Sevinc Babayevanın oğlu polisdə ifadə verməsindən danışdı

Gülər Əhmədova qalmaqalının iştirakçısı, ötən il dekabrın 26-da Türkiyədə vəfat etmiş Sevinc Babayevanın oğlu Ayxan Məmmədov yanvarın 23-ü axşam saatlarında sabiq deputat Gülər Əhmədovanın izahatı əsasında Nəsimi Rayon Polis İdrəsinin 19-cu bölməsində ifadə verib.
Ayxan Məmmədov deyib ki, əvvəl bölmənin rəisi ilə, daha sonra bölmənin əməkdaşı Samir Məhərrəmovla söhbət edib: “Deyəsən, Samir Məhərrəmov müstəntiq idi. Guya mən Gülər Əhmədovaya mesaj yazıb onu ölümlə təhdid eləmişəm. Amma elə bir şey olmayıb. Yalandır. Mobil telefonlarımı, nömrələrimi onlara təqdim elədim ki, buyurun, axtarın, mən heç bir mesaj-filan yollamamışam. Axırıncı dəfə Gülər Əhmədova ilə anamın vəfatından əvvəl danışığımız olub. Bizim düşdüyümüz durumla bağlı kömək istəmişdim. Daha sonra yazmışdım ki, sənin elədiklərini yadımdan çıxarmaram, sən məni bədbəxt elədin. Amma Gülər Əhmədova polisə deyib ki, guya onu ölümlə hədələmişəm. Hesab edirəm ki, Gülər Əhmədova özünü sığortalayır”.
İzahat verdikdən sonra polis bölməsində Ayxan Məmmədovu səbirli və təmkinli olmağa çağırıblar: “Mənə başqa nə deyə bilərdilər ki?! Onların nəyinə lazım? Onların bu işə o qədər də aidiyyəti yoxdur”.Ayxan Məmmədov Bakı Şəhər Prokurorluğunda yaradılmış istintaq qrupuna dəfələrlə ifadə verdiyini deyib: “Onların çağırışı ilə də getmişəm, öz təşəbbüsümlə də. Təxminən 10 gün əvvəl ifadə verdim və yəqin ki, bu gün də (yanvarın 24-ü – red.) gedib istintaqla maraqlanacam. Mənə zəng vurmuşdular, ümumiyyətlə onlar tez-tez mənə telefon açırlar. Əslində hər dəfə “gəl” deyəndə nə üçün getməliyəm ki? Özləri hər şeyi gözəl bilirlər. Nə vaxt çağırırlarsa, gedirəm”.
Ayxan Məmmədov Sevinc Babayevanın meyitini gətirmək üçün İstanbulda olarkən Gülər Əhmədovanın adamı kimi adı hallandırılan Səlcuq Ağlayanın saxlandığını və ondan izahat alındığını deyib: “Bu, elə birinci gün olmuşdu. Onu saxlayıb ifadəsini aldılar və sonra sərbəst buraxdılar. Bu müddət ərzində isə onunla heç bir ünsiyyətim olmayıb, əlaqəm yoxdur. Mən işlə bağlı daha çox türk polisləri ilə və anamın ölüm səbəbini araşdıran ekspertiza həkimi ilə əlaqə saxlayıram”.
Ayxan Məmmədov istintaqdan narazı qaldığını vurğulayıb: “Gülər Əhmədova həbs olunarsa, onda bu, əsaslı dönüş olar. O isə oturub evində. İstərdim ki, Gülər Əhmədova Elşad Abdullayevin yaydığı videolara, onun motivlərinə görə həbs olunsun, sonra anamın ölümü ilə bağlı ekspertizanın rəyi açıqlansın və bu məsələ də gəlsin onun üstünə. Bu, obyektiv istintaq olardı. Belə olmalıdır, amma olmayacaq. Deyimmi hadisələrin necə olmasını güman edirəm? Anamın ölümünün analiz cavabları dəyişdiriləcək, bundan sonra açıqlama veriləcək ki, Gülər Əhmədova Sevinc Babayevanı Türkiyəyə müalicəyə göndərib, yaxud istirahətə göndərib. Məsələni bu cür fırladacaqlar və məsələ bitəcək”.
Əgər hadisələrin ardıcıllığı güman etdiyi kimi olarsa, Ayxan Məmmədov anasının ölümünün Azərbaycanda araşdırılmasından imtina edib Avropa İnsan Hüquqları Məhkəməsinə müraciət edəcəyini deyib: “Hətta yeni ekspertizanın keçirilməsi üçün anamın qəbrinin açılması lazım gələrsə, buna da razı olaram, hər şeyə razı olaram. Haqq və ədalət öz yerini tapmalıdır. Artıq neçənci adamdır ki, bu cür aradan götürülür”.