Prezidentin fərmanı keçmiş komitənin rəhbər şəxslərini şoka salıb; Onlar işçilərin suallarına cavab verə bilmirlər

Xəbər verdiyimiz kimi, Prezident İlham Əliyev Qərib Məmmədovun rəhbərlik etdiyi Dövlət Torpaq və Xəritəçəkmə Komitəsinin ləğv edilməsi haqqında fərman imzalayıb. Fərmana əsasən, ləğv edilmiş komitənin dövlət torpaq kadastrı, yerquruluşu, geodeziya, torpaq bazarının təşkili, dövlət torpaq reyestrini aparmaq, bələdiyyələrin elektron daşıyıcıda və kağız üzərində xəritəni, habelə rübdə bir dəfə bələdiyyələrin hüdudları daxilində dövlət, bələdiyyə və xüsusi mülkiyyətdə olan torpaq sahələrində baş vermiş dəyişikliklər barədə arayışı Prezident Administrasiyasına təqdim etmək sahəsindəki funksiyaları Əmlak Məsələləri Dövlət Komitəsinə verilir.

Ləğv edilmiş komitənin torpaqların monitorinqi, onların münbitliyinin bərpası və artırılması, geodeziya, topoqrafiya, xəritəçəkmə, qravimetriya, ərazi vahidlərinin sərhədlərinin müəyyən edilməsi, dövlət əhəmiyyətli coğrafi məlumat sistemlərinin yaradılması, ümumcoğrafi, torpaq, geobotaniki, siyasi-inzibati, elmi məlumat və digər sahələrarası mövzu xəritələrinin, atlaslarının, kartoqrafik tədris vasitələrinin layihələşdirilməsini, tətbiqini və nəşrini təmin etmək, dəqiqliyinə və məzmununa görə ümumdövlət, müdafiə, elmi-tədqiqat və digər məsələlərin həllini təmin edən dövlət topoqrafik xəritələrin, habelə qrafiki, rəqəmi, fotoqrafik və başqa formalı planların yaradılması, yeniləşdirilməsi, nəşri və geodeziya, qravimetriya, topoqrafiya və kartoqrafiya işlərinin həyata keçirilməsində, materialların istifadəsində dövlətin müdafiəsini və təhlükəsizliyini təmin etmək, vahid dövlət koordinat, yüksəklik, qravimetrik ölçmə sistemlərinin, topoqrafik xəritə və planların miqyas sıralarını təyin etmək və geodeziya, topoqrafiya və kartoqrafiya materiallarının və məlumatlarının metroloji təminatını həyata keçirmək sahəsindəki funksiyaları isə Ekologiya və Təbii Sərvətlər Nazirliyinə verilir.

Fərmana əsasən, komitənin Azərbaycan Respublikasının dövlət sərhədlərinin, o cümlədən sərhəd sularının və Xəzər dənizinin (gölünün) Azərbaycana mənsub olan bölməsinin delimitasiyası və demarkasiyası işlərini Ekologiya və Təbii Sərvətlər Nazirliyi Dövlət Sərhəd Xidməti ilə birlikdə həyata keçirəcək.

Göründüyü kimi, Qərib məmmədovun səlahiyyəti Kərəm Həsənovv, Hüseynqulu Bağırov və general Elçin Quliyev arasında bölüşşdürülüb.

Qərib Məmmədova gəldikdə isə ona yeni vəzifə verilməyib və bu, gözlənilmir də. Onun yenidən AMEA-da fəaliyyətini davam etdirəcəyinə şübhə edilmir.

«Gündəmxəbər»ə verilən məlumata görə, prrezidentin bu fərmanı Dövlət Torpaq və Xəritəçəkmə Komitəsində böyük çaşqınlıqla qarşılanıb. Hətta elə bir vəziyyət yaranıb ki, dünən Qərib Məmmədov artıq keçmiş sayılan işçilərinin suallarını belə cavablandıra bilməyib. Aydın olub ki, onun özü də prezidentin belə fərman verəcəyini gözləmirmiş: «Dünən səhər komitənin apparat rəhbərindən tutmuş, müavinlərinə qədər hamısı yeni fərmanı təəccüblə qarşıladıqlarını gizlətməyiblər. Hətta Qərib Məmmədovun özü də belə fərman veriləcəyini gözləmədiyini deyib. İşçilər isə çaş-baş qalıblar. Onlar gələcəklərindən narahatdırlar. Hələ də onlara qəti bir söz deyən də yoxdur, yəni taleylərinin necə olacağını bilmirlər».

Məlumatlı şəxs deyir ki, Qərib Məmmədov və yaxın ətrafı elə bir səviyyədə şokdadırlar ki, komitənin ləğvi ilə bağlı hansı addımı atacaqlarını da müəyyənləşdirə bilməyiblər: «Komitənin rayon şöbələrində də eyni vəziyyətdir. Hətta rayon şöbələrinin bəziləri işə çıxıb-çıxmayacaqlarını bilmirlər. Rəhbərlik isə onlara təhvil-təsdim olan günə qədər işə gəlmələrindən savayı bir şey deyə bilmir».

Mənbə onu da deyir ki, Prezident son müşavirədə Dövlət Torpaq və Xəritəçəkmə Komitəsinin səlahiyyətlərinə daxil olan istifadəsiz torpaqlarla bağlı ciddi iradını bildirməsindən sonra keçmiş komitənin rəhbər şəxsləri bunu o qədər də ciddiyə almayıb. Amma ləğvetmə fərmanından sonra onlar fəaliyyətlərinin yoxlanılacağından və “məşhər ayağı”na çəkiləcəyindən də qorxurlar.

Xatırladaq ki, həmin müşavirədə İlham Əliyev belə xəbərlarlıq edib: “İstifadəsiz qalan torpaqlar da kifayət qədər çoxdur. Vaxtilə kimsə onları ya zəbt edib, ya icarəyə götürüb. İcarəyə götürüb və elə də qoyub gedib. Kim torpağı icarəyə götürüb istifadə etmirsə, gərək o icarə müqavilələri ləğv edilsin. O müqavilələr verilsin o torpaqda işləyənə. Yoxsa torpağı götürürlər, ondan sonra təyinatı dəyişdirirlər, daha sonra o torpaqlarda müxtəlif obyektlər tikilir və s. Bu, yolverilməzdir. Yerli icra orqanlarının nümayəndələri nəzarət etməlidirlər. Onların rayonlarında əgər kimsə bu işlə məşğul olursa, buna qarşı tədbir görülməlidir” deyə, prezident bildirmişdi.

Cəfər