Mirdaməd Sadıqov məhbusların buraxılacağına kömək vəd etsə də, onların ittihamları ağırlaşdırılıb
Azərbaycan bu ilin yanvarında ardıcıl üsyanlar yaşadı. Ölkədə artmaqda olan gərginlik və xalq etirazlarının genişlənməsi nicat yaratmışdı ki, may ayınadək inqilabi ab - hava yüksələcək. Cəmiyyətin gözləntisi də xalqın ayağa qalxması və müxalifətsiz dəyişikliyə nail olacağı idi.
Başçının vədi
Amma hakimiyyət bu üsyanları “xaotik nəzəriyyə”yə uyğun olaraq idarə etməyə başladı və istədiyi məcraya yönəltdi. Özəlliklə də İsmayıllı üsyanından sui-istifadə edib bunu xalq etirazı deyil, müxalifətin iğtişaş cəhdi kimi qiymətləndirdilər. Sonradan prezidentin məmurlara barmaq silkələməsi, İsmayıllıda icra hakimini dəyişməsi ilə proseslər səngitdi.
İsmayıllı üsyanında tutulanların hazırda istintaqı gedir və bu günlərdə onlara qarşı daha ağır ittihamlar irəli sürüldü. Rayon camaatının arzusu isə onların tezliklə buraxılması idi. Buna əsas verən İsmayıllıya yeni təyin olunmuş icra başçısı - Mirdaməd Sadıqovun əhaliyə verdiyi söz idi. O məhbusların azad olunması üçün köməyini əsirgəməyəcəyini vəd etmişdi.
Əksinə olaraq məhbusların ittihamları ağırlaşdırıldı. Bununla da əhalinin təzə başçıya olan ümidi ilk mərhələdə dəfn olundu. İnsanlar gözləyirdi ki, prezident müşavirə keçirib məmurları danlayırsa, deməli məhbusların dolayısı ilə günahsız olduğunu təsdiqləyir. Bu da onların buraxılacağına ümid oyadırdı. Amma indi vəziyyət dəyişib və hazırda İsmayıllı camaatı çox qəzəblidir.
Əhali məhkəməni gözləyir
Rayonda gərginlik müvəqqəti olaraq səngiyib, sabitlik olsa da əhali məhkəmələrin başlanması vaxtını gözləyir. İsmayıllılar hazırda ümid edirlər ki, məhkəmə vaxtı aksiyalar keçirib onların azadlığına nail olacaqlar. Camaatın sözlərinə görə, tutulan 16 nəfər günahsızdır. Çünki harınlamış məmur balaları həmin 16 nəfəri deyil, bütövlükdə rayon əhalisini təhqir ediblər və cavablarını alıblar. Ona görə də hadisələrdən sonra yalnız 16 nəfərin məsuliyyətə cəlb olunması ədalətsizlikdir.
İsmayıllı məhbuslarından birinin atası bildirdi ki, oğlu Bakı İstintaq Təcridxanasında saxlanır və bu günlərdə ona sovqat aparıb: “İstintaq gedir, nəticəsini gözləyirik. Mənim oğlum günahsızdır. O da hamı kimi hadisələr vaxtı orada olub. Camaatı təhqir ediblər, insanlar da yığışıb etirazını bildirib. Ancaq bütün millətin içərisindən 16 nəfəri ayırıb həbs ediblər. Bu uşaqlar nə edib ki? Bütün tutulanların ailələri və İsmayıllı camaatı hesab edir ki, onlar haqsız tutulublar. Biz ümid edirik ki, haqq-ədalət öz yerini tapacaq və bizim uşaqlar azadlığa çıxacaq”.
Digər İsmayıllı məhbuslarının ailələri də övladlarının həbsini haqsızlıq sayır. Onlar da ümid edirlər ki, ədalət öz yerini tutacaq. Rayon sakinləri isə səbirsizliklə məhkəmələrin başlamasını gözləyir. Əhali məhkəmələrin qarşısına yığışıb məhbuslara dəstək vermək niyyətindədir.

Kaş bu addımları üsyandan qabaq ataydılar

Ümumilikdə isə hələlik İsmayıllıda sakitlikdir, rayon icra hakimiyyətində ciddi kadr islahatı aparılmayıb. Buna baxmayaraq, icra başçısı əhali ilə tez-tez görüşlər keçirir. İsmayıllı əhli isə gileylənir ki, kaş bu addımları üsyandan qabaq ataydılar və iş də bu yerə gəlib çıxmayaydı. Rayon sakini Firuz Əliyev: “Məgər biz nə istəyirdik ki? Deyirdik ki, sosial problemləri həll edin, ən kiçik şikayəti dinləyin, insanlara yuxarıdan aşağı baxmayın, camaatı bezdirməyin. Amma bunlar heç kimi saymırdılar, əhalini üsyan həddinə çatdırırdılar. Bizim etiraz aksiyalarımıza səbəb təkcə məmur övladlarının əhalini təhqir etməsi deyildi, həm də rayondakı sosial-iqtisadi vəziyyətin ağırlığı idi. Düzdür, indi də ciddi bir dəyişiklik yoxdur. Amma heç olmasa camaatın şikayətinə pis-yaxşı baxırlar”.

Aslan