Məşhur məhbus qadının cəza çəkdiyi həbsxananın sabiq rəisi istintaqa çağırıldı

Şəmkirin keçmiş icra başçısı Aslan Aslanovun oğlunu qətlə yetirməkdə ittiham olunaraq, 10 il müddətinə azadlıqdan məhrum edilmiş Lamiyə Quliyevanın həbsxanada cəzasının daha 5 il yarım artırılması barədə qərardan, prokurorluğun verdiyi protestə məhkəmədə baxılma vaxtı bəlli olub. Protestə fevralın 13-də Bakı Apelyasiya Məhkəməsində baxılacaq. Proses saat 12:30-da başlayacaq.

Baş Prokurorluğun Ağır Cinayətlərə dair İşlər üzrə İstintaq İdarəsində, Lamiyə Quliyevanın həbsxanada uşaq dünyaya gətirməsi faktı ilə bağlı cinayət işinin istyintaqı davam edir. Penitensiar Xidmətin iki əməkdaşı istintaqa cəlb olunub. Adı açıqlanmayan əməkdaşlar cinayət işi üzrə şahid qismində ifadə veriblər. Bundan əlavə, Lamiyə Quliyevanın cəza çəkdiyi 4 saylı Cəzaçəkmə Müəssisəsinin sabiq rəisi Müzəffər Məmmədov da, şahid qismində istintaqa çağırılması ilə bağlı iddialar var.

Xatırladaq ki, 1987-ci il təvəllüdlü Lamiyə Quliyeva 2003-cü ildə həbs edilib. Cinayət Məcəlləsinin 120-ci (qəsdən adam öldürmə) maddəsinə əsasən təqsirləndirilən L. Quliyeva və keçmiş nişanlısı Vüqar Əliyev, 2003-cü ilin mayında Şəmkir rayonun sabiq icra başçısı Aslan Aslanovun oğlu Ruslanı qətlə yetirməkdə təqsirləndirilirlər. Respublika Ağır Cinayətlərə Dair İşlər üzrə Məhkəmənin hökmü ilə, Vüqar Əliyev ömürlük, Lamiyə Quliyeva isə 10 il müddətinə azadlıqdan məhrum edilib. 2010-cu ildə isə, L. Quliyevanın barəsində 317-ci (cəzaçəkmə müəssisəsinin və ya istintaq təcridxanasının normal fəaliyyətini pozma) maddəsi ilə cinayət işi başlanılıb. Həmin cinayət işi ilə əlaqədar onun cəzası 5 il 6 ay da artırılıb.

Hazırda Vüqar Əliyev Qobustan həbsxanasında cəza çəkir. Onu da qeyd edək ki, prokurorluğun verdiyi protest 317-ci maddə ilə bağlıdır. Lamiyə Quliyeva bir müddət əvvəl ana olub.