Şəhərdaxili problemlərin varlığlna diqqət yetirdikdə o da bəlli olur ki, sən demə daha çox problemlərin yaşandığı bir sahə varsa, o da şəhərimizin nəqliyyat sahəsidir. Bəli, bu sahə ölkə əhalisi üçün nə qədər əhəmiyyət daşısa da, nədənsə bu sahədə vəziyyət uzun müddətdir ki, düzəlmir. Əslinə baxsan vəziyyətin bu cür davam etməsi, bəlkə də kimlərinsə marağına cavab verir. Amma, bildiyimiz bir həqiqət var ki, sadə vətəndaşların tam əksəriyyəti ümumi vəziyyəti qəbul etmir, hər yerdə giley-güzərlarını bidirməkdə davam edirlər.

Maraqlı haldır ki, nəqliyyat sahəsinə cavabdehlik daşıyan şəxslər, yaxud da onların səlahiyyətliləri televiziya ekranlarında, ictimai yerlərdə daim vurğulayırlar ki, “biz problemlərin varlığını diqqətdə saxlayırıq və həlli istiqamətində də əməli addımlarımızı atacağıq” deyirlər. Amma, uzun müddət vaxt keçsə də, verilən vədlər, söylənilən fikirlər həllini tapmır ki, tapmır. Məsələn, bu gün şəhərdaxili nəqliyyatda çalışan sürücülərin tam əksəriyyətinin sürücülük vəsiqəsi yoxdur desək, yəqin ki, yanılmarıq. İritutumlu nəqliyyat vasitələrinin salonları natəmizlik, çirkab içərisində boğulur, minbir xəstəliyin daşıyıcısına çevrilir də desək, yəqin ki, həqiqəti ifadə etmiş olarıq. Sürücülərin interval həddini aşmaları, nəqliyyat vasitələrini sürətlə sürmələri, sərnişin daşımalarının məsuliyyətini dərk etməmələri, bir daha onu sübut edir ki, şəhərdaxili nəqliyyatımızda yaşanan durum olduqca acınacaqlı olduğundan, artıq həyacan təbili çalmağın da vaxtı çatıb.

Problemlərin varlığına toxunmaqla, hansısa marağı güdmürük. Yalnız yazıb onu bildiririk ki, bu sahədə belə bir olayların yaşanması, yeni-yeni problemlərin də əmələ gəlməsinə səbəb olur. Məsələn, bir müddət bundan əvvəl, kiçiktutumlu nəqliyyat vasitələrinin şəhərlərarası hərəkət etmələri “dəb”də idi. Hansı ki, mövcud qanunvericiliyə görə, həmin nəqliyyat vasitələrinin uzaq məsafələri qət etmələri qanunla qadağan olunurdu. Amma, kəsişən maraqlar hər şeyin qurban verilməsinə səbəb olduğundan, baş verən faciələr əksəriyyətə ağrılı anlar da yaşatdı.

Diqqəti cəlb edən hal odur ki, istər şəhərdaxili, istərsə də rayonlararası hərəkətdə olan nəqliyyat vasitələrində, hansısa faciə yaşandıqdan sonra rəhbərlik hərəkətə keçir, müvafiq qərarını açıqlayır. Amma, verilən qərarın nə qədər “dözümlü” olması, tam əksəriyyətin marağına cavab verməsi, hal-hazırda da böyük suallar doğurur. Məsələn, bu gün rəhbərlik vaxtilə verdiyi qərarından addım-addım geri çəkilməkdədir. O halda sual oluna bilər ki, görəsən nələr baş verdi ki, nələr yaşandı ki, yaşanan faciələr unuduldu. Çünki, bu gün kiçiktutumlu nəqliyyat vasitələrinin yenidən hərəkətdə olmaları, onu söyləməyə əsas verir ki, rəhbərliyin problemlərin varlığına münasibəti, yaxud da həlli istiqamətində yanaşması dəyişkən xarakter daşıyır.

Digər tərəfdən şəhərdə nəqliyyat müfəttişliyi əməkdaşlarının “at” oynatmaları da, diqqətdən kənarda qalmayan problemlərdəndir. Çünki, istər onların davranış qaydaları, sürücülərə qarşı etikadan kənar addımlari, yeri gələndə qanun-qaydanı belə tapdaq altına atmaları və.s, bu gün hər kəsi düşündürməkdədir.

Bəs nə etmək olar ki, ümumi vəziyyət düzəlsin? Sərnişindaşıma ilə məşğul olanlar məsuliyyətlərini dərk edib, nəqliyyat vasitələrindən istifadə edənlərin marağını təmin edə bisinlər. Bax belə bir sualları bu sahəyə cavabdehlik daşıyanlara ünvanlamaq lazımdır ki, problemlərin varlığına aydınlıq gətirə bilsinlər. O halda hər kəs bilib başa düşəcək ki, nəqliyyatımızın bərbadlığına cavabdehlik daşıyanlar kimlərdir və günahları hansı ünvanda axtarmaq gərəkdir?