Yeni videoda pul dolu diplomatın necə açılmasından da danışılır

Sentyabrın 25-dən bu yana ölkənin gündəmini dəyişən, Azərbaycanda şok effekti yaradan rüşvət videosu ilə bağlı yeni sensasion məlumatlar əldə etmişik. Bununla bağlı Gunxeber.com-a daxil olan məlumatda ABU-nun keçmiş rektoru, Fransada mühacir həyatı yaşayan Elşad Abdullayevin bu rüşvət videosu yayıldıqdan sonra millət vəkili mandatını itirən Gülər Əhmədova olayını, əslində yalnız bir rüşvət və adam oğurluğu məsələsinə görə gündəmə gətirmədiyi bir daha çılpaqlığı ilə üzə çıxır. Konkret olaraq kimin hədəfə alındığı son dərəcə dəqiqliklə bəlli olur.
Qeyd edək ki, sentyabrın 25-də yayılan ilk videoda böyük məbləğdə rüşvətin E.Abdullayevin deputat təyin olunması üçün istənildiyi və onun yuxarılara çatacağı barədə danışıqlar öz əksini tapıb. Videogörüntülərin qəhrəmanları isə E.Abdullayev, G.Əhmədova və onların arasında vasitəçilik edən Sevinc Babayeva adlı qadındır. Həmin videoda E.Abdullayevdən alınan rüşvətin yuxarılara çatacağı barədə söhbət var və bir sıra adlar çəkilir.
Bundan sonra ölkənin gündəmi dəyişdi və ortaya bir sıra ciddi məqamlar çıxdı. E.Abdullayev isə, əlində, daha yüzlərlə belə video olduğunu deyərək, müxtəlif intervallarla onlardan ikisini də yaydı. Həmin videolar da bomba kimi partladı. Son bir neçə gündə isə E.Abdullayevin yeni videogörüntülər yayacağı barədə anonslar verilir və həmin videoların təxmini stenoqramı yayılır.
Gunxeber.com-un əldə etdiyi məlumata görə, yayılacaq yeni videogörüntülərlə bağlı mətbuata ötürülən məlumatlar həqiqətən mövcud olsa da, hələ onların yayılmaq növbəsi çatmayıb.
E.Abdullayev, yaxud onun arxasındakı qüvvələr, məhz Gülər Əhmədova olayının davamı ilə bağlı videogörüntülərin yayılmasını istəyirlər. Hazırda bu video yayıma hazırlanır. Məlumata görə, yaxın günlərdə yayılacaq video E.Abdullayevlə S.Babayeva arasında olan söhbətə aiddir. Videonu görən şəxsin dediyinə görə, S.Babayeva E.Abdullayevin yanına gələrək bildirir ki, rektorun deputat seçilmək üçün verdiyi pulu G.Əhmədova ilə birlikdə sahibinə çatdırıblar.
Danışıqların nə dərəcədə həqiqət, yoxsa əvvəlcədən qurulan plan üzərində davam edib-etməməsindən asılı olmayaraq, orada belə məqam var ki, E.Abdullayev pulu diplomatda göndərib. Pul sahibinə çatdırılandan sonra diplomatı açmaq istəsələr də, onun koda salındığı məlum olub. Bu zaman təklif ediblər ki, S.Babayeva rektorun yanına gedərək kodu öyrənsin, ancaq pulun sahibi buna ehtiyac görməyib və diplomatı öz adamlarına açdırıb.
Videogörünütlərdən S.Babayevanın bundan sonra ona və G.Əhmədovaya müəyyən məbləğ verilərək yola salındıqlarını deyir. Bu isə ciddi mətləblərdən xəbər verir. Həqiqətənmi bir kitabxana-klub rəhbəri belə böyük işlərdə böyük vəzifə sahiblərilə üz-üzə gələ bilir, onlarla belə böyük işlər görür? Hər halda, burada şübhəli məqamların olmasından söhbət gedə bilər.
Söhbətin davamı kimi, danışıqlarda S.Babayeva E.Abdullayevə diplomatın kodunu niyə əvvəlcədən onlara bildirməməsini irad tutur. Məlumata görə, E.Abdullayev bütün bunlar üçün əvvəlcədən çox ciddi hazırlıq görüb və hədəfi, məhz nəzərdə tutulan əsas adamın zərbə qarşısında qoyulması olub. Buna görə də istəyib ki, ya G.Əhmədova, ya da S.Babayevanın pul sahibinin yanından qayıdaraq, ondan diplomatın kodunu istəməsi anını da lentə aldırsın. Amma diplomatın kodunun qırılması onun bu istəyinə çatmasına imkan verməyib.
Bütün bunlar baş verənlərin böyük bir əməliyyat olduğunu göstərir. Ortada olan faktlar isə, nə qədər müdhiş olsa da, onların hazırlanması və belə ardıcıllıqla gündəmə gətirilməsi ondan da müdhiş mətləblərdən xəbər verir. Bu işlərin belə arxayınlıqla görülməsi, sonradan E.Abdullayev hələ burada olarkən, onun özünün də dediyi kimi, bütün materialların hüquq-mühafizə orqanlarına və daha yüksək dövlət qurumlarına göndərilməsi, daha sonra rektorun Azərbaycanı belə rahatlıqla tərk etməsi isə böyük güclərin razılığı və iştirakı olmadan inandırıcı görünmür.