İcra başçısı Mirdaməd Sadıqov prezidentin etimadını doğrultmur

Azərbaycanda məmur özbaşınalığına qarşı baş verən ən böyük etirazlardan biri İsmayıllıda baş verib. Yəqin ki, rayonda məmur övladlarının qudurğanlığına qarşı ismayıllıların göstərdiyi sərt təpkini heç kim unutmayıb. İsmayıllını bərbad vəziyyətə qoyan, qazandığı milyonların havasından sərməst olub insanları aşağılayanlara qarşı baş verənlər əslində əksəriyyət üçün dərs olmalı idi. Lakin, bugünkü İsmayıllının ab-havasına nəzər yetirsək görərik ki, deyəsən məmurlar üçün unutqanlıq adi işdir. Belə olmasaydı, prezidentin etimad göstərərək narazılıq yaranan bir bölgəyə rəhbər təyin etdiyi Mirdaməd Sadıqov öz həmyerlilərini yenidən bu qədər incik salmazdı. Onun rayona rəhbər təyin olunması ismayıllıların ümidlərini artırsada sonrakı fəaliyyəti bir o qədər narazılıq doğurub. Qohumbazlıq, korrupsiya, rüşvətxorluq, büdcə vəsaitlərinin müxtəlif yollarla talanması İsmayıllının bugünkü mənzərəsidir. Burada sadəcə adlar dəyişib, iş prinsipi isə dəyişməz olaraq qalır.

İsmayıllı ölkəmizin kənd təsərrüfatının inkişafı üçün ən əlverişli bölgələrindən biridir. İnsafən bu sahənin daha dinamik inkişafını təmin etmək üçün dövlət büdcəsindən də kifayət qədər vəsait ayrılır. Lakin, rayonda kənd təsərrüfatı yalnız kağız üzərində tərəqqi edir. Subsidiyalar “ayrılan” əkin sahələri ildən-ilə çoxalsa da məhsuldarlıq da eyni templə aşağı düşür. Çünki, əkilməyən sahələrə subsidiyaların verilməsi inkişafın “yeni modelidir”. Nəzərə alsaq ki, Mirdaməd Sadıqov icra başçısı postuna qədər Dövlət Aqrar Universitetinin rektoru olub, onun aqrar “islahatlarını” anlamaq olar. Təsadüfi deyil ki, ötən il bu sahədə baş verənlər əlaqədar dövlət qurumlarını da hərəkətə keçməyə məcbur etmişdi.

Belə ki, Kənd Təsərrüfatı Nazirliyinin rəhbərliyi İsmayıllının 32 kənd üzrə buğda əkini üçün ayrılmış 799 min 397 manat 20 qəpik vəsaitin ən azı 35-40 faizini saxta sənədlər tərtib edilməklə mənimsənilməsi haqda ciddi şübhələrini təftiş etməyə qərar vermişdi. Hətta nazirliyin bu şübhələrində əminliyi təmin etmək üçün İsmayıllının 5-6 kəndində monitorinqlər də apardığı haqqında məlumatlar verilmişdi. Nəticədə bu zaman korrupsiya faktını təsdiq edən dəlillər ortaya çıxdığı barədə informasiyalar verildi.

Məlumata görə, 32 kənd üzrə 5723 hektar buğda əkildiyi haqda sənədlər tərtib edən Mirdamət Sadıqovun yerli icra nümayəndələrindən ibarət komissiya ümumilikdə 19 min 984 hektar 93 sot buğda səpini aparıldığını rəsmi sənədlərdə qeyd ediblər. Buna uyğun olaraq isə rayon üzrə 799 min 397 manat 20 qəpik pul ayrılıb. Lakin bu qədər hektara və ayrılan dəstək puluna rəğmən, məhsuldarlığın gözlənildiyindən kəskin aşağı olması dəhşətli korrupsiyanın izlərini üzə çıxardır. Büdcə vəsaitlərinin insafsızcasına talanması rayonda kənd təsərrüfatını iflic duruma salıb.

Rayonda korrupsiyanın hökm sürdüyü ənənəvi sahələrdən biri də abadlıq-quruculuq işlərinin aparılmasıdır. Əksər icra başçılarının sevimli məşğuliyyəti olan bu sahəyə İsmayıllıda da xüsusi diqqət yetirilir. Görülən işlərin böyük əksəriyyəti

sahibkarların, büdcə təşkilatlarının hesabına aparılsa da, əvəzinə dövlətin milyonlarla manat vəsaiti silinir, mənimsənilir.

Sadəcə İsmayıllı rayonunda həyata keçirilmiş işlərdən bir neçəsinə diqqət yetirdikdə vəziyyətin daha acınacaqlı və biabırçı həddə olduğu diqqəti çəkir. Burada sənəd üzərində milyonlar havaya sovrulsa da əslində başdansovdu, gözdən pərdə asmaq məqsədilə görülən kosmetik işlərdən başqa heç nə gözə dəymir. Rayon icra başçısı Mirdaməd Sadıqovun rəhərliyi altında inşa edilmiş keçmiş Zərifə Əliyva adına park, indiki Uşaq Əyləncə Mərkəzində istifadə olunmuş tikinti materiallarının sənədlərlə bir birinə uyğun gəlmədiyi məlum olub. Belə ki, parkdakı hovuzların içinə mərmər daşdan örtü çəkildiyi sənədlərdə qeyd olunsa da, əslində orada «linenium» adlanan plastik örtükdən istifadə olunub. Bunun üçün külli miqdarda vəsaitin silindiyi şübhəsizdir. Amma rayondakı yeyintilər bununla bitmir. İsmayıllının icra başçısı Mirdaməd Sadıqovun bir başqa «əməliyyatı» İcra Hakimiyyətinin yenidən əsaslı təmir edilməsindən ibarətdir. Lakin bu zaman yeyinti halları bir neçə insanın həyatına az qala son qoyacaqmış. Məlumata görə, əsaslı təmir etdirilən binanın hörgüləri uçaraq, fəhlələrin başına tökülüb. Xoşbəxtlikdən ölüm hadisəsi yaşanmayıb, amma bir neçə işçi bədən xəsarətləri alıblar. Maraqlıdır ki, Mirdaməd Sadıqov baş verən olayı araşdıraraq, günahkarları cəzalandırmaq yerinə, işi ört-basdır edib. Aydın məsələdir ki, bunu etməkdə məqsəd büdcə pullarının dağıdılması sirrini gizlətmək olub.

İsmayıllı ölkəmizin ən səfalı guşələrindən biri hesab olunur. Rayonda turizmin inkişafı üçün əlverişli şərait var. Ancaq məmurların “xidməti” nəticəsində əfsanəvi

İsmayıllı meşələrinin taleyi də təhlükə altındadır

Rayondan verilən xəbərlərə görə, yaşıllıqların məhv edilməsi rayonunun Yaşıllaşdırma İdarəsinə yeni təyin edilmiş müdir tərəfindən həyata keçirilir.

Məlumata görə, Yaşıllaşdırma idarəsinin müdiri Sadıq Bağırov rayon mərkəzindəki yaşıllıqları təmizlik adı ilə kəsib taxta sexlərinə satır. Məsələ ilə əlaqədar vətəndaşların şikayətini nəzərə alan Ekologiya və Təbii Sərvətlər Nazirliyinin İsmayıllı bölgəsində yerləşən regional idarəsindən bildiriblər ki, onun qanunsuz əməlləri ilə bağlı dəfələrlə xəbərdarlıq edilib. Lakin xəbərdarlıqlara baxmayaraq, S.Bağırov öz əməllərinə davam edir. Təbii ki, baş verənlər heç də rayon rəhbərliyindən xəbərsiz baş vermir. Bu isə M. Sadıqovun İsmayıllıya olan “sevgisinin” daha bir nümunəsi hesab oluna bilər.

İsmayıllının çətin günlərində etimad göstərilən, vəzifə başına gətirilən M. Sadıqovun əməlləri nəinki narazılıqları aradan qaldırıb, əksinə bir qədər də artırıb. Xalq narazılığının nə ilə bitdiyini isə icra başçısı unutmamalıdır!

Mustafa