Ləğv edilən komitənin əməkdaşlarının əmək kitabçaları verilib; Komissiyalar dərindən yoxlama aparır, hesabatın PA-ya təqdim ediləcəyi isə məsul şəxslərin həbsini gündəmə gətirib

Xəbər verdildiyi kimi, Prezident İlham Əliyev Qərib Məmmədovun rəhbərlik etdiyi Dövlət Torpaq və Xəritəçəkmə Komitəsinin ləğv edilməsi haqqında fərman imzalayıb. Və bu fərmanla ləğv edilən komitənin əsas səlahiyyətləri Əmlak Məsələləri Dövlət Komitəsi ilə Ekologiya və Təbii Sərvətlər Nazirliyi arasında bölünüb. Xəzər hövzəsi və sərhəd zonasındakı vəziyyət isə Dövlət Sərhəd Xidmətinin sərəncamına verilib.

“Gündəm Xəbər”in əldə etdiyi məlumata görə, əsas səlahiyyətləri iki dövlət qurumu arasında bölünən keçmiş komitə ilə bağlı hər üç qurum tərəfindən təhvil-təslim komissiyası güclü fəaliyyətə başlayıblar:

«Artıq hər üç dövlət qurumunun nümayəndələrindən ibarət olunan komissiya keçmiş komitənin mərkəzi aparatı da daxil olmaqla, bütün rayon şöbələrində ciddi təftişə başlayıblar. Əmlak Məsələləri Dövlət Komitəsi ilə Ekologiya Nazirliyinini komissiyaları bütün qeydiyyat kitablarını və digər sənədləri təhvil götürməklə yanaşı, keçmiş komitənin işçilərini də prosesdən uzaqlaşdırıblar. Bu isə Qərib Məmmədovun yaxınlarının, hətta komitənin aparat rəhbərinə qədər çoxunu əndişələndirməyə başlayıb. Çünki adıçəkilənlər və onların yaxın ətrafı çox ciddi qanun pozunularına yol veriblər. Hətta onların bəziləri qəfil verilən fərman səbəbindən paytaxt Bakı daxil olmaqla, rayonlarda ələ keçirmək üzrə olduqları torpaq sahələrinə dair sənədləşmələri də tam həyata keçirə bilməyiblər. Doğrudur, mümkündür ki, komitənin ləğv edilmə fərmanının səhəri günü Qərib Məmmədovun yaxınları şəxsi maraqlarına cavab verən bəzi vacib sənədləri köhnə tarixə qeyd etdirməklə həll edə biliblər. Amma əminəm ki, bir sıra «əməliyyat»larını rəsmiləşdirmək vaxt və digər səbəblərdən mümkün olmayıb. Çünki həmin torpaq sahələrini ələ keçirmək təkcə komitənini özündən aslı olan işlər deyildi. Bu və ya digər faktlar da Qərib Məmmədovun yaxın ətrafını “qayğılandıran” əsas məsələlər siyahısındadır».

Məlumatlı şəxsin sözlərinə görə, Kərəm Həsənov Hüseynqulu Bağırovdan fərqli olaraq, təhvil-təslim işlərində daha operativ və sərt davranışı ilə seçilir: «Kərəm Həsənov prezident fərmanı ilə sərəncamına verilən sahələrdə çalışan keçmiş komitənin bütün işçilərinin əmək kitabçasının yazılaraq özlərinə təhvil verilməsinə göstəriş verib. Bu proses dərhal həyata keçirilib. Ancaq o,

əmək kitabçaları özlərinə verilən işçilərini də sərbəst buraxmayıb. Tam əksinə, onlara fərmanın icrasında göstərilən müddətə qədər, yəni aprel ayının ortalarına qədər iş yerlərini tərk etmək qadağası qoyulub. Hətta ləğv edilən komitənin bütün işçiləri «Prezident fərmana görə, təhvil-təslim işləri iki ay çəkəcək. Ona görə aprel ayının ortalarına qədər iş yerlərinizdə olmalısınız. Əks halda, hər hansı bir çatışmazlığa məsul olan işçilər haqqında hüquq-mühafizə orqanlarına müraciət olunacaq», - deyə, qorxudulub. Bu xəbərdarlıqdan sonra Torpaq Komitəsinin bütün işçiləri və rayon şöbə müdirləri hər gün iş yerlərinə gəlir və komissiyanın istəyinə uyğun olaraq, tapşırıqları yerinə yetirirlər. Ancaq qeyd etdiyim kimi, onların əmək kitabçaları da özlərinə verilib. Yəni buna görə əmək haqları da almayacaqlar».

Müsahibimiz deyir ki, Torpaq və Xəritəçəkmə Komitəsinin ləğvindən sonra vətəndaşlara aid olan sənədlərin verilməsi də dayandırılıb: «Əmlak Məsələləri Dövlət Komitəsi yerli hərrac komissiyaları tərəfindən keçirilən hərraclarda qalib gələn vətəndaşların sənədlərinin verilməsini də dayandırıb. Məsələn, yanvar ayında qalib gələn torpaq sahibləri hərrac protokolunda göstərilən mülkiyyət sənədini indi ala bilmirlər. Çünki həmin sənədlər və müvafiq qeydiyyat kitabları da Kərəm Həsənovun yaratdığı komissiya tərəfindən torpaq şöbələrindən alınıb. Ona görə də onlar Əmlak Məsələləri Dövlət Komitəsinin Dövlət Reyestri Xidmətinə müraciət edib, torpaq sahəsinin özəlləşdirə bilmirlər. Xidmətdən deyirlər ki, mülkiyyət sənəd ancaq aprel ayından sonra veriləcək və məhz bundan sonra şəhadətnamə almaq üçün müraciət oluna bilər. Ancaq burada diqqətçəkən məqam odur ki, dekabr və yanvar ayından fərqli olaraq, fevral ayı ərzində respublika üzrə keçirilən torpaq hərracı qaliblərinin torpağa dair şəhadətnaməsi isə sahiblərinə verilib. Bunu isə həmin hərraclarda Əmlak Məsələləri Dövlət Komitəsinin nümayəndələrinin iştirakı ilə əsaslandırırlar. Yəni onu demək istəyirəm ki, bu sahədə də vəziyyət dolaşıq şəkildə davam edir».

Məlumatlı şəxs deyir ki, başda Qərib Məmmədov olmaqla, Torpaq və Xəritəçəkmə Komitəsinin rəhbərliyni, o cümlədən rayon torpaq şöbə müdirlərini ən çox əndişələndirən isə yoxlamadan sonra hazırlanan hesabatın Prezident Administrasiyasına təqdim ediləcəyidir:

«Bildiyiniz kimi, bu məsələ Prezident İlham Əliyevin imzaladığı ləğvetimə fərmanında da açıq yazılıb. Bildirilib ki, ləğv edilmiş komitənin dövlət torpaq kadastrı, yerquruluşu, geodeziya, torpaq bazarının təşkili, dövlət torpaq reyestrini aparmaq, bələdiyyələrin elektron daşıyıcıda və kağız üzərində xəritəni, habelə rübdə bir dəfə bələdiyyələrin hüdudları daxilində dövlət, bələdiyyə və xüsusi mülkiyyətdə olan torpaq sahələrində baş vermiş

dəyişikliklər barədə arayışı Prezident Administrasiyasına təqdim etmək səlahiyyəti Əmlak Məsələləri Dövlət Komitəsinə verilir.

Bu fakt isə Kərəm Həsənovun əlini gücləndirən və Qərib Məmmədovu güncə sıxacaq ən ciddi faktordur. Əgər nəzərə alsaq ki, ləğv edilmiş komitənin torpaqların monitorinqi, onların münbitliyinin bərpası və artırılması, geodeziya, topoqrafiya, xəritəçəkmə, qravimetriya, ərazi vahidlərinin sərhədlərinin müəyyən edilməsi, dövlət əhəmiyyətli coğrafi məlumat sistemlərinin yaradılması, ümumcoğrafi, torpaq, geobotaniki, siyasi-inzibati, elmi məlumat və digər sahələrarası mövzu xəritələrinin, atlaslarının, kartoqrafik tədris vasitələrinin layihələşdirilməsini, tətbiqini və nəşrini təmin etmək, dəqiqliyinə və məzmununa görə ümumdövlət, müdafiə, elmi-tədqiqat və digər məsələlərin həllini təmin edən dövlət topoqrafik xəritələrin, habelə qrafiki, rəqəmi, fotoqrafik və başqa formalı planların yaradılması, yeniləşdirilməsi, nəşri və geodeziya, qravimetriya, topoqrafiya və kartoqrafiya işlərinin həyata keçirilməsində, materialların istifadəsində dövlətin müdafiəsini və təhlükəsizliyini təmin etmək, vahid dövlət koordinat, yüksəklik, qravimetrik ölçmə sistemlərinin, topoqrafik xəritə və planların miqyas sıralarını təyin etmək və geodeziya, topoqrafiya və kartoqrafiya materiallarının və məlumatlarının metroloji təminatını həyata keçirmək sahəsindəki funksiyalarına dair vəziyyətini də Ekologiya və Təbii Sərvətlər Nazirliyi Prezident Administrasiyasına təqdim edəcək, o zaman Qərib Məmmədovun və ləğv edilən komitənin bütün məsul şəxslərinin əndişəsini anlamaq çətin deyil.

Göründüyü kimi, Qərib Məmmədov və onun keçmiş kadrlarının gələcək vəziyyətləri Kərəm Həsənovla Hüseynqulu Bağırov tərəfindən Prezident Administrasiyasına təqdim ediləcək hesabatdan aslı vəziyyətdədir. Məhz bu məqam da Qərib Məmmədov və ətrafının Kərəm Həsənovla Hüseynqulu Bağtırovun yaratdıqları komissiya üzvləri ilə isti davranmağa, onların hər bir göstərişini dərhal yerinə yetirməyə məcbur edir. Hətta bildiyimə görə, bir neçə ciddi məsələlərdən özünü və yaxın ətrafını sığortalamaq üçün Qərib Məmmədov şəxsən Kərəm Həsənov və Hüseynqulu Bağırovla danışıb. Ancaq onların keçmiş komitə sədri və onun yaxınlarına çox böyük güzəştə gedəcəkləri inandırıcı deyil. Çünki elə məsələlər var ki, istər nazir, istər komitə sədri bunların gələcək məsuliyyətini daşıya bilməyəcəklər».

Məlumatlı şəxs deyir ki, Qərib Məmmədov və keçmiş komitənin əksər vəzifəli şəxsləri ölkənin səfalı yerlərində böyük ərazilərə sahibləniblər: «Elə Nabran istiqamətində araşdırma aparılarsa, orada Qərib Məmmədovdan tutmuş, komitənin bəzi vəzifəli şəxslərinə qədər, çoxunun həbsi də gündəmə gətirilə bilər. Deyə bilərəm ki, Qərib Məmmədov və onun əksər yaxınlarının

meşə massivi və satılması qadacan olunan digər təyinatlı torpaq sahələrini qanunsuz yolla ələ keçirmələri haqlda ciddi faktar var. Yəqin ki, bu faktları nazir Hüseynqulu Bağırovla Kərəm Həsənov rahat şəkildə araşdırıb, müavfiq hesabat formasında Prezident Administrasiyasına təqdim etmək zorunda qalacaqlar. Əks halda Hüseynqulu Bağırov ölkənin cənub və şimal bölgələrində təyinatı saxta yollarla dəyişdirilən və ayrı-ayrı şəxslərin adlarına sənədləşdirilən torpaq sahələrinin gələcək məsuliyyətini də daşımalı olacaqlar. Nəzərə alsaq ki, bu qanunsuzluqlara yol verənlərin gec-tez hüquq-mühafizə orqanlarına cavab vermək zərurəti qaçılmazdır, o zaman şəxsən mən inanmıram ki, hazırda heç bir vəzifəsi olmayan Qərib Məmmədov və yaxın ətrafının əməllərinə göz yumulacaq».

Cəfər Mərdanoğlu