Məniməsnilən milyonlarla manat dövlət vəsaitinə görə ASC
rəhbəri icra başçısı olan qardaşı günahkar hesab edilib

Zaqatada zəlzələnin nəticələrini ortadan qaldırmaq üçün ayrılan 234 milyon manat vəsait hara yoxa çıxıb?; «Fövqəlnazir» icra başçısını Zaqatalada zəlzələdən zərərçəkənlərə ayrılan dövlət vəsaitini mənimsəməkdə ittiham edib; Vəziyyətdən çıxış yolu olaraq Zaqatalanın icra başçısı səhhəti ilə əlaqədar olaraq istefa vermək və ölkəni tərk etməyi düşünür …
Zaqatala barıt çəlləyini xatırladır. Bu barədə daxil olan məlumatda bildirilir ki, Zaqatalanın zəlzələdən zərərçəkmiş əhalisi dağılmış evlərin bərpası üçün ayrılan böyük miqdarda dövlət vəsaitinin havaya sovrulması ilə əlaqədar olaraq İcra Hakimiyyətinin qarşısında böyük aksiya həyata keçirməyə hazırlaşırlar. Məlumatda bildirilir ki, rayonda vəziyyət kritik səviyyədədir və bu aksiya regionda böyük sosial partlayışa səbəb ola bilər.
Məlumata görə, bir neçə gün bundan əvvəl Zaqatalaya səfər edən fövqəladə hallar naziri Kəmaləddin Heydərov vəziyyətə nəzarət etmək imkanının itirildiyini görüb və buna görə də Zaqatalanın icra başçısı Mübariz Əhmədzadəni günahlandırıb. Belə ki, «Fövqəlnazir» rayonda bərpa işləri aparan və tikinti ilə məşğul olan şirkətlərə nəzarətin olmamasını bildirib və məniməsnilən milyonlarla manat dövlət vəsaitinə görə Mübariz Əhmədzadəni günahkar hesab edib.
Mübariz Əhmədzadə isə öz növbəsində Kəmaləddin Heydərova bağlı olan şirkətlərin Zaqatalada tikinti və bərpa işlərini apardığını və dövlət vəsaitinin də məhz bu şirkətlər tərəfindən mənimsənildiyini bildirib. Məlumatda bildirilir ki, İcra başçısının nazirə qarşı sərt çıxması ətrafda olanların diqqətindən yayınmayıb və Kəmaləddin Heydərovun qəzəbini güclə cilovladığı aydınca hiss olunub.
Hazırda rayondakı vəziyyəti dəyərləndirən mənbə bildirir ki, rayonda vəziyyət nəzarətdən çıxdığı halda zələzələnin nəticələrinin ortadan qaldırılması üçün ayrılan böyük dövlət vəsatinin mənimsənilməsi faktları ortaya çıxacaq. O zaman istər Kəmaləddin Heydərov, istərsə də Mübariz Əhmədzadə əsas hədəfə çevriləcəklər. Mənbə bildirir ki, bu vəziyyətdən çıxış yolu olaraq Zaqatalanın icra başçısı səhhəti ilə əlaqədar olaraq istefa vermək və ölkəni tərk etməyi düşünür. Amma onun istefasının indiki şəraitdə qəbul olunması ciddi sual altındadır. Elə bu məqsədlə Mübariz Əhmədzadə qardaşı, Meliorasiya və Su Təsərrüfatı ASC-nin sədri Əhməd Əhmədzadəyə kömək üçün müraciət etdiyi bildirilir.
Qeyd edək ki, dövlət tərəfindən zəlzələdə zərərçəkmişlərə evlərin tikilməsi üçün 234 milyon manat ayrılıb. Həmin vəsaitin böyük bir hissəsinin sadəcə havaya sovrulduğu və mənimsənildiyi bildirilir. Müqayisə üçün bildirək ki, Türkiyədə baş verən dağıdıcı Van zəlzələsindən sonra türk hökuməti 150 milyon dollar ayırmışdı və bu vəsait Van böyüklükdə regionun yenidən tikilib bərpa olunması üçün kifəyət edib . Zaqatalanın bir neçə kəndində dağılmış evləri təmir etmək və yenidən tikmək üçün 234 milyon manat yetməyib. Nəzərə alsaq ki, bu gün Bakının bir neçə ərazilərində 2 mərtəbəli evlər qısa müddətdə tikilərək 25-30 min manata satılır, o zaman Zaqatalada həmin vəsaitə 10-15 min ev tikmək olardı. Ortada olan nəticə isə sədəcə faciəvidir.
Zaur