Məhz bundan sonra SHXÇDX rəisi qanuna
müvafiq formada cəzalandırıla bilər

Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) rəisi, general-leytenant Arzu Rəhimov bu günədək sərgilədiyi fəaliyyətilə yuxarıların ona olan etimadını doğrultmadı. Bunu sübuta yetirmək o qədər də çətin məsələ deyil. Sadəcə olaraq, son bir il ərzində müxtəlif xəstəliklər üzündən dünyasını dəyişmiş gənc əsgərlərin statistikasına, onların ölüm səbəblərinə nəzər yetirmək kifayətdir ki, A.Rəhimovun yarıtmaz kadr olduğu qənaətinə gələsən.
General-leytenantın SHXÇDX-yə, eləcə də qurumun rayon şöbələrinə özünə yaxın olan şəxsləri əsasən rəhbər vəzifələrə yerləşdirdiyini deyən məlumatlı şəxs iddia edir ki, hazırda SHXÇDX-də A.Rəhimova müxalif mövqedə dayanan, onun həyata keçirməyə çalışdığı "islahat"ların o qədər effektli olmadığını düşünən kifayət qədər ciddi qüvvələr var: "Artıq general-leytenantın özünün də bu barədə məlumatı var və elə buna görə də o, həmin qüvvələri neytarllaşdırmağa, onları bir-bir sıradan çıxarmağa çalışır. Arzu Rəhimov həmin şəxslərin hərbi xidmətə çağırış sistemində kifayət qədər təcrübəli olduqlarını nəzərə almadan, müxtəlif yollardan və himayədarlarının yardımlarından istifadə edərək onları uzaqlaşdırıb əvəzinə öz kadrlarını yerləşdirməyi planlaşdırır. Artıq ordu ilə bu və digər formada əlaqəsi olan şəxslərə məlumdur ki, Arzu Rəhimov hələ bir müddət öncə ciddi cəhdlə SHXÇDX-ni özününküləşdirməyə, onun maraqlarına cavab verməyən kadrları kənarlaşdırmağa start verib. İllərini bu sahəyə vermiş, həqiqi hərbi xidmətə çağırış sistemində kifayət qədər təcrübə toplamış bəzi şəxslərin yerinə Arzu Rəhimovun adamlarının təyin olunması bu barədə deyilənləri bir daha təsdiqləyir". SHXÇDX-ni "yağlı tikə" adlandıran məlumatlı şəxs hazırda bu qurumda mövcud olan qeyri-şəffaf mexanizmlərin rahat rüşvət yığımına yol açdığını iddia edir: "Son proseslər, eləcə də əsgər ölümünün gün keçdikcə bir qədər də artması bir daha onu təsdiqləyir ki, SHXÇDX-in ayrı-ayrı rayon şöbələri əldə etdikləri maddi marağın müqabilində xəstəliyi olan gəncləri ordu sıralarına cəlb edir, sağlam və imkanlı çağırışçıların isə müxtəlif bəhanələrlə "neqodnıy" kimi qeydiyyata düşməsinə şərait yaradırlar. Bildiyiniz kimi, SHXÇDX ötən ilin fevral ayında yaradılıb və bu günədək qurum tərəfindən düz 4 çağırış həyata keçirilib. Məhz həmin çağırışlar zamanı həqiqi hərbi xidmətə yüzlərlə vərəm və başqa yoluxucu xəstələr, psixi problemi olan şəxslər, eplepsiyadan tutmuş şizofereniyalı çağrışçılara qədər orduya göndərilirib. Üzərindən qısa müddət keçdikdən sonra ciddi xəstəliyi olan bəzi əsgərlər ya dərhal geri qaytarılıb, ya da təxris edilib". A.Rəhimovun SHXÇDX-nin rəisi vəzifəsinə gətirilməsini uğursuz addım kimi dəyərləndirən mənbənin sözlərinə görə, hazırda qurumun bir çox rayon şöbələrində ciddi nöqsanlar, rüşvət və korrupsiya faktları mövcuddur. SHXÇDX-in Suraxanı rayon şöbəsində də eyni vəziyyətin hökm sürdüyünü qeyd edən mənbə iddia edir ki, son bir il ərzində adıçəkilən qurum onlarla gənc əgsərin ölümünə səbəb olub: "Xidmətin Suraxanı rayon şöbəsində hərbi-həkim komissiyasından keçən gənc çağırışçılar xəstəlikləri olduqları halda, sağlam kimi qeydiyyatdan keçiriliblər. Hərbi xidmətə yollanandan sonra isə xəstəlikləri özünü büruzə verib. Nəticədə bir müddət sonra həmin gənc əsgərlər xidmət zamanı məhz xəstəlikdən dünyalarını dəyişiblər. Heç şübhəsiz ki, əsgər ölümünə görə, Arzu Rəhimov və onun tabeçiliyində çalışan şəxslər məsuliyyət daşıyırlar. Bunun üçün kifayət qədər əsas var. Məsələn, SHXÇDX-in Suraxanı rayon şöbəsi tərəfindən həqiqi hərbi xidmətə göndərilmiş Quliyev Fərid Seymur oğlu düzgün çağırılmayıb. Odur ki, bu və digər önəmli məsələlərə aydınlıq gətirilməlidir".
Artıq general-leytenant haqqında yuxarı dairələrə lazımi məlumatın verildiyini qeyd edən mənbə bildirir ki, yaxın günlərdə Respublika Hərbi Prokurorluğu tərəfindən SHXÇDX-in özündə və onun rayon şöbələrində geniş yoxlamalara başlanılacaq: "Bu ilin yanvar ayının sonlarına yaxın hərbi prokuror Xanlar Vəliyev Arzu Rəhimovun rəhbərlik etdiyi xidmətinin idarə, şöbə və bölmələrində aparılmış yoxlamaların nəticəsini açıqlamışdı. O bildirmişdi ki, yoxlamalar nəticəsində bir sıra hallarda çağırışçıların hərbi xidmətə çağırışdan əsassız azad edilmələri onlara hərbi-həkim komissiyalarının rəylərinə əsasən çağırışdan qanunsuz möhlət verilməsi və çağırışçıların valideynlərindən rüşvət alınması ilə bağlı Bakının Binəqədi, Sumqayıt, Gəncə şəhərinin Nizami və Kəpəz rayonları, Lənkəran şəhər və digər rayon şöbələrinin vəzifəli şəxsləri barəsində Cinayət Məcəlləsinin 311-ci (rüşvət alma), 313-cü (vəzifə saxtakarlığı) və 341-ci (hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə) maddələrilə başlanmış cinayət işlərinin istintaqı yekunlaşaraq baxılması üçün hərbi məhkəmələrə göndərilib, həmin işlər üzrə ittiham hökmü çıxarılıb. Odur ki, qəti əminliklə demək olar ki, baş tutacaq yeni araşdırmalar zamanı da Hərbi Prokurorluq SHXDÇX-də daha bir sıra qanunsuzluqları da aşkarlayacaq. Böyük ehtimalla, məhz bundan sonra Arzu Rəhimovun layiqli şəkildə cəzalandırılması baş tuta bilər".
Malik