Zaqatalada üsyanın ayaq səsləri eşidilir

FHN-nin evlərin tikilməsi əvəzinə vətəndaşlara xırda kompensasiyalar
ödəməsi, icra başçısının laqeydliyi narazılığı pik həddə çatdırıb

2012- ci ilin yazında baş vermiş Qax- Zaqatala zəlzələsi ilə bağlı bir neçə gündür ki, zərərçəkənlərə Fövqəladə Hallar nazirliyinin xətti ilə evlərin təmiri və bərpa gücləndirilməsi üçün kompensasiyaların verilməsinə başlanılıb. Amma bu proses bölgədə gərginliyin artmasına səbəb olub. Belə ki, evləri ciddi təsirə məruz qalan insanlar digərləri kimi evinin tikiləcəyini gözləsələr də onlara 1000- 4000 manat arasında kompensasiyalar təklif olunub.
Bu isə görginliyə və narazılığa səbəb olub. Bir çox insanlar verilən kompensasiyaları almaqdan imtina edib. Rayondan verilən məlumata görə dünən bir çox kəndlərdə camaat kəndin mərkəzinə yığışaraq yerli icra nümayəndəliklərindən bu ayrı- seçkiliyə son qoyulmasını tələb edərək tələbləri yerinə yetirilməyəcəyi halda daha ciddi addımlar atacaqlarını bildirirlər. Rayondan aldığımız məlumata görə hazırda konpensasiyalar gücləndirilmiş bərpa təmir kateqoryasına aid edilən evlərə verilir. Bu evlərin mütləq əksəriyəti qəzalı vəziyətdədir. Əslində yenidən komissiya yaradılıb bu evlərə baxış keçirilməlidir. Digər tərəfdən ayrılan məbləgə həmin evləri gücləndirimiş bərpa təmiri mümkün deyil. bu kateqoryadan olan evlərin əsas divarları yenidən inşa edilməli damları dəyişdirilməlidir. Necə olur ki, FHN evin kvadratmetrini 500 manata inşa edir. Amma gücləndirilmiş təmir üçün hər kvadratmetrə görə 34 manat ayırır?
Zaqatalanın digər kəndlərində də yerli sakinlər narazı insanlara dəstək nümayiş etdiriblər. Yeri gəlmişkən qeyd edək ki, narazı insanlara evinin tikilməsi yubadılan, hazırda çadırlarda və kirayələrdə qalan digər sakinlər də qoşulub. Bu gün günün birinci yarısında narazı insanlar bir araya gələrək bəzi qərarlar qəbul ediblər. Həmin qərara əsasən sabah bir qrup insan tələblərini çatdırmaq üçün Zaqatala rayon icra hakimiyyətinə, bir qrup insan isə Bakıya Fövqəladə Hallar nazirliyinin qarşısına toplaşacaqlar.
İnsanlar təmir və bərpa gücləndirmə ilə kompensasiyaların verilməsi zamanı onlara heç bir sənəd, qəbz verilmədiyini bildirilər. Eyni zamanda verilən kompensasiyaların təyinatının və sözlə ifadəsinin göstərilmədiyini qeyd edərək bütün bunların məqsədli şəkildə həyata keçirildiyini və mahiyyətində korrupsiya dayandığını bildirilir. Xatırladaq ki, zəlzənin nəticələrinin aradan qaldırılması üçün dövlət büdcəsindən 320 milyon manat vəsait ayrılıb. FHN- dən "Kür" Vətəndaş Cəmiyyətinin sorğusuna verilən cavabda bu vəsaitin 234 milyon manatının xərcləndiyi bildirilib. FHN ötən 8 ayda 2984 evin tikilməsini bildirsə də adı çəkilən Cəmiyyət FHN- nin bu rəqəmlərini şübhə altına alaraq bölgədə monitorinqlərə başlayıb.
Rayondan gələn məlumatlar narazılıqların yalnız FHN-lə bitmədiyindən xəbər verir. Zaqatala sakinləri redaksiyamıza rayonun icra başçısı Mübariz Əhmədzadənin özbaşınalıqlarından bəhs edən şikayət məktubu göndəriblər. Şikayət məktubunda rayonun yeni icra başçısının heç bir yenilik etməməsindən və sakinlərin qayğısına qalmamasından bəhs olunur: “Mübariz Əhmədzadə rayona icra başçısı gəldikdən sonra Zaqatalada müsbətə doğru heç bir dəyişiklik etməyib. Əhalinin də qayğısına qalmır. İcra başçısı təyin olduqdan sonra rayonda gördüyü tək iş yalnız rayon qəbiristanlığını təmizlətmək olub. Bunun da mənası bizim fikrimizcə, ”sizləri diri-diri basdıracağam" deməkdir. Nə şikayətlərimizə baxılır, nə qayğımıza qalır, nə də bir iş görür. Bundan əvvəl olan icra başçılarından heç bu qədər şikayətçi olmamışdıq. Mübariz Əhmədzadə yalnız prezident və yüksək vəzifəli dövlət adamlarından gələndə kəndlərdə görünür. Yeni icra başçısı M.Əhmədzadə yalnız bir para özünə yaxın olan insanların icra başçısıdır. Rayonda özbaşınalıq, rüşvətxorluq baş alıb gedir. Dəfələrlə aidiyyəti yerlərə müxtəlif məktublar göndərsək də, onlardan heç bir cavab almamışıq. Məlum məsələdir ki, göndərdiyimiz məktubların heç biri ünvanına çatdırılmır".
Şikayət məktubunda icra başçısının zəlzələ baş verən kəndlərdəki vəziyyətlə də maraqlanmadığı qeyd edilib. Şikayətçilər sonda qəzetimiz vasitəsilə prezidentə müraciət edərək Zaqatalaya yeni icra başçısı təyin edilməsini xahiş ediblər. Onlar bildirir ki, Əhmədzadənin dövründə baş verən qanunsuzluqlardan təngə gəliblər, hər an burada kütləvi etirazlar başlaya bilər. Xatırladaq ki, Zaqatala rayon İcra Başçısı Mübariz Əhmədzadə Su və Melorasiya ASC-nin rəhbəri Əhməd Əhmədzadədir.
Azər Talıbov