Azərbaycan Respublikasının Nəqliyyat naziri Ziya Məmmədov cənabına

Hörmətli nazir!

Etik normalara zidd olsa belə mən soruşmaq məcburiyyətindəyəm.

-Nəqliyyat sistemində nə vaxt qayda-qanun yaradılacaq?

-Sürücülər nə vaxt sərnişinlərlə adam kimi rəftar edəcəklər?

-Avtobuslar arası intervala nə vaxt əməl olunacaq?

Gündüz yalvarsan belə heç bir avtobus 20 yanvar metro stansiyasının çıxışında saxlamaz. Axşam isə onları həmin dayanacaqdan qovmaq olmur. Nəqliyyat müfəttişləriniz az qala bir ordudur. Səhər tezdəndən axşam düşənədək tolpa ilə işləyirlər. Olmazmı ki, onlar da öz aralarında qrafik tərtib edib nəqliyyata nəzarət etsinlər? Səhər saatlarında dayanacaqda onuna rast gəlmək olur.

Mən hər dəfə marşrut sahiblərinə iradlarımı bildirirəm. Ancaq onlar tədbir görmürlər. Bizimlə niyə belə davranırlar? Axı biz də insanıq.

Sonuncu dəfə 7 mart tarixində üzləşdiyim neqativ hal sizə yazmağa məni məcbur etdi. Axşam saat 23.00-da 3mkr dairəsində 135 saylı avtobusa mindim. Sürücü, yaşı yetmişdən yuxarı, kepka başında bir kişi siqaret çəkirdi. Soruşdum ki, interval neçə dəqiqədir? Dedi, on dəqiqə. On iki dəqiqədən sonra onun yanında oturan, çox güman ki, şəriki, otuz-otuz beş yaşlarında, sol əlində nakolka (barmağının üstündə kral döyülmüş) oğlan dedi ki, vaxta varsa gedim çay alım. O da cavab verdi ki, hələ üç dəqiqə var. Mən ona bir də xatırlatdım. Sonra 20 yanvar metro stansiyasına qalxdıq. On beş dəqiqə də metronun çıxışında saxladı. Səksən nəfərdən çox sərnişin yığandan sonra tərpəndi. Mən ona şikayət edəcəyimi bildirdim. Dedi ki, mən pulumu qazanıram. Nəqliyyat nazirliyi-zad... o məsələ.

Cənab nazir!

Sizin müfəttişlərin nəzarətsizliyi ucbatından görün iş nə yerə gəlib çatıb ki, təqaüd yaşında kişi...

İfadə etməyə söz tapa bilmirəm. Sürücülər özləri etiraf edirlər ki, gündə bir qırmızı yüzlük qazanmasaq evə getmərik. Yəni sürücülər bu qədər harınlayıblar?

Xahiş edirəm tədbir görülməsi, qəti şəkildə cəzalandırılması üçün göstəriş verəsiniz.

Hörmətlə:

“Rəsmi Bakı” qəzetinin baş redaktoru Əli bəy Azəri