İsmayıllı hadisəsi müxalifət liderlərini bir araya gətirdi,
liderlər sosial partlayışların təmərküzləşdirilməsini istədilər

İsa Qəmbər: “Əgər xalqın tələbləri yerinə yetirilsə belə heç nə dəyişməyəcək ”

Əli Kərimli: “Artıq qəbiristanlıq sabitliyi pozulub. Hökumət hətta nazirinin və icra başçısının mülkiyyətini qoruya bilmir”

İqbal Ağazadə: “Azərbaycan cəmiyyəti olaraq Quba sakinlərini tək qoyduğumuz kimi, İsmayıllı əhalisini də dəstəksiz qoymamalıyıq ”

Sərdar Cəlaloğlu: "Xalqı qanlı inqilaba sürükləyib aradan çıxmaq istəyirlər. Onlar bununla 20 il ərzində həyata keçirdikləri cinayətləri ört-basdır etmək istəyirlər"

Sülhəddin Əkbər: “Azərbaycan xalqı inqilaba hamilə qalıb. Artıq hərəkətlərini hiss edirik”

Dünən İctimai Palata İsmayıllı da baş verən xalq üsyanı ilə bağlı İctimai dinləmə keçirib. Tədbir Müsavat Partiyasının qərargahında baş tutub. Tədbirdə müxalifət liderləri, ekspertlər gənc fəallar ictimaiyyət və media nümayəndələri iştirak ediblər.
İlkin olaraq çıxış edən Müsavat başqanı İsa Qəmbər xalqın hakimiyyətin qanunsuzluqlarından və korrupsiyadan bezdiyini bildirdi: “Xalq İsmayıllıda baş verən prosesləri izləyir və demokratiya istəyir. Bütün ölkə İsmayıllının günündədir. Hakimiyyətin apardığı siyasəti sosial partlayışa gətirib çıxarıb. Ölkənin hər yeri İsmayıllıdır. Baş verənlərin hamısı göz qabağındadır. Əgər xalqın tələbləri yerinə yetirilsə belə heç nə dəyişməyəcək. Tələbimiz budur ki, həbs edilənlərin hamısı azadlığı buraxılsın. Hər şey göstərir ki, 2013-cü il xalqımız üçün tale yüklü bir il olacaq.”
Sonra çıxış üçün söz AXCP sədri Əli Kərimliyə verildi. Əli bəy çıxışı zamanı bildirdi ki, İsmayıllıda baş verənlər təsadüf deyil: “Quba, Sabirabad və İsmayıllıda baş verən sosial partlayışlar xalqın kütləvi etirazının göstəricisidir. Azərbaycan çox ciddi dəyişiklər ərəfəsindədir. Hakimiyyət anlamır və islahatlar həyata keçirmir. Qanunların pozulması, məmurların ərköyünlüyü, seçkinin saxtalaşdırılması və digər problemlər insanlarda çıxılmazlıq sindromu yaradıblar. Nəticədə insanlar özləri məhkəmə qurmaq məcburiyyətindədirlər. Baş verənlər oliqarx sisteminin iflasıdır. Ölkə oliqarxlar arasında bölünüb. Bölgələri idarə edən oliqarxlar xalqın nifrət mənbəyinə çevrilib. Rayonlarda baş verənlərin hamısı ondan xəbər verir ki, oliqarxlar ölkəni zəbt ediblər. Sosial təbəqələşmə və haqsızlıq İsmayıllıda baş verənlərin nəticəsidir. Artıq qəbiristanliq sabitliyi pozulub. Hökumət hətta nazirinin və icra başçısının mülkiyyətini qoruya bilmir. Situasiyanı anlamırlar. Yalnız repressiya ilə məşğuldurlar. Əgər repressiya xalqı durdursa idi, İsmayıllı da baş verənlər yaşanmazdı. Artıq xalq kütləvi repressiyadan qorxmur. Tələb edirik ki, ismayıllıları repressiyaya məruz qoymasınlar. Müxalifət liderlərinin bir araya gəlməsi müsbət haldır. Hesab edirəm ki, bundan sonra da bir araya gələ biləcəyik.”
Bundan sonra çıxış edən Ümid Partiyasının sədri İqbal Ağazadə bildirdi ki, artıq bu tip aksiyalar adi hal alıb: Ölkə müxalifəti daima hakimiyyətə ölkənin gələcəyi ilə bağlı bu tip anonslar verirdi. Lakin hökumət müxalifət sözü kimi qulaq ardına vururdu. Hakimiyyət indi anlamağa başlayıb. Ölkənin hansı təhlükə ilə üzbə-üz qaldığını anlamalı və bunun fərqində olmalıyıq. 2013-cü ildə baş verən siyasi proseslərdən müsbət nəticələr çıxara bilərik. Hesab edirəm ki, Azərbaycan cəmiyyəti olaraq Quba sakinlərini tək qoyduğumuz kimi, İsmayıllı əhalisini də dəstəksiz qoymamalıyıq. Dəstək nümayiş olunmalıdır. Siyasi təşkilatlar partiyalar və institutlar prosesləri nəzarət altında saxlamalıdırlar. Əks halda sadə insanlar hakimiyyətin repressiya maşını qarşısında tab gətirə bilməyəcək. ”
Tədbirdə çıxış edən ADP sədri Sərdar Cəlaloğlu baş verənlərin ciddi təhlükələrdən xəbər verdiyini bildirdi: “Bu proseslər hamıdan az iqtidar üçün təhlükəlidir. Ən təhlükəlisi xalq və müxalifət üçündür. Yaşanalar eyni halda iqtidar daxili münaqişələrin nəticəsi də ola bilər. Müxalifət heç vaxt bu cür dağınıq olmayıb. Xalq demokratiya yolundan daha çox qanlı hadisələrə üstünlük verir. Quba və İsmayıllıda baş verənlər göstərir ki, xalq sürətli şəkildə inqilaba sürüklənir və təhtəl şüurunda hazırlıq gedir. Hadisələr baş verməsəydi belə, beynəlxalq təşkilatların hesabatlarında Azərbaycan riskli və təhlükəli ölkələr sırasında olduğu göstərilirdi. Bəzi qüvvələr vardır ki, xalqı qanlı inqilaba sürükləyib aradan çıxmaq istəyirlər. Onlar bununla 20 il ərzində həyata keçirdikləri cinayətləri ört-basdır etmək istəyirlər. Hazırda mümkündür ki, Azərbaycan Suriyaya çevrilməsin. Hakimiyyət bundan sonra elə bir formada dəyişə bilər ki, xalq bundan da pis vəziyyətə düşsün. Ona görə dərhal dialoqa başlanılmalıdır. ”
Sonra çıxış edən ACP sədri Sülhəddin Əkbər, İsmayıllı xalqına müxalifəti bir araya gətirdiyi üçün təşəkkürünü bildirdi: “Ölkədə tək partiyalı sistem formalaşdırılıb. Sonuncu seçkidən sonra Azərbaycan xalqı inqilaba hamilə qalıb. Artıq hərəkətlərini hiss edirik. Hakimiyyət ölkənin milli təhlükəsizlik üçün ciddi təhdidə çevrilib. Yerlərdə baş verən hadisələr mərkəzləşdirilməli və ümum xalq mitinqinə çevrilməlidir. Eyni halda bütün müxalifət hazırkı rejimi dəyişmək üçün birgə fəaliyyət başlamalıdır.
Elçin