Bu gün -oktyabrın 10-da Minskdə MDB sammiti çərçivəsində Ermənistanın Avrasiya İqtisadi İttifaqına üzvlüyü məsələsinə də baxılacaq.

Virtualaz.org saytı xəbər verdiyi kimi, Ermənistanın may ayında Astanada Rusiya, Qazaxıstan və Belarus tərəfindən təsis olunan bu ittifaqa üzvlüyü dəfələrlə təxirə düşüb. Və bunun səbəbi Azərbaycanın etirazıdır. Azərbaycan Ermənistanın işğal altında saxladığı Dağlıq Qarabağla sərhədə gömrük postu yerləşdirmək öhdəliyi götürmədən bu ittifaqa üzvlüyünü Qazaxıstan və Belarusun köməyi ilə əngəlləyə bilir.

Sabahkı sammitdə də Ermənistanın üzvlüyünün baş tutmaycağı haqda xəbərlər var. Rəsmi Astana İrəvanı xəbərdar edib ki, Ermənistanın üzvlüyü ilə bağlı mövqeyini hələ müəyyənləşdirməyib.

“Azadlıq” radiosunun erməni xidmətinin məlumatına görə, Sərkisyanın Minskə yola düşməsi ərəfəsində hakim Respublika Partiyasından deputat Artak Davtyan bildirib ki, Ermənistan Avrasiya İttifaqına üzvlük müqaviləsini imzalamağa hazırdır. Əgər Azərbaycan yenə mane olmasa...

“Biz bu müqaviləni imzalamağa hazırıq. Və əgər hansısa yeni məktub (İlham Əliyevin Astanadakı təsis sammitinə göndərdiyi məktub nəzərdə tutulur-red.) Azərbaycan tərəfindən fəallıq olmasa, həmçinin Gömrük İttifaqına üzv ölkələrin hansısa etirazları meydana çıxmasa sabah biz bu müqaviləni imzalaya biləcəyik” - deyə deputat bildirib.

Artak Davtyan

A.Davtyanın sözləri Ermənistan parlamentinin xarici əlaqələr komitəsinin keçmiş sədri, ölkənin Avrasiya İttifaqına üzvlüyünə qarşı çıxan Ovanes İgityanın etirazına səbəb olub.

O.İgityan deyib ki, deputat Davtyan prezident Serj Sərkisyanın sabah bu sənədi imzalayıb-imzalamayacağına dair suala dəqiq cavab verə bilməyib. İgityan “sabah görərik” deməklə kifayətlənib.

“İctimaiyyət əvvəlcədən bilməlidir. Bu, hansısa oyun deyil ki, kimsə sabah hər şeyi qərarlaşdırsın və məsələnin qəzəblənmiş Əliyevin məktubundan, yaxud həmin məqam Putinin imza atmaq üçün qələmini verməkdən imtina etməsindən asılı olduğunu desin. Biz bir ildir bilmirik hara gedirik. Hələ də bu suala cavab yoxdur ki, Ermənistan bu sənədi imzalamaqla hansı risklərlə üzləşəcək” - deyə İgityan bildirib.

Virtualaz.org