Mirdamət Sadıqovun Aqrar Universitetdəki hoqqaları üzə çıxır; Arif Qaraşovun oğlunun elmi işi ortaya ciddi şübhələr çıxarıb

Daşınmaz Əmlakın Dövlət Reyestri Xidmətinin sabiq rəisi Arif Qaraşovun oğlu Fərhad Qaraşovun Aqrar Universitetdə iqtisad üzrə fəlsəfə doktoru dərəcəsi alması haqda yayılan xəbərlər diqqəti bu sahəyə yönəldib.

«Gündəm xəbər» qəzeti xəbər verir ki, Arif Qaraşovun oğlunun sürətlə elmi ad almasında akademik Ziyad Səmədzadədən daha çox, İsmayıllının icra başçısı olan Mirdamət Sadıqovun böyük rol oynadığı inkar oluna bilməyəcək faktdır:

«Burada əsas məsələ Mirdamət Sadıqovun icra başçısı və ya Arif Qaraşovun oğlu Fərhad Qaraşovun elmi rəhbəri olması deyil. Bildiyiniz kimi, Mirdamət Sadıqov 2013-cü ilin fevralınadək, yəni icra başçısı təyin olunan zamana qədər Gəncədə yerləşən Aqrar Universitetin rektoru olub. O, hazırda da akademik Ziyad Səmədzadənin rəhbəri olduğu və Azərbaycan Dövlət Aqrar Universitetinin nəzdində fəaliyyət göstərən FD.04.013 Birləşdirilmiş Dissertasiya Şurasında əsas fiqurlardan biri olaraq qalır. Yəni bu şuranın Gəncəyə, 2013-dək rektoru olduğu universitetə gətirilməsində, onun fəaliyyətində icra başçısının müstəsna rolu var. Bu səbəbdən də 2 ildir icra başçısı olmasına baxmayaraq, o, bu şurada indi də ciddi təsirə, sözə sahibdir. Onun rektorluğu dövründə şura ilə bağlı olan kadrlarının bu gün də orda əsas adamlardan olması da, deyilənlərə bir az da aydınlıq gətirə bilər».

Müsahibimiz həmin şura, orada yaşanan rüşvət və digər çirkin olaylardan da bəhs edib və hesab edir ki, bunlar hələ bir neçə il bundan əvvəl Prezident Administrasiyasının rəhbəri, akademik Ramiz Mehdiyevin məqalə yazaraq etdiyi xəbərdarlıqlara əhəmiyyət verilməməsi deməkdir:

«Bəli, bu şurada müdafiə edənlərin ümumi siyahısını çıxarsanız, görəcəksiniz ki, daha çox məmurlar, onların övladları, bankirlər və sair imkanlı təbəqəyə sahib olanların müdafiələrinə qanundan kənar şəraitlər yaradılıb. Onların bəziləri hətta plagiat işlərlə elmi ad alıblar. Bu məsələdə Mirdamət Sadıqovun yerlisi və yaxın adamı olan, hazırda Kənd Təsərrüfatı Nazirliyinin Aqrar Elm Mərkəzinə rəhbərlik edən Rasim Balayevin də «əməyi» az olmayıb. Yəni bir sıra məmur və imkanlı adamların elmi işlərini Rasim Balayev yazıb, Mirdamət Sadıqov müdafiəsini təşkil etdirib. Onun yazdığı elmi işlər isə ciddi araşdırılmadan, müzakirə olunmadan vaxtından əvvəl müdafiəyə buraxılıb. Dediyim kimi, gedin son illər orada müdafiə olunan işlərin siyahısını çıxarın, görəcəksiniz ki, Azərbaycan elmini rüsvay duruma necə qoyublar, hansı çirkin yollara əl ataraq, kimləri hansı vəziyyətə salıblar».

Məlumatlı şəxs deyir ki, bir neçə gün əvvəl saytlarda Arif Qaraşovun oğlu Fərhad Qaraşovun elmi ad alması ilə bağlı yayılan xəbərlər də faktdır:

«Bəli, martın 29-u, saat 14.00-da baş tutan müdafiədə Arif Qaraşovun oğlu Fərhad Qaraşov iqtisad üzrə fəlsəfə doktoru adını alıb. Bu, o Fərhad Qaraşovdur ki, 2012-ci ilin payızında həmin vaxtı Mirdamət Sadıqovun rektoru olduğu Aqrar Universitetinə sənəd verib, amma dissertanturaya 2013-cü ilin yanvar ayından başlayıb. Mirdamət Sadıqov həmin vaxtı Fərhad

Qaraşovun elmi rəhbəri vəzifəsini də öz üzərinə götürüb. Qaraşovun qəbulundan 2 ay sonra isə Mirdamət Sadıqov İsmayıllıya icra başçısı təyin olunub. Gərgin bir rejimində işləməsinə baxmayaraq, icra başçısı Mirdamət Sadıqov Fərhad Qaraşovun elmi rəhbəri olmaqdan imtina etməyib. Və faktdan, yəni martın 29-da FD.04.013 Birləşdirilmiş Dissertasiya Şurasında baş tutan müzakirədən aydın olur ki, icra başçısı Fərhad Qaraşovun elmi işində öz üzərinə düşən missiyanı sona çatdıra bilib ”.

Müsahibimiz deyir ki, dissertantura təhsili 4 illikdir, lakin Fərhad Qaraşov 4 ilə deyil, çox qısa müddətə həm elmi işini, həm də elmi məqalələrini yazaraq, çap etdirib:

"Görünür, Fərhad Qaraşovun inadkarlığı, elmi rəhbəri Mirdamət Sadıqovun isə İsmayıllıya icra başçısı göndərilməsi vəziyyəti dəyişib. Sizə Fərhad Qaraşovun avtoreferatını təqdim edirəm. Baxın, müdafiə üçün tələb olunan elmi məqalələrinin 6-nı 2013-də yazıb. İki məqaləsi isə 2014-də çap olunub. Ancaq qeyd etdiyim kimi, 2015-in mart ayının 29-da müdafiə eləyib. Yəni o, təxminən 2 ilə iqtisad üzrə fəlsəfə elmlər doktoru oldu”.

«Fəlsəfə doktoru» elmi dərəcəsi üzrə dissertantlıq yolu ilə təhsil alan şəxslərin müəyyən olunmuş qaydada ixtisas fənnindən, fəlsəfə, informatika və xarici dildən, həmçinin ixtisas uyğunluğu nəzərə alınmaqla, digər fəndən də doktorluq imtahanları verməli olduğunu da deyən müsahibimiz deyir ki, Fərhad Qaraşovun bu fənlərdən imtahanları necə verdiyindən xəbərdar deyil: «Saytlarda yazılıb ki, Fərhad Qaraşov guya bütün imtahanları uğurla verib. Mən bunun əksini iddia etmək niyyətində deyiləm. Hər şeyi Sizin və rəsmi dairələrin üzərinə buraxıram. Xahiş edirəm, gedin bu faktı da dəqiqləşdirin, görün Fərhad

Qaraşovdan əvvəl neçə yetim-yesir müdafiə üçün növbədə olub? Bəs Fərhad Qaraşovun adı nə zaman növbəyə salınıb? Onun müdafiədən əvvəlki seminarı hansı şəraitdə və necə baş tutub? Bunları araşdırsanız, bütün qaranlıq sualların, hətta Mirdamət Sadıqovun ən yaxın adamlarından birinin seminarlarda hansı hoqqalardan çıxdığını nə qədər “haqq” aldığını da görəcəksiniz».

«Gündəm xəbər» qəzetinə daxil olan bəzi fakt və iddialarla bağlı araşdırmalarımız davam edəcək. Növbəti saylarımızda kimlərin hansı yollarla elmi ad almaları faktlarla təqdim olunacaq.

Yazıda adı çəkilənlərin mövqeyini də dərc etməyə hazırıq.

Cəfər MƏRDANOĞLU