimiyyətinin başçısı Nizami Sadıqovla, rayon təhsil şöbəsinin müdrəsi Elmira Şükürova problemlər yaşansada ümumi “maraqlar”a görə ortaq məxrəcə gələ biliblər. Gəlin öncəliklə Ağdamda yerləşən və fəaliyyəti ümumiyyətlə olmayan və ya zəif olan məktəblərin siyahısına baxaq və bu məktəblər vasitəsi ilə Nizami Sadıqovla, Elmira Şükürovanın nə qədər pul qazandığını müəyyənləşdirək. Beləliklə sənədlərdə mövcud olsada , reallıqda zəif və yox olan məktəblərin siyahısı çox genişdir. Ancaq sənədlərdə, kağız üzərində olan məktəblər: 1, 3, 4, 8, 12, 53, 65, 96 saylı orta məktəb. Yox dərəcəsində olan məktəblər: 6, 13, 22, 58, 69, 108, 117, 119, 138, 143, 145 saylı orta məktəb.
20-yə qədər məktəbin adından istifadə edilərək beləcə dövlət büdcəsindən vəsait çıxarılır. Yəqin ki, bu faktlar Misir Mərdanov üçün maraqlı olacaq. İndi isə gəlin məktəblərə təyinatların hansı vərəsəliklə edildiyinə baxaq. Bu təyinatlarda Elmira Şükürova ilə Nizami Sadıqovun ümumi “razılaşması” ilə həyata keçirilir.

Direktor təyinatlarındakı dəhşətlər

Bizə daxil olan məlumata görə təyinatlar məlum maraqlar üzərində qurulur və bu konkret faktlarla sübut edilir. Məsələn:
- Ağdam rayon İmanqulubəy kənd orta məktəbinin direktoru Həmid müəllim yerinə öz bacısı qızını təyin etdirir
- Bir məktəb direktoru Əliyev Mahir Məzahir oğlu narkotika alveri ilə həbs olunduğundan onun yerinə,anası direktor təyin edilir
- Soltabuq kənd orta məktəbinin direktoru işdən azad olunsada,öz gəlinini öz yerinə təyin etdirə bilir.
- 19 saylı orta məktəbin direktoru Əfqan Həsənov 70 yaşı tamam olduğu üçün istefaya gedir və öz yerinə gəlini Şəfəq Səfərovanı təyin etdirir.
- Hətta elə ailələr var ki, ər və arvad hərəsi bir məktəbdə direktor “təyin” olunub. Bunu da nəzərinizə çatdıraq ki, şişirtmələr nəticəsində bu gün Ağdamda 145 məktəb “fəaliyyət” göstərir və hər ay hansısa “səbəbdən”, hər məktəb mərkəzə 100-200 manat arası pul göndərir.
Yəqin ki, bu faktların araşdırılması və həqiqiliyini Təhsil Nazirliyi çox qısa müddətdə təsdiq edə bilər.

Rusiyada yaşayan Ağdamda direktor işləyir

Ötən yazıda baş verən qanunsuzluqlar, süni şəkildə məktəblərin sayının artırılması, direktor təyinatlarındakı qanunsuzluqlarla bağlı faktları diqqətinizə çatdırmışdıq. İndi isə daha gülməli mənzərəyə baxaq.
Bizə aydın olub ki, 114 saylı orta məktəbə 1997-ci ildən 2011-ci ilə qədər Novruzova Minayə rəhbərlik edib. Amma səhətində problem yarandığı üçün onun yerinə Aygün Ələkbərova adlı şəxs direktor təyin edilir və 2012-ci ilə qədər o direktor vəzifəsində çalışıb. Burda adi nəyinsə olmadığını deyə bilərsiniz. Amma gülməlisi budur ki, adı çəkilən xanım, həmin müddətdə Rusiyada yaşayıb. Amma Təhsil Şöbəsinin müdrəsi Elmira Şükürova müəyyən “səbəblərə” görə onu direktor təyin edib. Azərbaycan qanunvericiliyində isə belə bir addımın atılmasının mümkün olub-olmamasını araşdırsaqda ortaya heç bir fakt çıxmadı. Çünki bu Elmira Şükürova ilə Nizami Sadıqovun öz qanunlarıdır. Nizami Sadıqovla Elmira Şükürovanın iş birliyi həm də başqa maraqlı təyinatlarda da ortaya çıxır.

İcra başçısının qohumları iş başında

Aydın olur ki, Nizami Sadıqovla münasibətlərin qaydaya düşməsi üçün Elmira Şükürova icra başçısına iki hədiyyədə göndərib. Belə ki, bizə təqdim olunan materialda göstərilir ki, 150 saylı məktəbə Nizami Sadıqovun qardaşı qızını, Təzə qəsəbədəki baxçaya isə başçının qızını direktor təyin edib. Onların necə direktor işləməsi haqqında isə gələn yazılarda oxuya biləcəksiniz.

Milyonluq layihələr

Amma bu işlər sözsüz ki, korrupsiya hallarının yanında xırda məsələlər kimi görünür və bu səbəbdən daha ciddi faktlara keçid edək. Deməli məktəblərin yenidən qurulması, təmiri üçün dövlət büdcəsindən milyonlarla manat pul ayrılır. O cümlədən Ağdam rayonundada. Amma icra başçısı ilə Elmira Şükürovanın iş birliyi sahəsində bu milyonlar arada yoxa çıxır. Məsələn, ağdamın Səfərli kəndində məktəbin təmiri, döşəmənin vurulması, idman və iclas zallarının tikintisi üçün 870 min manat pul ayrılır. Uzun müddətli təmir başa çatır. Amma...aydın olur ki, məktəbdə döşəmə yenə betondandır, idman və iclas zalları isə yoxdur. 870 min manat pulun necə yoxa çıxmasını isə Nizami Sadıqovla, Elmira Şükürovadan başqa heç kim bilmir. Eyni problem Alıbəyli kənd məktəbində də baş verib. Məktəbin təmiri üçün 654 min manat pul ayrılıb. Amma ortada heç nə yoxdur.

Ting əməliyyatı

Amma bu pullar iki məmuru qane etmir. Bunun üçün başqa maraqlı bir üsulda kəşf olunub. Belə ki, dekabr ayında Yol İdarəsinə 501 min manat pul ayrılıb. Yol kənarında ağaclar əkmək üçün. Amma bu pullarında hara getdiyi məlum deyil və hazırda məktəb direktorlarına öhdəlik qoyulub ki, yol kənarında ağac əkmək üçün öz hesablarına ting alsınlar. Görünür “əl əli yuyar”- prinsipi Ağdamda yaxşı işləyir.
P.S. Mövzunu davam etdirəcəyik

Tahir Sarıyev