Keçmiş komitə sədri AMEA-da işləyəcək; İslahat davam etdiriləcək


Azərbaycan prezidenti İlham Əliyev Dövlət Torpaq və Xəritəçəkmə Komitəsinin ləğv edilməsi haqqında fərman imzalayıb.

«Gündəm Xəbər»in məlumatına görə, yeni fərmana əsasən ləğv edilmiş komitənin dövlət torpaq kadastrı, yerquruluşu, geodeziya, torpaq bazarının təşkili, dövlət torpaq reyestrini aparmaq, bələdiyyələrin elektron daşıyıcıda və kağız üzərində xəritəni, habelə rübdə bir dəfə bələdiyyələrin hüdudları daxilində dövlət, bələdiyyə və xüsusi mülkiyyətdə olan torpaq sahələrində baş vermiş dəyişikliklər barədə arayışı, Prezident Administrasiyasına təqdim etmək sahəsindəki funksiyaları Əmlak Məsələləri Dövlət Komitəsinə verilir.

Bundan əlavə, ləğv edilmiş komitənin torpaqların monitorinqi, onların münbitliyinin bərpası və artırılması, geodeziya, topoqrafiya, xəritəçəkmə, qravimetriya, ərazi vahidlərinin sərhədlərinin müəyyən edilməsi, dövlət əhəmiyyətli coğrafi məlumat sistemlərinin yaradılması, ümumcoğrafi, torpaq, geobotaniki, siyasi-inzibati, elmi məlumat və digər sahələrarası mövzu xəritələrinin, atlaslarının, kartoqrafik tədris vasitələrinin layihələşdirilməsini, tətbiqini və nəşrini təmin etmək, dəqiqliyinə və məzmununa görə ümumdövlət, müdafiə, elmi-tədqiqat və digər məsələlərin həllini təmin edən dövlət topoqrafik xəritələrin, habelə qrafiki, rəqəmi, fotoqrafik və başqa formalı planların yaradılması, yeniləşdirilməsi, nəşri və geodeziya, qravimetriya, topoqrafiya və kartoqrafiya işlərinin həyata keçirilməsində, materialların istifadəsində dövlətin müdafiəsini və təhlükəsizliyini təmin etmək, vahid dövlət koordinat, yüksəklik, qravimetrik ölçmə sistemlərinin, topoqrafik xəritə və planların miqyas sıralarını təyin etmək və geodeziya, topoqrafiya və kartoqrafiya materiallarının və məlumatlarının metroloji təminatını həyata keçirmək sahəsindəki funksiyaları isə Ekologiya və Təbii Sərvətlər Nazirliyinə verilir.

Fərmana əsasən, komitənin Azərbaycan Respublikasının dövlət sərhədlərinin, o cümlədən sərhəd sularının və Xəzər dənizinin (gölünün) Azərbaycana mənsub olan bölməsinin delimitasiyası və demarkasiyası işlərini Ekologiya və Təbii Sərvətlər Nazirliyi Dövlət Sərhəd Xidməti ilə birlikdə həyata keçirir.

Azərbaycan Respublikasının Nazirlər Kabineti iki ay müddətində daşınmaz əmlaka növündən asılı olmayaraq mülkiyyət və digər əşya hüquqlarının əmələ gəlməsi və başqasına keçməsinin dövlət qeydiyyatının rəsmiləşdirilməsi zamanı verilən daşınmaz əmlakın dövlət reyestrindən çıxarışın vahid formasına dair təkliflərini, habelə torpaq sahəsinin plan və ölçüsünün vahid nümunəsinə və təsvirinə dair təkliflərini hazırlayıb prezidentə təqdim etmək, eləcə də prezidentin aktlarının fərmana uyğunlaşdırılması ilə bağlı təkliflərini 2 ay müddətində hazırlayıb prezidentə təqdim etmək tapşırılıb.

Nazirlər Kabineti həmçinin Nazirlər Kabinetinin normativ hüquqi aktlarının bu fərmana uyğunlaşdırılmasını 3 ay müddətində təmin etməli, habelə mərkəzi icra hakimiyyəti orqanlarının normativ hüquqi aktlarının bu fərmana uyğunlaşdırılmasını nəzarətdə saxlamalı və bunun icrası barədə 5 ay müddətində prezidentə məlumat verməlidir.

Ədliyyə Nazirliyi isə mərkəzi icra hakimiyyəti orqanlarının normativ hüquqi aktlarının və normativ xarakterli aktların, bu fərmana uyğunlaşdırılmasını təmin edib Nazirlər Kabinetinə məlumat verməlidir.

Fərmandan göründüyü kimi, Prezident İlham Əliyev təkcə Dövlət Torpaq və Xəritəçəkmə Komitəsini ləğv edib, onun səlahiyyətlərini Kərəm Həsənovun sədri olduğu Əmlak Məsələləri Dövlət Komitəsi ilə Hüseynqulu Bağırovun rəhbəri olduğu Ekologiya və Təbii Sərvətlər Nazirliyinin arasında bölüşdürmədi. Dövlət başçısı həm də uzun illərdir ki, vəzifəsindən azad olunacağı xəbəri gündəmdən düşməyən Qərib Məmmədovu da komandasından uzaqlaşdırdı.

Bu xəbər «Gündəm Xəbər»in ötən sayında «Hakimiyyət islahat anonsu» verdi başlıqlı yazıda gedən məlumatları təsdiq etməklə bərabər, həm də ortaya yeni məqamlar çıxarıb.

Bizi məlumatlandıran qaynaq deyir ki, İlham Əliyev belə islahatları davam etdirəcək: «Qarşıda bir neçə iri dövvlət müəssisəsinin də ləğv ediləcəyi, onun səlahiyyətlərinin isə digər nazirliklər arasında bölüşdürüləcəyi gözlənilir. Düşünürəm ki, yaxın aylarda “Azərsu” ASC və “Meliorasiya və Su Təsərrüfatı” ASC haqqında da qərar veriləcək”.

Qərib Məmmədovun işsiz qalıb-qalmayacağına toxunan müsahibimiz deyir ki, o, AMEA-dakı işini davam etdirəcək: «Bildiyiniz kimi, Qərib Məmmədov AMEA-nın üzvüdür, onun orada işi yeri var. Yəqin ki, ona yeni vəzifə verilməyəcək. O, AMAE-ya dönərək, burada elmi fəaliyyətini davam etdirəcək».

Cəfər MƏRDANOĞLU