Son bir ayda məmurların və onların ailə üzvlərinin London və
Parisə, eləcə də başqa Avropa şəhərlərinə uçuşları intensivləşib

Məmurlar ölkəni adətən “müalicə” və ya “övladının təhsil problemi” adı ilə qısa müddətə tərk edirlər. Ancaq onların əsas məqsədi bu şəhərlərdə aldıqları daşınmaz əmlakı yerbəyer etmək və sərvətlərini ölkədən çıxarmaqdır.
Mənbənin məlumatına görə, son vaxtlar iki dəfə London və Parisə güclü axın olub: “Hökumətin iclasında ölkə prezidenti bp şirkətini sərt tənqid edəndən sonra Avropa paytaxtlarına uçuşlar intensivləşdi. Məmurların çoxu belə hesab edir ki, bp ilə qarşıdurma hökuməti çökdürə bilər. Ona görə də onlar dərhal ”təhlükəsizlik tədbirləri” gördülər. Bəzi nazirlər, nazir müavinləri, komitə sədrləri, icra başçıları, polis rəisləri, prokurorlar, hərbi komissarlar, yüksək rütbəli vergi və gömrük işçiləri ailələrini dərhal müxtəlif bəhanələrlə xaricə yolladı. Məmurların intensiv uçuşları yalnız bp ilə gərginlik bir az yumşalandan sonra səngiməyə başladı. Moskvada azərbaycanlı oliqarxların “Milyarderlər ittifaqı” şərti adlı təşkilatı elan edildikdən sonra isə xaricə, əsasən də Avropaya axının ikinci dalğa başladı. Bu proses bu günə qədər davam edir. Məmurları ən çox qorxuya salan bu ittifaqda Vahid Ələkbərov və Araz Ağalarov kimi “nəhənglərin” təmsil olunmasıdır”.
Qaynağımız məmurların “Milyarderlər ittifaqı”ndan qorxmasını belə şərh edir: “Vahid Ələkbərov təkcə Rusiya yox, dünya çapında tanınmış milyarderdir, onun əmlakının rəsmən elan edilən hissəsi 14 milyard dollardır. O, həmişə Azərbaycanın siyasi hakimiyyəti ilə məsafə saxlayıb və ümumiyyətlə, siyasi proseslərdən kənarda olan bir şəxsdir. Araz Ağalarovun isə ölkə rəhbərliyi ilə yaxın qohumluq münasibəti var, yəni ciddi səbəb olmasaydı, təşkilatın təsis olunmasında iştirak etməzdi. Maraqlı detal budur ki, bu iki oliqarxın şəxsi münasibətləri çox pisdir. Düşmənlərin Azərbaycan hökumətinin əleyhinə olan bir təşkilatda birləşməsi təşkilatın yaranmasında daha böyük güclərin maraqlı olmasını göstərir. Bundan ehtiyatlanan məmurlar xaricdə aldıqları evlərini tez-tez ziyarət edir, orada daimi məskunlaşmaq üçün hazırlıq işləri görürlər”.
Uzun müddət Bakı Beynəlxalq Hava Limanında çalışan mənbənin müşahidələrinə görə, nisbətən aşağı ranqlı olan, amma yetərincə sərvət toplamış məmurlar korpusu siyasi hakimiyyətdə baş verən və ya verə biləcək istənilən hadisəyə siyasi müxalifətdən daha çevik və həssas reaksiya verir: “Məsələn, “Ərəb baharı” dalğasında müxalifət etiraz aksiyalarına başlamamışdan məmurların Avropa ölkələrinə uçuşları artdı. Və ya antikorrupsiya kampaniyası start götürən kimi məmurlar kütləvi şəkildə pullarını ölkədən çıxarmağa başlamışdı. Yəni siyasi hakimiyyətə cüzi təhlükə yaranan kimi məmur korpusu ehtiyat tədbirlərini işə salır”.
Qaynağın verdiyi bilgiyə görə, Moskvada oliqarxlar ittifaqı yaranandan sonra məmur korpusunun Rusiya və başqa MDB ölkələrinə uçuşları səngiməyə başlayıb: “Ancaq “Ərəb baharı” və yaxud antikorrupsiya kampaniyası dönəmində bu ölkələrə uçuşlar daha intensiv idi. Yəqin ki, məlumatlı məmurlar hansı dönəmdə hara üz tutacaqlarını da yaxşı hesablayırlar. Rusiya ilə münasibətlərin kəskinləşdiyi bir vaxtda onlar Avropanı daha təhlükəsiz hesab edirlər. Eyni zamanda son aylar ölkədən pul daşınmaları da kəskin artıb. Qeyri-leqal yolla əldə edilmiş böyük vəsaitlər ölkədən çıxarılır”.
Yada salaq ki, ötən saylarımızda böyük məbləğdə pulların qanunsuz yollarla Bakı aeroportundan Bakı-Moskva aviareysi ilə kisələrə doldurulmuş vəziyyətdə, 22-25 milyon dollar arası olmaqla, nağd şəkildə xaricə daşınması ilə bağlı məlumat vermişdik. Bu fakt Moskvanın Savelyev Rayon Məhkəməsində “Ticarət-Tikinti Bankı”nın iki əməkdaşının və bir qrup Azərbaycan vətəndaşının işi üzrə məhkəmə prosesində də öz təsdiqini tapmışdı. Bu məlumatı Rusiyanın “Rosbalt” agentliyi yaymışdı.
Bakı Beynəlxalq Hava Limanındakı qaynağın bilgisinə görə, belə əməliyyatlar indi daha intensiv şəkildə davam edir: “Bu pullar öncə MDB ölkələrinə daşınır, orada ”yuyulduqdan” sonra Avropadakı hesablara köçürülür. Bu məsələni aeroportda fəaliyyət göstərən gömrük xidməti kurasiya edir. Qaydalara görə, ölkəni tərk edən vətəndaş ölkədən yalnız 10 min manata qədər vəsait çıxara bilər. 10 min manatdan artıq vəsaitlərə görə isə gömrük bəyannaməsi yazılmalı və dövlətə faiz ödənilməlidir. Ancaq gömrük işçiləri bu işi iri məbləğli “xidmət haqqı” müqabilində qeyri-leqal həyata keçirirlər”.
Mənbəmizin verdiyi bu informasiyaları xüsusi və geniş şərh etməyə ehtiyac duyulmur. Məmurların rüşvət və korrupsiya yolu ilə topladıqları sərvətin təhlükəsizliyinə qarantiya yoxdur. Ümumiyyətlə, indiki rejimdə heç iş adamlarının əmlakına da qarantiya yoxdur. Bu, Zülfüqarlı qardaşlarının işində bir daha təsdiqləndi. Ona görə də hamı (büdcə oğrusu da, iş adamı da) əmlakını təhlükəsiz yerə daşımağa səy göstərir. Siyasi hakimiyyətin qeyri-rəsmi imtiyazları hesabına sərvət sahibi olanlar isə ikiqat qorxu içindədir. Siyasi vəziyyət azcaıq dəyişən kimi onlar təkcə sərvətlərini yox, həm də azadlıqlarını itirə bilərlər. Ona görə siyasi hakimiyyətə istənilən təhlükə yaranan kimi ölkəni tərk etmək haqda düşünürlər. Bu, indiki sistemin yaratdığı eybəcərliklərdən yalnız biridir.
Elçin Əmirov