PA rəhbəri Zahid Orucun dilindən danışdı, iqtidarda
ona qarşı hücuma keçənlərə 2005-ci ili xatırlatdı

Qarşıdan prezident seçkilərinin gəlməsi hakimiyyətdaxili qruplaşmalar arasındakı münasibətlərin daha da gərilməsilə müşaiyət olunmaqdadır. Artıq neçə müddətdir ki, məlum gərginliyin təzahürlərini qabarıq şəkildə hiss edirik. Həm fəaliyyəti dayandırılmış ABU-nun keçmiş rektoru Elşad Abdullayevlə bağlı yaranmış qalmaqal, həm əsgər ölümü faktının qabardılması nəticəsində qurulan oyunlar, «Binə»də baş verən hadisələr və digər bu kimi məqamlar artıq cəmiyyətin də çox ciddi proseslərə cəlşb edilməsinin göstəricisi kimi qəbul edilməlidir. Yəni vəziyyət o həddə çatıb ki, artıq iqtidar içində münasibətlərini çözən qruplar bu işdə cəmiyyətin də iştirakından yararlanmağa çalışırlar. Belə bir prosesin isə uzun müddətə nəzarətdə saxlanılmasının imkansız olduğu, yekunda xaotik bir mənzərəni yetişdirə biləcəyi isə ən primitiv politoloji biliklər hesabına da təxmin edilə bilər.
Bununla əlaqədar məlumat verən hökumət içindəki qaynağın sözlərindən belə aydın olur ki, qarşıdan gələn prezident seçkiləri ərəfəsində əsas hədəf kimi diqqətə gələn hakimiyyətin əsas güc mərkəzlərindən hesab olunan Prezident Administrasiyasının rəhbəri Ramiz Mehdiyev və onun çevrəsi ciddi şəkildə müdafiə olunmaqdadır: «Bu gün həmin qruplaşma prezidentlə ən sıx təmasda olan şəbəkədir və prezidentə davamlı olaraq öz baxış açılarından məlumatlar çatdırır, onda öz maraqlarına uyğun təəssüratlar oyatmağa çalışırlar».
Eyni zamanda mehdiyevçi qanadın fəal şəkildə özlərinə zərurətin hələ də qaldığını sübuta yetirən bir sıra prosesləri süni şəkildə həyata keçirdiyini də iddia edən mənbəmiz əlavə etdi ki, əvvəlki dönəmlərlə müqayisədə Ramiz Mehdiyev mövqelərini geri almış kimi görünür: «Vəziyyəti kifayət qədər dəyişməyə müvəffəq olmuş PA rəhbərinə bu işdə əsas dəstəyi Rusiya verib. Digər tərəfdən də «milyarderlər ittifaqı»nın, Rüstəm İbrahəimbəyov kimilərinin basqıları hesabına Kreml rəsmi Bakını «yetimin papağını başından götürüb, təkrar özünə qaytarmaq» tərzilə «sevindirdiyindən» YAP iqtidarı yenidən Ramiz Mehdiyevin hökmü altına keçmə yönündə kurs götürüb».
Amma bu situasiyanın rəqib cinah tərəfindən asanlıqla və sükutla həzm edilməyəcəyini bildirən mənbəmiz onu da vurğuladı ki, PA şefini çox ciddi faktlar və dəlillər hesabına olsa belə, may ayına qədər zərərsizləşdirməyi qəsd edən məlum qüvvələr bu məqsədlə yeni plan da hazırlayıblar: «Gələn həftədən etibarən ölkədə böyük səs-küy yaradacaq faktların ictimailəşməsi gözlənilir. Bu dəfə təkcə Elşad Abdullayevin «serialları» rol oynamayacaq. Çoxdan vəd olunan bəzi videofaktlar da açıqlanacaq». Amma bununla belə başqa bir proses də müşahidə olunmaqdadır. İqtidarkı əleyhdarları hücumları nəhayət, Prezident Administrasiyasının rəhbəri Ramiz Mehdiyevin səbr kasasını daşırıb. Ramiz Mehdiyev komandasına daxil olan şəxslər vasitəsilə rəqiblərilə sərt tonda danışmağa başlayıb. Deputat Zahid Orucun açıqlamaları buna nümunə ola bilər. Deputat PA rəhbərinə qarşı hücumlarla bağlı deyib: “Bu kompromat savaşının uğurlu nəticələrini gözləyənlər varsa,onları əmin edirəm ki, proses məntiqi sonluğuna çatanda onlar məyus olacaqlar.
Yekun çox amansız olacaq. Indi virtual məkanda qurulmuş istehkamlar dağılanda bu oyunu aparan xeyli gizli sifətlər açılacaq və görəcəksiniz ki, mübarizə konkret Administrasiya rəhbərinə qarşı yox, hakimiyətin dəyişdirilməsi planının tərkib hissəsi naminə aparılıb. Bu 2005-ci il hadisələrinin dumanını xatırladır. Situasiyanın aydınlaşması ilə əksər ”güllə atanlar”ın deşifrə olunması, hakimiyyəti növbəti dəfə təmizləmə əməliyyatı ilə daha da güclənməsinə aparacaq. Ona görə eyforiya içində qələbə çələngi gözləyənlər bilməlidir ki, həmin çiçəkləri məğlubiyyət mərasimlərində istifadə etməli olacaqlar. Prezident əleyhinə dramatikləşdirilən və facebook məkanında təşkilatlandırılanlar lider kimi sonradan İlham Əliyevə sığınacaqlar. Bir az gözləyək”.
Ramiz Mehdiyevin rəqiblərinə mesajı kifayət qədər aydındır. PA rəhbəri hücumların qarşısında geri çəkilməyəcəyini, eyni zamanda ona qarşı kampaniyada rol alanları bağışlamayacağını bəyan edir. Ramiz Mehdiyev “2005-ci il olayları”nı xatırladaraq, rəqiblərini sabiq nazirlər Əli Insanov və Fərhad Əliyevin taleyilə qorxudur. Atəşin Paşayevlərə atılması da aydın görünür. Çünki məhz bu qruplaşmanın 2013-də dəyişikliklə bağlı planları var.
Bu arada bir vacib məqamı qeyd etmək yerinə düşər. Bir neçə gün əvvəl Ramiz Mehdiyevə qarşı yeni şok effekti yaradan ittiham ortaya çıxdı. DIN-in sabiq əməliyyat müvəkkili adam oğurluğu və bir sıra ağır cinayətlərdə təqsirləndirilərək ömürlük azadlıqdan məhrum edilən Hacı Məmmədov ictimailəşən məktubunda qeyd edir ki, o, 2004-cü ildə PA rəhbərindən Ilham Əliyevi öldürmək tapşırığı alıb. Hacı Məmmədov MTN-nin təcridxanasında saxlanılır. Oradan hansısa məktubu asanlıqla çölə ötürmək sadəcə mümkün deyil. Dorğrudur, məktubun mətnindən aydın olur ki, Hacı Məmmədov MTN-in Fazil adlı əməkdaşının köməyilə Ramiz Mehdiyevə yazılı mesajlarını çatdırır. Lakin bu halda da nazirliyin əməkdaşının rəhbərliyin məlumatı olmadan Hacı Məmmədova yardımçı olması inandırıcı deyil. MTN rəhbərliyi heç şübhəsiz Ramiz Mehdiyevə ünvanlanan məktubun mətnindən xəbərdar olub və bu kompromat uyğun vaxt üçün saxlanılıb.
Zahidin Orucun məhz bu məsələdən sonra danışması təsadüfi sayıla bilməz. Görünür, Hacı Məmmədovun məktubunun ictimailəşməsi Ramiz Mehdiyevi hücuma hücumla cavab verməyə məcbur edib.
Azər Talıbov