Rayon su idarəsinin müdiri əhaliyə zülm edir, içməli suyu villalara satır, milyonları mənimsəyir

Daşkəsən ağır günlərini yaşayır. Şəhər hər bir tərəfdən içməli bulaqlarla zəngin olsa da, məmurlar bölgəni Kərbəla çölünə çevirib. “Gündəm xəbər”ə göndərilən şikayət məktubunda qeyd olunur ki, şəhərin su ehtiyatını yaxşılaşdırmaqdan ötrü 90-cı illərin axırında Qoşqar dağından su xətti çəkilib: “Bu xətt şəhər sakinlərini içməli suya olan təminatını ödəyirdi. Artıq 4 ildir ki, bu xətt Xoşbulaq yaylağına gələn heyvan sürülərinə və Xoşbulaqda tikilən bağ evlərinə satılır. Rayon su idarəsinin rəisi Pənah Əhmədov mənzillərə su sayğaclarının quraşdırılmasını dayandırıb. Əhalidən adambaşı hesabla pul yığmağa başlanıb. Amma 1860 abunəçisi olan şəhərin 70 faizində su sayğacı yoxdur. Sakinlərə 5-10 gündən bir su verilir. Bu hesabla sayğacı olan sakinlərdə su sayğacı 30-50 qəpik yazdığı halda, sayğacı olmayan sakinlərdən adambaşı hesabla 2-4 manat pul yığılır. O da orta hesabla hər ay 4-5 min manat artıq pul yığılıb mənimsənilməsinə

gətirib çıxarır”. Məktub müəllifləri qeyd edirlər ki, yay aylarında Qoşqar su xəttini hər heyvan sürüsünə 1000-2000 manat olmaqla, hər bağ evinə 100-300 manat olmaqla alınaraq Xoşbulaqda satılır: “Bu da orta hesabla hər il yay aylarında 30000-45000 manat pul deməkdir. Pənah Əhmədov ustalıqla bu pulu mənimsəyir və əhali də susuz qalır. Daşkəsənə gələn digər Gülbulaq su xəttində elektrik enerjisinə qənaət edərək su anbarlarına fasilə ilə su vurulur. Bu da sakinləri su ilə təmin etmir. Su idarəsinin rəisi rayonda olan su maşınlarına hər gün 30 manat almaqla suyu istədikləri vaxt istədikləri qədər aparıb əhaliyə satdırır. Bunun nəticəsidir ki sakinlərə 5-9 gündə bir verdikləri su da 30-50 dəqiqə çəkir. Sakinlər bulaqlardan su gətirib mənzildə işlədir. Verilməyən suya görə də hər ay məcburi icra hakimiyyətinin təzyiqi altında pul yığılır. Hər il Baş İdarədən rayon su xəttini təmirinə 100 000 manat pul ayrılır. Cari ildə təmir adı altında saxta sənədlə Pənah Əhmədov vəsaiti mənimsəyib”.

Daşkəsəndə Su İdarəsi müdirinin qanunsuz əməlləri barəsində ən yeni məlumatlar da var. “Gündəm xəbər”ə verilən məlumata görə, Pənah Əhmədov rayonda Qarabağ əlilləri üçün nəzərdə tutulan 3 otaqlı mənzili saxta sənədlərlə özəlləşdirib.

Xəbərdə deyilir: “Rayonda ancaq İcra Hakimiyyətinə və onun müavini Namiq özünə 3 mərtəbəli əyləncə mərkəzi tikir. Nəzərə alsaq ki, son 10 ildə burada olan H.Əliyev parkına 15 milyon manat xərclənib. H.Əliyev mərkəzi təzədən təmir edilir.

Əgər nəzərə almasaq ki, bu binaya son 8 ildə 10 milyon manat xərclənib, H.Əliyev küçəsində təzədən hasarlar təmir edilir. Təmirli hasarlar, səkilər sökülüb təzədən tikilir. Bu da külli miqdarda pulun havaya sovrulmasıdır ki, rayonun digər küçə və məhəllələri nə asfalt, nə təmir gedir”.

Məktub yazan rayon sakinləri onu da qeyd edirlər ki, ən yüksək və mənzərəli yerdə, yəni köhnə stadionun yanı zibil qəbiristanlığına dönüb. Hətta şəhərdən 10 km aralıda olan “ELBA” kolbasa kombinatı zir-zibilini bura tökür.

Zibilin üstü örtülmür, vaxtaşırı yandırırlar. Bu da rayonu üfunət iyi ilə bürüyür, nəfəs almaq mümkün olmur. Şəhər artıq kənd statusu alıb. Belə ki, rayon küçələrində, mənzillərin ətrafında, məhəllələrdə mal-qoyun, toyuq-cücə saxlanılır. Bunların zibilləri təmizlənmir. Regionların İnkişafı Dövlət Proqramı tərsinə yerinə yetirilir.