Bir məqamı da unutmaq olmaz ki, bugünkü əlillərimizin daha çoxu, bu Vətənin ərazi bütövlüyü uğrunda, vətəndaşlarımızın təhlükəsizliklərinin təmin olunmasında yaxından iştirak etməklə əlil olublar. Odur ki, onlara qarşı belə bir sayğısızlıq, ögey münasibət heç cür yolverilməzdir

Şəhərimizin nəqliyyat sektorunda yaşanan ab-hava daim diqqət mərkəzində durduğundan, bu sahə zaman-zaman əksəriyyətin müzakirə etdiyi mövzulardan birinə də çevrilib. Buna səbəb həm də o olub ki, nəqliyyat sahəsində yaşanan problemlər daim müzakirə predmetinə çevrilib və lazım gəldikdə bu sahəyə cavabdehlik daşıyanlar, əksəriyyətin qınaq obyektinə də çevriliblər. Bu gün də şəhərdaxili nəqliyyatda yaşanan problemlər o qədər çoxdur ki, bəlkə də yaşanan problemlərin varlığını saatlarla müzakirə etsək, heç də qurtarmaq olmaz.
Adicə bir məqamı qeyd edək ki, hal-hazırda ayrı-ayrı xətlər üzrə hərəkətdə olan avtobusların tam əksəriyyətinin salonlarında natəmizlik hökm sürməkdədir. Salonlardakı oturacaqların olduqca çirkli halda olması onu söyləməyə əsas verir ki, bəlkə də altı ay, yaxud da il ərzində olsun belə, həmin oturacaqlar bir dəfə də olsun ki, yuyulmayır. Nəqliyyat vasitələrini idarə edən sürücülərdən çoxunun sürücülük vəsiqələrinin olmaması da, bu sahədə yaşanan ab-hava haqda lazımi məlumatları əldə etməyə imkan verir. Şəhərimizin bəzi mərkəzi ərazilərində sürücülərin səhər saatlarında kənardan baxış olunmaqla “müayinədən keçirilmələri” də, olduqca diqqəti cəlb edən problemlərdəndir. Çünki, qeyd olunan ərazilərdə dəftəri, “ruçka”sı əlində olan “həkimlər”in, sürücüləri müəyyən qədər şirinliyin müqabilində “müayinədən keçirmələri”, əslində şəhərdaxili nəqliyyatda yaşanan faciələrin əsasını qoyan səbəblərdir. Bu zaman onları əmələ gələ biləcək faciələrin mahiyyəti deyil, yalnız əldə edəcəkləri gəlirlərin miqdarı düşündürür.
Bu ilin yayında Avropa Yay Olimpiya Oyunlarının Bakıda keçirilməsi də, öz-özlüyündə yaddaqalan hadisələrdən biri oldu. Buna səbəb həm də o oldu ki, əksər sahələr kimi şəhərimizin nəqliyyat sektoru müəyyən mənada iritutumlu, yaraşıqlı, kifayət qədər rahatlığı ilə fərqlənən avtobuslarla da təmin olundu. Düzdür, ilk əvvəl hər kəs gətirilmiş avtobuslarla bağlı fərqli düşüncəyə sahib idilər. Bu gün isə fərqli mənzərəni gördükcə, sanki tam əksəriyyəti təəccüb də bürüyür. Buna səbəb, şəhərimizə xüsusi yaraşıq verən, sərnişinlərin mənzil başına tez və rahat çatmasında xüsusi rol oynayan “Baku Bus” MMC-nə məxsus avtobuslarda, əlillər üçün nəzərdə tutulan oturacaqların sökülməsidir.
Diqqəti bir məqama yönəldək ki, qeyd olunan nəqliyyat vasitələri üç giriş-çıxış qapısından ibarət olsa da, əlillərin orta qapıdan minib-düşmələri nəzərdə tutulub. Yəni, nəqliyyat vasitələrinin hansı formada, hansı qaydada olmasını ərsəyə gətirən mütəxəssislər, əlillər üçün oturacaqların orta giriş-çıxış qapısına yaxın yerdə quraşdırılmasına qərar veriblər. Elə bu səbəbdən də onlar üçün oturacaqlar nəqliyyat vasitələrinin istehsalı zamanı, orta giriş-çıxış qapısına yaxın yerdə quraşdırılır.
Bəs bu gün nələr baş verir ki, əlillər üçün nəzərdə tutulan oturacaqlar gündəmə gətirilir, kimlərinsə müzakirə mövzusuna da çevrilir. Bu yöndə apardığımız araşdırmalar zamanı o da bəlli oldu ki, “Baku Bus” MMC-nə məxsus nəqliyyat vasitələrinin ixtirası, istehsalı ilə məşğul olan mütəxəssislərdən, deyəsən bizim “yerli mütəxəssislərimiz” daha çox “zehni düşüncə”yə sahibdirlər ki, bu gün bu cür addımlarını da atırlar. Yəni, “yerli mütəxəssislərimiz” elə bir qüdrətli “zehni düşüncə”yə sahibdirlər ki, qeyd olunan nəqliyyat vasitələrində əlillər üçün nəzərdə tutulan yerdə oturacaqlar yox, yalnız onların nişanələrinin varlığına rast gəlmək olur. Belə bir mənzərənin yaşanması da, “Baku Bus”dan əlillərə bəslənilən “xor münasibət”in varlığını göstərir. O halda sual oluna bilər ki, bəs sayğısız münasibətin əmələ gəlməsinə səbəb nədir? Əslində belə bir sualın yalnız bir cavabı var ki, o da daha çox gəlir əldə etmək istəyinin varlığıdır. Amma, bir məqamı da unutmaq olmaz ki, bugünkü əlillərin daha çoxu, bu Vətənin ərazi bütövlüyü uğrunda, vətəndaşlarımızın təhlükəsizliklərinin təmin olunmasında yaxından iştirak etməklə əlil olublar. Odur ki, onlara qarşı belə bir münasibət heç cür yolverilməzdir.
Yaşanan problemlə bağlı qarşı tərəfin də mövqeyini dinləməyə hazırıq.
Problemin varlığını diqqətdə saxlayacağıq.

Mirzə

gundemxeber.az